ഏതൊക്കെ ടെസ്‌ല കാറുകളാണ് ഇന്ത്യയിൽ എത്തുക?

ടെസ്‌ലയുടെ ഇന്ത്യൻ വിപണിയിലേക്കുള്ള വരവ് പ്രതീക്ഷയോടെ കാത്തിരിക്കുന്നു. ആദ്യ ഷോറൂം മുംബൈയിൽ ആരംഭിക്കാനൊരുങ്ങുന്ന ടെസ്‌ല, മോഡൽ 3, മോഡൽ S എന്നീ മോഡലുകൾ ആദ്യം പുറത്തിറക്കുമെന്നാണ് സൂചന.

അമേരിക്കൻ ഇലക്ട്രിക്ക് വാഹന ഭീമൻ ടെസ്‌ലയുടെ ഇന്ത്യയിലേക്കുള്ള കടന്നുവരവ് ഇപ്പോൾ ചൂടേറിയതുമായ വിഷയങ്ങളിലൊന്നാണ്. കമ്പനി മുംബൈയിൽ ഇന്ത്യയിലെ ആദ്യ ഷോറൂമിനുള്ള സ്ഥലത്തിനുള്ള വാടക കരാറിൽ കമ്പനി അടുത്തിടെ ഒപ്പിട്ടിരുന്നു. ബാന്ദ്ര കുർള കോംപ്ലക്സിൽ 4,000 ചതുരശ്ര അടി വിസ്‍തൃതി ഉള്ളതാണ് ഈ ഷോറൂം. അടുത്ത മൂന്ന് മാസത്തിനുള്ളിൽ കമ്പനി ഇന്ത്യയിൽ പ്രവർത്തനം ആരംഭിച്ചേക്കാം എന്നാണ് റിപ്പോർട്ടുകൾ. ജർമ്മനിയിലെ ബെർലിനിലെ ബ്രാൻഡൻബർഗിലെ ടെസ്‍ല ഗിഗാഫാക്ടറിയിൽ നിർമ്മിക്കുന്ന കാറുകൾ ഇന്ത്യയിൽ ഇറക്കുമതി ചെയ്യും എന്നാണ് റിപ്പോർട്ടുകൾ. ഇന്ത്യയിലേക്കുള്ള വരാനിരിക്കുന്ന മോഡൽ ലൈനപ്പ് ടെസ്‍ല ഇതുവരെ വെളിപ്പെടുത്തിയില്ല. എന്നാൽ കമ്പനിയുടെ ഇന്ത്യയിലെ ശ്രേണിയിൽ മോഡൽ 3, ​​മോഡൽ എസ് എന്നിവ ഇതിൽ ഉൾപ്പെടുമെന്ന് പ്രതീക്ഷിക്കുന്നു. വരാനിരിക്കുന്ന ഈ ടെസ്‌ല കാറുകളുടെ പ്രധാന വിശദാംശങ്ങൾ പരിശോധിക്കാം.

ടെസ്‌ല മോഡൽ 3
ആഗോള വിപണികളിൽ, ടെസ്‌ല മോഡൽ 3 ഒന്നിലധികം കോൺഫിഗറേഷനുകളിലാണ് വാഗ്ദാനം ചെയ്യുന്നത് .  57.5kWh RWD സിംഗിൾ മോട്ടോർ, ലോംഗ്-റേഞ്ച് 82kWh AWD ഡ്യുവൽ മോട്ടോറുകൾ, പെർഫോമൻസ് 82kWh ഡ്യുവൽ മോട്ടോറുകൾ എന്നിവ. എൻട്രി ലെവൽ 57.5kWh RWD വേരിയന്റ് ഏകദേശം 513 കിലോമീറ്റർ ഡബ്ല്യുഎൽടിപി റേഞ്ചും 201 കിലോമീറ്റർ ടോപ് സ്പീഡും വാഗ്ദാനം ചെയ്യുന്നു. സിംഗിൾ റിയർ-മൗണ്ടഡ് പെർമനന്റ് മാഗ്നറ്റ് സിൻക്രണസ് മോട്ടോറുമായാണ് ഇത് വരുന്നത്. ഇത് 170kWh വരെ ഡിസി ഫാസ്റ്റ് ചാർജിംഗിനെ പിന്തുണയ്ക്കുന്നു. 82kWh ബാറ്ററിയും ഡ്യുവൽ മോട്ടോറുകളും സജ്ജീകരിച്ചിരിക്കുന്ന ലോംഗ്-റേഞ്ച് AWD, പെർഫോമൻസ് വേരിയന്റുകൾ യഥാക്രമം 629 കിലോമീറ്ററും 528 കിലോമീറ്ററും അവകാശപ്പെടുന്ന ഡബ്ല്യുഎൽടിപി റേഞ്ച് വാഗ്ദാനം ചെയ്യുന്നു. ഈ രണ്ട് വേരിയന്റുകളും 250kW വരെ ഡിസി ഫാസ്റ്റ് ചാർജർ ഉപയോഗിച്ച് ചാർജ് ചെയ്യാൻ കഴിയും.

ടെസ്‌ല മോഡൽ 3 ന് വെറും 0.219 സിഡി ഡ്രാഗ് കോഫിഫിഷ്യന്റ് മാത്രമേയുള്ളൂ. അതിനാൽ ഇത് ഏറ്റവും എയറോഡൈനാമിക് പ്രൊഡക്ഷൻ കാറുകളിൽ ഒന്നായി മാറുന്നു. പരമ്പരാഗത കാറുകളിൽ നിന്ന് വ്യത്യസ്തമായി, ഈ ഇലക്ട്രിക് സെഡാന് സ്റ്റാർട്ട്/സ്റ്റോപ്പ് ബട്ടൺ ഇല്ല. പകരം, നിങ്ങൾ ഒരു ഫോണോ കീ കാർഡോ ഉപയോഗിച്ച് ഡ്രൈവർ സീറ്റിൽ ഇരുന്ന് ബ്രേക്ക് അമർത്തിയാൽ അത് ചലിക്കാൻ തുടങ്ങും. അത്യാധുനിക ഇൻഫോടെയ്ൻമെന്റ് സിസ്റ്റം, ഒരു വലിയ പനോരമിക് ഗ്ലാസ് റൂഫ്, ഒരു ബിൽറ്റ്-ഇൻ ഡാഷ്‌ക്യാം, ഒടിഎ അപ്‌ഡേറ്റുകൾ, ഓട്ടോപൈലറ്റ്, പൂർണ്ണ സെൽഫ് ഡ്രൈവിംഗ് ശേഷി, 17-സീപ്പറുകളും 2 സബ്‌വൂഫറുകളും ഉള്ള ഒരു പ്രീമിയം സൗണ്ട് സിസ്റ്റം, 8-ഇഞ്ച് പിൻ സീറ്റ് എന്റർടൈൻമെന്റ് ഡിസ്‌പ്ലേ, നാവിഗേഷൻ, മീഡിയ, ക്ലൈമറ്റ് സെറ്റിംഗ്‌സ്, വാഹന കോൺഫിഗറേഷനുകൾ എന്നിവയ്‌ക്കായി 15.3 ഇഞ്ച് ടച്ച്‌സ്‌ക്രീൻ എന്നിവയും അതിലേറെയും ഇതിന്റെ മറ്റ് പ്രധാന സവിശേഷതകളിൽ ഉൾപ്പെടുന്നു. 

ടെസ്‌ല മോഡൽ എസ്
ടെസ്‌ല മോഡൽ എസ് രണ്ട് വേരിയന്റുകളിലാണ് വരുന്നത്. ഇവ രണ്ടിലും 100kWh ബാറ്ററി പായ്ക്കുകൾ വീതം ലഭിക്കുന്നു. ആദ്യത്തേത് പരമാവധി 670 bhp പവറും 1,020 Nm ടോർക്കും ഉത്പാദിപ്പിക്കുമ്പോൾ, രണ്ടാമത്തേത് 1,020 bhp പവറും 1,420 Nm ടോർക്കും വാഗ്ദാനം ചെയ്യുന്നു. ലോംഗ് റേഞ്ച്, പ്ലെയ്ഡ് വേരിയന്റുകൾ യഥാക്രമം ഏകദേശം 652 കിലോമീറ്ററും 637 കിലോമീറ്ററും അവകാശപ്പെടുന്ന റേഞ്ച് നൽകുന്നു. 250kW വരെ ഡിസി ഫാസ്റ്റ് ചാർജിംഗ് വഴി മോഡൽ S 15 മിനിറ്റിനുള്ളിൽ ഏകദേശം 322 കിലോമീറ്റർ റേഞ്ച് ചാർജ് ചെയ്യാൻ കഴിയും. 300 മൈലിലധികം റേഞ്ചുള്ള ആദ്യത്തെ വൻതോതിൽ ഉൽപ്പാദിപ്പിക്കുന്ന ഇലക്ട്രിക് കാറായിരുന്നു ഇത്.

12.3 ഇഞ്ച് ഫുള്ളി ഡിജിറ്റൽ എൽസിഡി, തിരശ്ചീനമായി സ്ഥാപിച്ചിരിക്കുന്ന 17 ഇഞ്ച് മൾട്ടി-ടച്ച് ഡിസ്‌പ്ലേ, 12-വേ ഇലക്ട്രിക്കലി അഡ്‍ജസ്റ്റ് ചെയ്യാവുന്ന, മെമ്മറി ഫംഗ്‌ഷനോടുകൂടിയ ഹീറ്റഡ് ഫ്രണ്ട് സീറ്റുകൾ, 60:40 സ്പ്ലിറ്റ് ഫോൾഡബിൾ പിൻ സീറ്റുകൾ, പ്രീമിയം സൗണ്ട് സിസ്റ്റം, എച്ച്ഇപിഎ ഫിൽട്രേഷനോടുകൂടിയ അഡ്വാൻസ്‍ഡ് എച്ച്‍വിഎസി സിസ്റ്റം, ഓട്ടോപൈലറ്റ്, ഫുൾ സെൽഫ് ഡ്രൈവിംഗ് (FSD) ശേഷി, ഒടിഎ അപ്‌ഡേറ്റുകൾ, പനോരമിക് ഗ്ലാസ് റൂഫ് തുടങ്ങിയ നിരവധി നൂതന സവിശേഷതകൾ ഈ ടെസ്‌ല ഇവിയിൽ ലഭിക്കുന്നു.