ഒച്ചയില്ലാതെ ഇന്നോവ പിന്നാലെ എത്തിയാൽ നോ ടെൻഷൻ, ഇനി പേടി വേണ്ട, 'അപകട സൈറൺ' റെഡി!

ടൊയോട്ട ഇന്നോവ ഹൈക്രോസ് ഹൈബ്രിഡിൽ കാൽനടയാത്രക്കാരുടെ സുരക്ഷയ്ക്കായി അക്കൗസ്റ്റിക് വെഹിക്കിൾ അലാറം സിസ്റ്റം (AVAS) അവതരിപ്പിച്ചു. കുറഞ്ഞ വേഗതയിൽ നിശബ്ദമായി പോകുമ്പോൾ കാൽനടയാത്രക്കാർക്ക് വാഹനം അടുത്തുവരുന്നത് AVAS മുന്നറിയിപ്പ് നൽകുന്നു.

ഇലക്ട്രിക് വാഹനങ്ങളും സ്‍ട്രോംഗ് ഹൈബ്രിഡുകളും പ്ലഗ്-ഇൻ ഹൈബ്രിഡ് വാഹനങ്ങളുമൊക്കെ ശബ്‍ദമില്ലാതെ പ്രവർത്തിക്കാനുള്ള കഴിവിന് പേരുകേട്ടവയാണ്. എന്നാൽ അവ കാൽനടയാത്രക്കാർക്ക് സുരക്ഷാ അപകടസാധ്യതകൾ സൃഷ്‍ടിക്കുന്നു. ഈ പ്രശ്‍നം പരിഹരിക്കുന്നതിന്, പല ആധുനിക കാറുകളിലും ഒരു അക്കൗസ്റ്റിക് വെഹിക്കിൾ അലാറം സിസ്റ്റം (AVAS) സജ്ജീകരിച്ചിരിക്കുന്നു. ഇപ്പോഴിതാ, ഈ സവിശേഷത ടൊയോട്ട തങ്ങളുടെ ഏറ്റവും കൂടുതൽ വിറ്റഴിക്കപ്പെടുന്ന ഇന്നോവ ഹൈക്രോസ് ഹൈബ്രിഡിൽ നൽകിയിരിക്കുന്നു.  പ്രത്യേകിച്ച് കാർ കുറഞ്ഞ വേഗതയിൽ നിശബ്‍ദമായി നീങ്ങുന്നിടത്ത് ഈ ഫീച്ചർ തുണയാകും. വാഹനം അടുത്തുവരുന്നുവെന്ന് കാൽനടയാത്രക്കാർക്ക് മുന്നറിയിപ്പ് നൽകുന്ന തരത്തിലാണ് ഈ സംവിധാനം വികസിപ്പിച്ചിരിക്കുന്നത്.

ടൊയോട്ട ഇന്നോവ ഹൈക്രോസ് പോലുള്ള ഇലക്ട്രിക്, ഹൈബ്രിഡ് കാറുകൾ നിശബ്‍ദമാണ്, പ്രത്യേകിച്ച് കുറഞ്ഞ വേഗതയിൽ ഇലക്ട്രിക് മോഡിൽ വാഹനമോടിക്കുമ്പോൾ. ഈ നിശബ്‍ദത അതിനകത്ത് സഞ്ചരിക്കുന്ന യാത്രക്കാർക്ക് സുഖമായിരിക്കാം. എന്നാൽ അടുത്തുവരുന്ന വാഹനത്തിന്റെ ശബ്‍ദം കേൾക്കാൻ കഴിയാത്ത ചുറ്റുമുള്ള കാൽനടയാത്രക്കാർക്ക് ഇത് അപകടകരമാണ്. ജീവിതത്തിന്റെ ഭൂരിഭാഗവും ഐസിഇ കാറുകൾക്കിടയിൽ ജീവിച്ചതിനാൽ, കാൽനടയാത്രക്കാർക്ക് പെട്രോൾ, ഡീസൽ എഞ്ചിനുകളുടെ ശബ്‍ദം ചിരപരിചിതമായിരിക്കും. ഈ ശബ്‍ദം ഒരു സ്വാഭാവിക മുന്നറിയിപ്പ് സംവിധാനമായി പ്രവർത്തിക്കുന്നു. അത് വാഴിയാത്രികരെ ജാഗ്രത പാലിക്കാൻ മുന്നറിയിപ്പ് നൽകുന്നു. എന്നാൽ ഇവികളും, ശക്തമായ ഹൈബ്രിഡുകളും പ്ലഗ് ഇൻ ഹൈബ്രിഡുകളുമൊക്കെ നിശബ്‍ദമായി പ്രവർത്തിക്കുന്നതിനാൽ, കാൽനടയാത്രക്കാർ അവരുടെ ചുറ്റുപാടുകളെ തെറ്റായി വിലയിരുത്തിയേക്കാം. എഞ്ചിൻ ശബ്‍ദത്തെ അടിസ്ഥാനമാക്കി റോഡ് സാഹചര്യങ്ങൾ വ്യാഖ്യാനിക്കാൻ പരിശീലിപ്പിക്കപ്പെട്ട തലച്ചോറിന്, സമീപിക്കുന്ന വാഹനങ്ങളെ തിരിച്ചറിയാൻ കഴിഞ്ഞേക്കില്ല. ഇത് അപകടങ്ങൾക്ക് കാരണമാകും. 

എന്നാൽ ഈ അക്കൗസ്റ്റിക് വെഹിക്കിൾ അലാറം സിസ്റ്റം (AVAS) ഈ സിസ്റ്റത്തിന് ഒരു മുന്നറിയിപ്പ് ടോൺ ഉണ്ട്. അത് കാൽനടയാത്രക്കാർക്കും ചുറ്റുമുള്ള ഡ്രൈവർമാർക്കും അടുത്തുവരുന്ന വാഹനത്തെക്കുറിച്ച് മുന്നറിയിപ്പ് നൽകുന്നു. കാൽനടയാത്രക്കാർക്ക് കേൾക്കാൻ കഴിയുന്നത്ര ഉച്ചത്തിലുള്ള ശബ്‍ദം സൃഷ്ടിച്ചാണ് ഈ സാങ്കേതികവിദ്യ പ്രവർത്തിക്കുന്നത്. മോഡലിനെ ആശ്രയിച്ച് ഈ ഫീച്ചറിന് സിന്തറ്റിക് എഞ്ചിൻ പോലുള്ള ശബ്‍ദം, സോഫ്റ്റ്-സ്പേസ്ഷിപ്പ് പോലുള്ള ടോൺ അല്ലെങ്കിൽ ഫ്യൂച്ചറിസ്റ്റിക് ഹം അല്ലെങ്കിൽ വിറിംഗ് നോയിസ് എന്നിങ്ങനെ വിവിധ ഫോർമാറ്റുകൾ ഉണ്ടായിരിക്കും.

എവിഎഎസ് ഘടിപ്പിച്ച ആധുനിക കാറുകളുടെ പട്ടികയിൽ ഇന്നോവ ഹൈക്രോസ് ഹൈബ്രിഡ് ഏറ്റവും പുതിയതാണ്. ഇന്നോവ ഹൈക്രോസിന്റെ ശക്തമായ ഹൈബ്രിഡ് വകഭേദങ്ങൾക്ക് പരിമിതമായ സമയത്തേക്ക് ഇലക്ട്രിക്ക് മോഡിൽ സഞ്ചരിക്കാൻ കഴിയും. കാൽനടയാത്രക്കാർക്ക് അപകടസാധ്യത കൂടുതലുള്ള സമയമാണിത്. എവിഎഎസ്  ഉള്ളതിനാൽ, കാൽനട സുരക്ഷ കൈകാര്യം ചെയ്യാൻ ഇന്നോവ ഹൈക്രോസ് കൂടുതൽ സജ്ജമാണ്.  ഇന്നോവ ഹൈക്രോസിന്റെ ഹൈബ്രിഡ് വേരിയന്റുകളായ VX, VX(O), ZX, ZX(O) എന്നിവയിലാണ് ഇപ്പോൾ ഈ സവിശേഷത വാഗ്ദാനം ചെയ്യുന്നത്. മാരുതി സുസുക്കി അവരുടെ ഗ്രാൻഡ് വിറ്റാരയിലും ഈ സവിശേഷത വാഗ്ദാനം ചെയ്യുന്നു. കൂടാതെ റീ ബാഡ്‍ജ് ചെയ്‍ത ഇന്നോവ ഹൈക്രോസായ മാരുതി ഇൻവിക്ടോയിലും ഇത് വാഗ്ദാനം ചെയ്യും .

അതേസമയം പുതിയ ടൊയോട്ട ഇന്നോവ ഹൈക്രോസ് ഹൈബ്രിഡിലെ മറ്റെല്ലാം ഫീച്ചറുകളും മാറ്റമില്ലാതെ തുടരുന്നു. ഇന്നോവ ഹൈക്രോസിന് 10.1 ഇഞ്ച് സ്‌ക്രീൻ, 7 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ, ഡ്യുവൽ-സോൺ എയർകണ്ടീഷണർ എന്നിവയുണ്ട്. മുൻ സീറ്റുകൾ വെന്‍റിലേറ്റഡ് സീറ്റുകളാണ്. കൂടാതെ വാഹനത്തിൽ പനോരമിക് സൺറൂഫും വയർലെസ് മൊബൈൽ ചാർജിംഗും ഉണ്ട്. സുരക്ഷയ്ക്കായി ടൊയോട്ട ഇന്നോവ ഹൈക്രോസിൽ 6 എയർബാഗുകൾ, ടയർ പ്രഷർ മോണിറ്ററിംഗ് സിസ്റ്റം (TPMS), 360-ഡിഗ്രി ക്യാമറ എന്നിവയുണ്ട്. കാറിൽ ഫ്രണ്ട്, റിയർ പാർക്കിംഗ് സെൻസറുകൾ, ലെയ്ൻ-കീപ്പ് അസിസ്റ്റ്, ലെയ്ൻ-ഡിപ്പാർച്ചർ വാണിംഗ്, അഡാപ്റ്റീവ് ക്രൂയിസ് കൺട്രോൾ, ഓട്ടോ-എമർജൻസി ബ്രേക്കിംഗ് എന്നിവ ഉൾപ്പെടുന്ന അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റങ്ങൾ (ADAS) എന്നിവയും ഉണ്ട്.

ടൊയോട്ട ഇന്നോവ ഹൈക്രോസിന് രണ്ട് എഞ്ചിൻ ഓപ്ഷനുകളുണ്ട്. ആദ്യത്തേത് 2.0 ലിറ്റർ നാച്ചുറലി ആസ്പിറേറ്റഡ് ഗ്യാസോലിൻ എഞ്ചിനാണ്. രണ്ടാമത്തേത് 2.0 ലിറ്റർ പവർ-ഹൈബ്രിഡ് ഗ്യാസോലിൻ എഞ്ചിനാണ്. ഹൈബ്രിഡ് എഞ്ചിൻ 183.45 bhp പവറും 188 Nm ടോർക്കും നൽകുന്നു. നോൺ-ഹൈബ്രിഡ് എഞ്ചിൻ 172.60 bhp പവറും 209 Nm ടോർക്കും നൽകുന്നു. രണ്ട് മോഡലുകൾക്കും വ്യത്യസ്ത തരം ട്രാൻസ്മിഷനുകളുണ്ട്.പെട്രോൾ കാറിന് സിവിടി ട്രാൻസ്‍മിൽൻ ഉണ്ട്. അതേസമയം ഹൈബ്രിഡ് മോഡലിന് ഇ-സിവിടി ട്രാൻസ്‍മിഷൻ ഉണ്ട്. ഇന്നോവ ഹൈക്രോസിന്റെ ഹൈബ്രിഡ് പതിപ്പിന് 23.24 കിലോമീറ്റർ ഇന്ധനക്ഷമതയുണ്ടെന്നും മറ്റ് കാറുകളെ അപേക്ഷിച്ച് ഇന്ധനക്ഷമത കൂടുതലാണെന്നും ടൊയോട്ട പറയുന്നു.

ടൊയോട്ട ഇന്നോവ ഹൈക്രോസ് ഹൈബ്രിഡിന്റെ എക്സ്-ഷോറൂം വില 19.94 ലക്ഷം മുതൽ 31.24 ലക്ഷം രൂപ വരെയാണ്. മാരുതി സസുക്കി ഇൻവിക്റ്റോ,  ടൊയോട്ട ഇന്നോവ ക്രിസ്റ്റ , കിയ കാരെൻസ് തുടങ്ങിയ മോഡലുകൾക്കെതിരെയാണ് ഈ ടൊയോട്ട കാർ മത്സരിക്കുന്നത്.