വില കുറഞ്ഞ മിനി ഫോർച്യൂണർ, താങ്ങാവുന്ന വിലയുള്ള ടൊയോട്ട ഫോർച്യൂണറിന്‍റെ ലോഞ്ച് നീട്ടി ടൊയോട്ട

ടൊയോട്ടയുടെ പുതിയ ലാൻഡ് ക്രൂയിസർ എസ്‌യുവി 2026 ന്റെ ആദ്യ പകുതിയിൽ ലോഞ്ച് ചെയ്യും. IMV 0 പ്ലാറ്റ്‌ഫോമിൽ അധിഷ്ഠിതമായ ഈ എസ്‌യുവി 2.7 ലിറ്റർ പെട്രോൾ എഞ്ചിനിൽ ലഭ്യമാകും.

അന്താരാഷ്ട്ര വിപണികൾക്കായി ടൊയോട്ട ഒരു പുതിയ ഇടത്തരം എസ്‌യുവി ഒരുക്കുന്നതായി നേരത്തെ റിപ്പോർട്ടുകൾ വന്നിരുന്നു. ഇത് ലാൻഡ് ക്രൂയിസർ എന്ന പേരിൽ വരുമെന്നായിരുന്നു റിപ്പോർട്ടുകൾ. 2025 അവസാനത്തോടെ ഈ മിനി ഫോർച്യൂണർ വപിണയിൽ എത്തുമെന്ന് പ്രതീക്ഷിച്ചിരുന്നെങ്കിലും, ടൊയോട്ട അതിന്റെ വരാനിരിക്കുന്ന എസ്‌യുവിയുടെ ലോഞ്ച് സമയപരിധി നീട്ടിവെച്ചതായിട്ടാണ് പുതിയ റിപ്പോർട്ടുകൾ. 2026 ന്റെ ആദ്യ പകുതിയിൽ ലാൻഡ് ക്രൂയിസർ എഫ്‍ജെ ഔദ്യോഗികമായി അനാച്ഛാദനം ചെയ്യും. ഇതിനുശേഷം മാത്രമേ ഇത് വിപണിയിൽ എത്തുകയുള്ളൂ. വരാനിരിക്കുന്ന ലാൻഡ് ക്രൂയിസർ എഫ്ജെയുടെ ഇന്ത്യയിലെ വരവ് സംബന്ധിച്ച് സ്ഥിരീകരണമൊന്നുമില്ല. എങ്കിലും, എസ്‌യുവികളുടെ വളർന്നുവരുന്ന ഡിമാൻഡ് കണക്കിലെടുക്കുമ്പോൾ, കമ്പനി ഇത് ഇന്ത്യയിൽ അവതരിപ്പിച്ചേക്കാം.

2023-ൽ ടൊയോട്ട പങ്കിട്ട ഒരു ടീസറിലാണ് ഈ എസ്‌യുവി ആദ്യമായി പ്രദർശിപ്പിച്ചത്. ലാൻഡ് ക്രൂയിസർ നിരയിലെ ഏറ്റവും ചെറിയ മോഡലായി ഇത് അവതരിപ്പിക്കപ്പെട്ടു, ഫ്ലാഗ്ഷിപ്പ് LC300, LC250 (പ്രാഡോ), ക്ലാസിക് 70 സീരീസ് എന്നിവയ്‌ക്കൊപ്പം നിൽക്കുന്നു. പിന്നീട് കമ്പനി ലാൻഡ് ക്രൂയിസർ എഫ്ജെ എന്ന പേരിനായുള്ള ഒരു വ്യാപാരമുദ്ര ഫയൽ ചെയ്തു. ഇത് എഫ്ജെ എന്ന പേര് ഉൾപ്പെടുത്താനുള്ള സാധ്യതയെക്കുറിച്ചുള്ള അഭ്യൂഹങ്ങൾക്ക് കാരണമായി.

വരാനിരിക്കുന്ന ഇടത്തരം എസ്‌യുവി ഒരു ലാഡർ-ഫ്രെയിം ഷാസിയെ അടിസ്ഥാനമാക്കിയുള്ളതായിരിക്കും. IMV 0 പ്ലാറ്റ്‌ഫോമിനെ അടിസ്ഥാനമാക്കിയുള്ളതായിരിക്കും ഇതെന്നും റിപ്പോർട്ടുകൾ ഉണ്ട്. ചില ആഗോള വിപണികളിൽ വിൽക്കുന്ന ടൊയോട്ട ഹിലക്സ് ചാമ്പും ഇതേ പ്ലാറ്റ്‌ഫോമിൽ തന്നെയാണ് നിർമ്മിക്കുന്നത്. ചെലവ് ലാഭിക്കുന്നതിനായി, ലാൻഡ് ക്രൂയിസർ 250, 300 സീരീസുകളിൽ ഉപയോഗിക്കുന്ന ടിഎൻജിഎ-എഫ് പ്ലാറ്റ്‌ഫോം എഫ്‍ജെ മോഡലിൽ നിന്ന് ഒഴിവാക്കും.

ലാൻഡ് ക്രൂയിസർ എഫ്‌ജെയിൽ 161 ബിഎച്ച്പി കരുത്തും 246 എൻഎം പീക്ക് ടോർക്കും ഉത്പാദിപ്പിക്കുന്ന 2.7 ലിറ്റർ 2TR-FE ഫോർ-സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിൻ ലഭിക്കാൻ സാധ്യതയുണ്ട്. ഈ എഞ്ചിൻ 6-സ്പീഡ് ഓട്ടോമാറ്റിക് ഗിയർബോക്സുമായി ഇണക്കിയിരിക്കുന്നു, ഇത് 4-വീൽ-ഡ്രൈവ് സിസ്റ്റം വഴി നാല് ചക്രങ്ങളിലേക്കും പവർ അയയ്ക്കുന്നു. ഇതിനുപുറമെ, തിരഞ്ഞെടുത്ത വിപണികളിൽ ടൊയോട്ട ഒരു ഹൈബ്രിഡ് പവർട്രെയിൻ ഓപ്ഷനും വാഗ്ദാനം ചെയ്തേക്കാം.

നിലവിൽ, ഈ എസ്‌യുവിയുടെ രൂപകൽപ്പന രഹസ്യമായി സൂക്ഷിച്ചിരിക്കുന്നു. ഒരൊറ്റ ടീസർ ഇമേജ് മാത്രമേ ഇതുവരെ പുറത്തുവന്നിട്ടുള്ളൂ. ഇതിനെ അടിസ്ഥാനമാക്കിയുള്ള റെൻഡറുകൾ നേരായതും ബോക്‌സിയുമായ ഒരു നിലപാട്, ആധുനിക ലൈറ്റിംഗ് സജ്ജീകരണം, ഉയർന്ന ഗ്രൗണ്ട് ക്ലിയറൻസ്, കട്ടിയുള്ള ടയറുകൾ, ടെയിൽഗേറ്റിൽ ഘടിപ്പിച്ചിരിക്കുന്ന ഒരു സ്പെയർ വീൽ എന്നിവ എടുത്തുകാണിക്കുന്നു. അളവുകളുടെ കാര്യത്തിൽ, ടൊയോട്ട ലാൻഡ് ക്രൂയിസർ FJ-ക്ക് ഏകദേശം 4.5 മീറ്റർ നീളവും 2,750 mm വീൽബേസും ഉണ്ടായിരിക്കും എന്നാണ് റിപ്പോർട്ടുകൾ. വിപണിയിൽ ഫോർച്യൂണറിന് താഴെയായിരിക്കും ഈ എസ്‌യുവിയുടെ സ്ഥാനം.