Toyota : 2025 ഓടെ സോളിഡ്-സ്റ്റേറ്റ് ബാറ്ററികൾ അവതരിപ്പിക്കാൻ ടൊയോട്ട

2025 മുതൽ പ്രൊഡക്ഷൻ കാറുകളിൽ വിപ്ലവകരമായ ബാറ്ററി സാങ്കേതികവിദ്യ ഉപയോഗിക്കാൻ കമ്പനി പദ്ധതിയിടുന്നതായി ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നു. 

ജാപ്പനീസ് (Japanese) വാഹന നിര്‍മ്മാണ കമ്പനിയായ ടൊയോട്ട (Toyota) തങ്ങളുടെ ഹൈബ്രിഡ് (Hybrid) വാഹനങ്ങളിൽ സോളിഡ്-സ്റ്റേറ്റ് ബാറ്ററികൾ (Solid State Batteries) വിന്യസിക്കാന്‍ തയ്യാറെടുക്കുന്നതായി റിപ്പോര്‍ട്ട്. ഏകദേശം 2025 മുതൽ പ്രൊഡക്ഷൻ കാറുകളിൽ വിപ്ലവകരമായ ബാറ്ററി സാങ്കേതികവിദ്യ ഉപയോഗിക്കാൻ കമ്പനി പദ്ധതിയിടുന്നതായി ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നു. 

ലിഥിയം-അയൺ ബാറ്ററികളിൽ ഉപയോഗിക്കുന്ന ലിക്വിഡ് ഇലക്‌ട്രോലൈറ്റ് ലായനിക്ക് പകരം സോളിഡ്-സ്റ്റേറ്റ് ബാറ്ററികളില്‍ സോളിഡ് ഇലക്‌ട്രോലൈറ്റാണ് ഉപയോഗിക്കുന്നത് എന്നതാണ് പ്രത്യേകത. ടൊയോട്ടയുടെ വൈദ്യുതീകരണ തന്ത്രത്തിൽ ഹൈബ്രിഡുകൾ ഒരു പ്രധാന പങ്ക് വഹിക്കുമെന്ന് കമ്പനിയുടെ പവർട്രെയിൻ മേധാവി തീബോൾട്ട് പാക്വെറ്റ് ഓട്ടോകാർ യുകെയോട് പറഞ്ഞു. സോളിഡ്-സ്റ്റേറ്റ് സാങ്കേതികവിദ്യയുടെ നേട്ടങ്ങളെക്കുറിച്ച് സംസാരിക്കുകയായിരുന്നു അദ്ദേഹം. വേഗത്തിലുള്ള ചാർജിംഗ്, വേഗത്തിൽ ഡിസ്‍ചാർജ് ചെയ്യൽ, കുറഞ്ഞ ചൂട് ഉൽപാദനം എന്നിവ ഈ സാങ്കേതികവിദ്യയുടെ നേട്ടങ്ങളില്‍ ഉൾപ്പെടുന്നതായി അദ്ദേഹം പറഞ്ഞു. കുറഞ്ഞ ഇവി-ഇന്റൻസീവ് ഹൈബ്രിഡ് ആപ്ലിക്കേഷനുകളിൽ പരിഷ്‍കരിക്കുമെന്ന് അദ്ദേഹം കൂട്ടിച്ചേർത്തു. വരും വർഷങ്ങളിൽ ഹൈബ്രിഡ് സാങ്കേതികവിദ്യയോടുള്ള പ്രതിബദ്ധത ടൊയോട്ട ശക്തിപ്പെടുത്തുന്ന സാഹചര്യത്തിലാണ് ഈ നീക്കം.

ടൊയോട്ടയും ലെക്സസും ഈ വർഷം പടിഞ്ഞാറൻ യൂറോപ്പിൽ 70 ശതമാനം വില്‍പ്പന കൈവരിക്കുമെന്നും ഹൈബ്രിഡ് പവർട്രെയിനുകൾ രണ്ട് ബ്രാൻഡുകളിലേക്കും പുതിയ ഉപഭോക്താക്കളെ ആകർഷിക്കുന്നത് തുടരുമെന്നും ടൊയോട്ട യൂറോപ്യൻ മേധാവി മാറ്റ് ഹാരിസൺ വിശദീകരിച്ചു. 

ഉയർന്ന ഉൽപ്പാദനം, ദൈർഘ്യമേറിയ റേഞ്ച്, കുറഞ്ഞ ചാർജിംഗ് സമയം എന്നിവ നൽകാനുള്ള പദ്ധതികളോടെ ടൊയോട്ട ഈ ദശാബ്‍ദത്തിന്റെ മധ്യത്തോടെ സോളിഡ്-സ്റ്റേറ്റ് ബാറ്ററികളുള്ള കാറുകൾ വിൽക്കാൻ തുടങ്ങുമെന്ന് യൂറോപ്യൻ ഗവേഷണ വികസന മേധാവി ജെറാൾഡ് കിൽമാൻ പറഞ്ഞു. ഡ്യൂറബിലിറ്റിയെ കേന്ദ്രീകരിച്ച് നടന്നുകൊണ്ടിരിക്കുന്ന ഒരു വികസന പരിപാടിയോടെ, പരീക്ഷണ ആവശ്യങ്ങൾക്കായി ഒരു പ്രോട്ടോടൈപ്പ് വാഹനം നിർമ്മിച്ചതായും അദ്ദേഹം സ്ഥിരീകരിച്ചു. സോളിഡ്-സ്റ്റേറ്റ് ബാറ്ററികൾക്ക് വലിയ സാധ്യതയുണ്ടെന്ന് കമ്പനി വിശ്വസിക്കുന്നുവെന്നും  ജെറാൾഡ് കിൽമാൻ കൂട്ടിച്ചേർത്തു.

ഇന്ത്യയിൽ നിലവിൽ ഗ്ലാൻസ ഹാച്ച്ബാക്ക്, അർബൻ ക്രൂയിസർ കോംപാക്ട് എസ്‌യുവി, ഇന്നോവ ക്രിസ്റ്റ എംപിവി, ഫോർച്യൂണർ എസ്‌യുവി, കാംറി ഹൈബ്രിഡ് സെഡാൻ, വെൽഫയർ ലക്ഷ്വറി എംപിവി എന്നിവയാണ് ടൊയോട്ട വിൽക്കുന്നത്. വരാനിരിക്കുന്ന ലോഞ്ചുകളുടെ കാര്യം പരിശോധിച്ചാല്‍ ടൊയോട്ട 2022 ജനുവരിയിൽ ഇന്ത്യയിൽ ഹിലക്സ് പിക്കപ്പ് അവതരിപ്പിക്കും.