75ാം വാര്‍ഷികം; സ്‍പെഷ്യല്‍ എഡിഷനുമായി വെസ്‍പ

വെസ്പയുടെ 75 വർഷക്കാലത്തെ ചരിത്രം പറയും വിധത്തിലാണ് 75ാമത് ആനിവേഴ്സറി എഡിഷൻ മോഡൽ തയ്യാറാക്കിയിരിക്കുന്നത്. 

ഈ വർഷം തങ്ങളുടെ 75-ാം വാർഷികം ആഘോഷിക്കുകയാണ് ഐക്കണിക്ക് ഇറ്റാലിയൻ സ്‍കൂട്ടർ ബ്രാൻഡായ വെസ്‍പ. ആഘോഷങ്ങൾക്ക് മാറ്റേകാന്‍ ഒരു സ്പെഷ്യൽ എഡിഷൻ സ്‍കൂട്ടറിനെ വിപണിയില്‍ എത്തിച്ചിരിക്കുകയാണ് കമ്പനി എന്ന് ഇന്ത്യാ ടുഡേ റിപ്പോര്‍ട്ട് ചെയ്യുന്നു. വെസ്‍പ 75ത് ആനിവേഴ്‍സറി എഡിഷൻ എന്ന് പേരിട്ടിരിക്കുന്ന പുത്തൻ സ്‍കൂട്ടർ 125 സിസി എൻജിനിലും 150 സിസി എൻജിനിലും വാങ്ങാം.

വെസ്പയുടെ 75 വർഷക്കാലത്തെ ചരിത്രം പറയും വിധത്തിലാണ് 75ാമത് ആനിവേഴ്സറി എഡിഷൻ മോഡൽ തയ്യാറാക്കിയിരിക്കുന്നത്. സ്പെഷ്യൽ എഡിഷൻ മോഡലിന്റെ ഹൈലൈറ്റായ ഗ്ലോസി മെറ്റാലിക് ജിയല്ലോ നിറം 1940-കളിലെ വെസ്പ സ്കൂട്ടറുകളിലെ പ്രശസ്തമായ മഞ്ഞ നിറത്തിൽ നിന്നും പ്രചോദനം ഉൾക്കൊണ്ടാണ്. ഈ നിറത്തിൽ നല്ലവണ്ണം പ്രതിഫലിക്കും വിധം സൈഡ് പാനലുകളിൽ '75' എന്നെഴുതിയ സ്റ്റിക്കറിംഗ് ഉൾപെടുത്തിയിട്ടുണ്ട്. മുൻപിലെ മഡ്ഗാർഡിന് മാറ്റ് മെറ്റാലിക് പൈറൈറ്റ് നിറത്തിൽ 75 ബാഡ്ജ് നൽകിയിരിക്കുന്നു.

ഡാർക്ക് സ്‌മോക്ക് ഗ്രേ നിറത്തിൽ നോബുക് ലെതറിൽ പൊതിഞ്ഞിരിക്കുന്ന സീറ്റുകളാണ് മറ്റൊരു ആകർഷണം. ഇതേ ലെതത്തിൽ വൃത്താകൃതിയിൽ ഒരു ബാഗും പുറകിൽ ക്രമീകരിച്ചിട്ടുണ്ട്. ഒറ്റനോട്ടത്തിൽ സ്പെയർ വീൽ ലെതറിൽ പൊതിഞ്ഞു ഘടിപ്പിച്ചതുപോലെയാണ് ഇത് ദൃശ്യമാവുക. പ്രത്യേകം തയ്യാറാക്കിയ ഫ്ലൈ സ്ക്രീൻ, ഡസ്റ്റ് ഗ്രേ നിറത്തിൽ 12-ഇഞ്ച് മെഷീൻഡ് അലോയ് വീലുകൾ എന്നിവയാണ് മറ്റുള്ള പ്രത്യേകതകൾ.  ഹെഡ്‌ലാമ്പ് ബെസൽ, റിയർവ്യൂ മിററുകൾ, ഗ്രാബ് റെയിൽ, എക്‌സ്‌ഹോസ്റ്റ് കവർ എന്നിവിടങ്ങളിൽ ക്രോം കവറിങ് നൽകിയിട്ടുണ്ട്. വെൽക്കം കിറ്റിന്റെ ഭാഗമായ ഈ ബാഗിൽ ബ്രാൻഡിന്റെ ചരിത്രം വിവരിക്കുന്ന പോസ്റ്റ് കാർഡുകളിലൂടെയും വിന്റേജ് വെസ്പ മെർക്കന്റൈസും ഉൾപെടുത്തിയിട്ടുണ്ട്.

നിലവിലെ വെസ്‍പ സ്‍കൂട്ടറുകളിലെ അതേ 150 സിസി എൻജിനും  125 സിസി എൻജിനും തന്നെയാണ് വെസ്പ 75ത് ആനിവേഴ്സറി എഡിഷൻ സ്കൂട്ടറിന്‍റെയും ഹൃദയം.  125 സിസി എഞ്ചിനുള്ള ആനിവേഴ്സറി എഡിഷൻ പതിപ്പിന് 1.26 ലക്ഷം രൂപയും, 125 സിസി എഞ്ചിനുള്ള പതിപ്പിന് 1.39 ലക്ഷം രൂപയുമാണ് എക്‌സ്-ഷോറൂം വില. രാജ്യത്തെ 190 നഗരങ്ങളിലെ പിയാജിയോയുടെ 275 മോട്ടോപ്ലെക്സ് ഡീലർഷിപ്പുകളിൽ വഴിയും ഓൺലൈൻ ആയും 5000 രൂപയ്ക്ക്  വെസ്പ 75ത് ആനിവേഴ്സറി എഡിഷന്‍ ബുക്ക് ചെയ്യാം.