മോഹവിലയില്‍ പുത്തന്‍ ഹോണ്ട ജാസ്

ജാപ്പനീസ് വാഹന നിര്‍മ്മാതാക്കളായ ഹോണ്ടയുടെ ജാസിന്‍റെ ഫെയ്സ്സ് ലിഫ്റ്റ് പതിപ്പ് ഇന്ത്യന്‍ വിപണിയിലെത്തി. 7.35 ലക്ഷം രൂപ മുതല്‍ 9.29 ലക്ഷം രൂപവരെയാണ് പുതിയ ജാസിന്‍റെ വില.

പുതുക്കിയ ഇന്‍റീരിയറും കൂടുതല്‍ സുരക്ഷാ സംവിധാനങ്ങളുമാണ് പുതിയ വാഹനത്തിന്‍റെ പ്രധാന പ്രത്യേകത. ഇലക്ട്രോണിക് ബ്രേക്ക്ഫോഴ്സ് ഡിസ്ട്രിബ്യൂഷന്‍, ആന്റി – ലോക്ക് ബ്രേക്കിംഗ് സംവിധാനം,  മുന്നിലെ ഇരട്ട എയര്‍ബാഗുകള്‍, എല്‍ഇഡി ടെയില്‍ ലൈറ്റുകള്‍ എന്നിവ കൂടുതല്‍ സുരക്ഷ ഒരുക്കും.

ഉയരം ക്രമീകരിക്കാവുന്ന ഡ്രൈവര്‍ സീറ്റ്, 15 ഇഞ്ച് സ്റ്റീല്‍ വീല്‍, നാലു സ്പീക്കര്‍ ഓഡിയോ സംവിധാനമുള്ള 3.5 ഇഞ്ച് സ്‌ക്രീന്‍, ഓഡിയോ കണ്‍ട്രോള്‍ ബട്ടണുകളുള്ള സ്റ്റീയറിംഗ് വീല്‍, ഓട്ടോമാറ്റിക്ക് മിററുകള്‍, റിയര്‍ പാര്‍ക്കിംഗ് സെന്‍സര്‍, റിയര്‍ ഡിഫോഗര്‍ എന്നിവയെല്ലാം വാഹനത്തെ വേറിട്ടതാക്കുന്നു.

V, VX വകഭേദങ്ങളില്‍ മാത്രമെ ജാസ് പെട്രോള്‍ ലഭ്യമാവുകയുള്ളു. S, V, VX വകഭേദങ്ങള്‍ ജാസ് ഡീസലില്‍ എത്തുന്നുണ്ട്.  1.2 ലിറ്റര്‍ i-VTEC പെട്രോള്‍ എഞ്ചിന്‍ 88 bhp കരുത്തും പരമാവധി 110 Nm torque ഉം സൃഷ്ടിക്കും. അഞ്ചു സ്പീഡ് മാനുവല്‍, സിവിടി ഗിയര്‍ബോക്സ് ഓപ്ഷന്‍ പെട്രോള്‍ പതിപ്പില്‍ ലഭ്യമാണ്.

1.5 ലിറ്റര്‍ i-DTEC എഞ്ചിനാണ് ഡീസല്‍ മോഡലിന്‍റെ ഹൃദയം. ഈ എഞ്ചിന്‍ 98 bhp കരുത്തും 200 Nm torque ഉം സൃഷ്ടിക്കും. ആറു സ്പീഡ് മാനുവല്‍ ഗിയര്‍ബോക്സാണ് ട്രാന്‍സ്‍മിഷന്‍.