പുതിയ ബ്രെസ: ടർബോ എഞ്ചിനും പുതിയ വിലയും

മാരുതി സുസുക്കി 2026 ബ്രെസ ഫെയ്‌സ്‌ലിഫ്റ്റ് ജൂലൈ 24-ന് പുറത്തിറക്കാൻ ഒരുങ്ങുന്നു. പുതിയ 1.0 ലിറ്റർ ടർബോ പെട്രോൾ എഞ്ചിൻ ഉൾപ്പെടെ മൂന്ന് പവർട്രെയിൻ ഓപ്ഷനുകളോടെയാണ് വാഹനം എത്തുന്നത്. വാഹനത്തിന്റെ പ്രതീക്ഷിക്കുന്ന മൈലേജ്, മത്സരാധിഷ്ഠിത വില എന്നിവയെക്കുറിച്ചുള്ള വിവരങ്ങളും ലേഖനത്തിൽ ഉൾപ്പെടുത്തിയിരിക്കുന്നു.

2026 മോഡൽ ബ്രെസ ഫെയ്‌സ്‌ലിഫ്റ്റ് ജൂലൈ 24-ന് വിപണിയിലെത്തിക്കാനൊരുങ്ങി മാരുതി സുസുക്കി. അരീന ഡീലർഷിപ്പുകളിലൂടെ 11,000 രൂപ ടോക്കൺ തുകയ്ക്ക് വാഹനത്തിന്റെ ബുക്കിങ് ഇതിനകം ആരംഭിച്ചു. ഔദ്യോഗികമായി എല്ലാ സവിശേഷതകളും കമ്പനി പുറത്തുവിട്ടിട്ടില്ലെങ്കിലും പുതിയ ബ്രെസ്സയുടെ എഞ്ചിൻ, മൈലേജ്, വില എന്നിവ സംബന്ധിച്ച പ്രധാന വിവരങ്ങൾ പുറത്തുവന്നിട്ടുണ്ട്.

മൂന്ന് എഞ്ചിൻ ഓപ്ഷനുകൾ

2026 ബ്രെസ്സയിൽ മൂന്ന് പവർട്രെയിൻ ഓപ്ഷനുകളാണ് ലഭിക്കുക. പുതിയ 1.0 ലിറ്റർ ബൂസ്റ്റർജെറ്റ് ടർബോ പെട്രോൾ, 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.5 ലിറ്റർ എസ്-സിഎൻജി എന്നിവയാണ് ഉപഭോക്താക്കൾക്ക് തിരഞ്ഞെടുക്കാനാകുക. ഫ്രോങ്ക്സിൽ ഉപയോഗിക്കുന്ന 1.0 ലിറ്റർ ബൂസ്റ്റർജെറ്റ് ടർബോ പെട്രോൾ എഞ്ചിൻ ബ്രെസ്സയിലും എത്തുമെന്നാണ് റിപ്പോർട്ടുകൾ. ഈ എഞ്ചിൻ 100 bhp കരുത്തും 148 Nm ടോർക്കും ഉൽപ്പാദിപ്പിക്കും. പുതിയ 6-സ്പീഡ് മാനുവൽ ഗിയർബോക്സുമായാണ് ഇത് എത്തുക.

അതേസമയം, നിലവിലെ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ 101.6 bhp കരുത്തും 136.8 Nm ടോർക്കും നൽകും. നിലവിലുള്ള എസ്-സിഎൻജി പതിപ്പും തുടരും. ഈ എഞ്ചിൻ 86.7 bhp കരുത്തും 121.5 Nm ടോർക്കുമാണ് ഉൽപ്പാദിപ്പിക്കുന്നത്. പുതിയ ടർബോ പെട്രോൾ എഞ്ചിന്റെ സിഎൻജി പതിപ്പും പിന്നീട് അവതരിപ്പിച്ചേക്കുമെന്ന സൂചനകളുണ്ട്.

മൈലേജ് എത്ര?

നിലവിലെ ബ്രെസ്സയുടെ പെട്രോൾ മാനുവൽ പതിപ്പിന് 19.89 കിലോമീറ്റർ/ലിറ്ററും ഓട്ടോമാറ്റിക് പതിപ്പിന് 19.80 കിലോമീറ്റർ/ലിറ്ററുമാണ് കമ്പനി അവകാശപ്പെടുന്ന ഇന്ധനക്ഷമത. സിഎൻജി മോഡൽ 25.52 കിലോമീറ്റർ/കിലോഗ്രാം വരെ മൈലേജ് നൽകുന്നു. പുതിയ ടർബോ പെട്രോൾ പതിപ്പിന്റെ ഔദ്യോഗിക മൈലേജ് ഇതുവരെ പ്രഖ്യാപിച്ചിട്ടില്ല. എന്നാൽ ഇതേ എഞ്ചിൻ ഉപയോഗിക്കുന്ന ഫ്രോങ്ക്സിൽ മാനുവൽ പതിപ്പിന് 21.50 കിലോമീറ്റർ/ലിറ്ററും ഓട്ടോമാറ്റിക് പതിപ്പിന് 20.01 കിലോമീറ്റർ/ലിറ്ററുമാണ് കമ്പനി അവകാശപ്പെടുന്നത്.

വിലയിൽ മത്സരാധിഷ്‍ഠിത നീക്കം

1.0 ലിറ്റർ ടർബോ പെട്രോൾ എഞ്ചിന് ബാധകമായ ജിഎസ്ടി നിരക്ക് 18 ശതമാനമായതിനാൽ പുതിയ ബ്രെസ്സ ടർബോ പതിപ്പിന് മത്സരാധിഷ്ഠിത വില പ്രഖ്യാപിക്കാൻ മാരുതി സുസുക്കിക്ക് കഴിയുമെന്നാണ് വിലയിരുത്തൽ. അതേസമയം, നാച്ചുറലി ആസ്പിറേറ്റഡ് പെട്രോൾ, സിഎൻജി വകഭേദങ്ങൾക്ക് നേരിയ വിലവർധന ഉണ്ടായേക്കും. നിലവിൽ ബ്രെസ്സയുടെ എക്‌സ്-ഷോറൂം വില 8.26 ലക്ഷം രൂപ മുതൽ 12.86 ലക്ഷം രൂപ വരെയാണ്. പുതിയ ഫെയ്‌സ്‌ലിഫ്റ്റ് പതിപ്പിന്റെ ഔദ്യോഗിക വില ജൂലൈ 24-ന് പ്രഖ്യാപിക്കും.