കുറഞ്ഞ ചെലവിൽ നൂതന സവിശേഷതകൾ! ഹ്യുണ്ടായി എക്‌സ്‌റ്ററിന് രണ്ട് പുതിയ താങ്ങാവുന്ന പതിപ്പുകൾ എത്തി

ഹ്യുണ്ടായി എക്സ്റ്റർ ലൈനപ്പിൽ കൂടുതൽ താങ്ങാനാവുന്ന വിലയുള്ള എസ് സ്മാർട്ട്, എസ് എക്സ് സ്മാർട്ട് എന്നീ വേരിയന്‍റുകൾ അവതരിപ്പിച്ചു. 7.68 ലക്ഷം രൂപ മുതൽ 9.18 ലക്ഷം രൂപ വരെയാണ് വില. പെട്രോൾ, സിഎൻജി പവർട്രെയിൻ ഓപ്ഷനുകളിൽ ലഭ്യമാണ്.

ദക്ഷിണ കൊറിയൻ വാഹന ബ്രാൻഡായ ഹ്യുണ്ടായി മോട്ടോർ ഇന്ത്യ എക്സ്റ്റർ ലൈനപ്പ് കൂടുതൽ വികസിപ്പിച്ചു. എസ് സ്മാർട്ട്, എസ് എക്സ് സ്മാർട്ട് എന്നിങ്ങനെ കൂടുതൽ താങ്ങാവുന്ന വിലയുള്ള രണ്ട് വേരിയന്‍റുകൾ കമ്പനി എക്സ്റ്ററിന് പുതുതായി നൽകി.  7.68 ലക്ഷം രൂപ മുതൽ 9.18 ലക്ഷം രൂപ വരെയാണ് വില. രണ്ട് ട്രിമ്മുകളും 1.2 ലിറ്റർ, 4-സിലിണ്ടർ പെട്രോൾ, സിഎൻജി പവർട്രെയിൻ ഓപ്ഷനുകളിൽ ലഭ്യമാണ്. പെട്രോൾ എഞ്ചിൻ പരമാവധി 83 ബിഎച്ച്പി പവറും 114 എൻഎം ടോർക്കും നൽകുന്നു, അതേസമയം സിഎൻജി പതിപ്പ് 69 ബിഎച്ച്പി പവറും 95.2 എൻഎം ടോർക്കും നൽകുന്നു. ട്രാൻസ്മിഷൻ ഓപ്ഷനുകളിൽ 5-സ്പീഡ് മാനുവലും 5-സ്പീഡ് എഎംടിയും ഉൾപ്പെടുന്നു.

ഹ്യുണ്ടായി എക്‌സ്റ്റർ എസ് സ്മാർട്ട്, എസ് സ്മാർട്ട് എഎംടി, എസ് സ്മാർട്ട് സിഎൻജി എന്നിവയ്ക്ക് യഥാക്രമം 7.69 ലക്ഷം, 8.39 ലക്ഷം, 8.63 ലക്ഷം എന്നിങ്ങനെയാണ് വില. എസ്എക്സ് സ്മാർട്ട് 8.16 ലക്ഷം രൂപയ്ക്ക് ലഭ്യമാണ്, എസ്എക്സ് സ്മാർട്ട് എഎംടി, എസ്എക്സ് സ്മാർട്ട് സിഎൻജി എന്നിവ യഥാക്രമം 8.83 ലക്ഷം, 9.18 ലക്ഷം രൂപയ്ക്ക് ലഭ്യമാണ്. മേൽപ്പറഞ്ഞ എല്ലാ വിലകളും എക്സ്-ഷോറൂം വിലകൾ ആണ്.

ഹ്യുണ്ടായി എക്‌സ്റ്റർ എസ് സ്മാർട്ട്, എസ്‌എക്സ് സ്മാർട്ട് വേരിയന്റുകൾ അവതരിപ്പിച്ചതോടെ സൺറൂഫ് കൂടുതൽ താങ്ങാനാവുന്ന വിലയുള്ളതായി മാറി. എസ് സ്മാർട്ട് വേരിയന്റിൽ റിയർ എസി വെന്റുകൾ, ടയർ പ്രഷർ മോണിറ്ററിംഗ് സിസ്റ്റം, എൽഇഡി ഡിആർഎൽ, എൽഇഡി ടെയിൽലാമ്പുകൾ, 15 ഇഞ്ച് സ്റ്റീൽ വീലുകൾ എന്നിവയും ലഭ്യമാണ്. എസ്‌എക്സ് സ്മാർട്ട് ട്രിമിൽ പ്രൊജക്ടർ ഹെഡ്‌ലാമ്പുകൾ, ഷാർക്ക് ഫിൻ ആന്റിന, പുഷ് ബട്ടൺ സ്റ്റാർട്ട്/സ്റ്റോപ്പ് ഫീച്ചറുള്ള കീലെസ് എൻട്രി, ലെതറെറ്റ് സീറ്റ് അപ്ഹോൾസ്റ്ററി, റിയർ പാർക്കിംഗ് ക്യാമറ എന്നിവയും ലഭ്യമാണ്.

പുതിയ എസ് സ്മാർട്ട്, എസ് എക്സ് സ്മാർട്ട് ട്രിമ്മുകൾക്ക് ഓപ്ഷണൽ സവിശേഷതകളായി വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയുള്ള വലിയ 9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റവും പിൻ ക്യാമറയും ഹ്യുണ്ടായി വാഗ്ദാനം ചെയ്യുന്നു. ഈ ഓപ്ഷണൽ സവിശേഷതകൾക്ക് 14,999 രൂപ അധിക വിലയുണ്ട്. എക്‌സ്‌റ്ററിന്റെ എല്ലാ വകഭേദങ്ങളിലും 8.0 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ലഭ്യമാണ്. കൂടാതെ, എക്‌സ്‌റ്റർ നിരയിലുടനീളം ഐസോഫിക്‌സ് ആങ്കർ പോയിന്റുകൾ സ്റ്റാൻഡേർഡായി ഹ്യുണ്ടായി ഒരുക്കിയിട്ടുണ്ട്.