കിയ കാരൻസ് ക്ലാവിസ് ഇവി ബുക്കിംഗ് ആരംഭിച്ചു

കിയ ഇന്ത്യ കാരൻസ് ക്ലാവിസ് ഇവിയുടെ ബുക്കിംഗുകൾ ആരംഭിച്ചു. 17.99 ലക്ഷം രൂപ മുതൽ വിലയുള്ള ഈ ഇലക്ട്രിക് എംപിവി രണ്ട് ബാറ്ററി പായ്ക്ക് ഓപ്ഷനുകളിൽ ലഭ്യമാണ്. 

കിയ ഇന്ത്യ ചൊവ്വാഴ്ച കാരൻസ് ക്ലാവിസ് ഇവിയുടെ ബുക്കിംഗുകൾ സ്വീകരിച്ചു തുടങ്ങി. കാരൻസ് ക്ലാവിസ് എംപിവിയുടെ പൂർണ്ണ ഇലക്ട്രിക് പതിപ്പാണ് 17.99 ലക്ഷം പ്രാരംഭ എക്സ്-ഷോറൂം വിലയിൽ പുറത്തിറക്കിയ കിയ കാരൻസ് ക്ലാവിസ് ഇവി. ബ്രാൻഡിന്റെ ആദ്യത്തെ നിർമ്മിത ഇന്ത്യൻ ഇലക്ട്രിക് കാറുമാണിത്. ഈ ഇലക്ട്രിക് എംപിവിക്ക് താൽപ്പര്യമുള്ള ഉപഭോക്താക്കൾക്ക് ഇപ്പോൾ 25,000 ടോക്കൺ തുകയ്ക്ക് കാർ ബുക്ക് ചെയ്യാം . കമ്പനിയുടെ ഔദ്യോഗിക വെബ്‌സൈറ്റ് വഴിയോ അംഗീകൃത ഡീലർഷിപ്പുകളിലൂടെയോ ബുക്കിംഗുകൾ നടത്താം.

കാരൻസ് ക്ലാവിസ് ഇവിയുടെ പ്രകടനത്തെക്കുറിച്ച് പറയുകയാണെങ്കിൽ, കാറിൽ രണ്ട് ബാറ്ററി പായ്ക്കുകൾ എന്ന ഓപ്ഷൻ ഉപഭോക്താക്കൾക്ക് ലഭിക്കുന്നു. ഇതിൽ 42kWh ഉം 51.4kWh ഉം ബാറ്ററികൾ ഉൾപ്പെടുന്നു. 42kWh ന്റെ ചെറിയ ബാറ്ററി പായ്ക്ക് ഉപയോഗിച്ച് ഒറ്റ ചാർജിൽ 404 കിലോമീറ്റർ സഞ്ചരിക്കാനും 51.4kWh ന്റെ വലിയ ബാറ്ററി പായ്ക്ക് ഉപയോഗിച്ച് 490 കിലോമീറ്റർ സഞ്ചരിക്കാനും കഴിയുമെന്ന് കമ്പനി പറയുന്നു. ഈ ഇലക്ട്രിക് കാറിന് വെറും 8.4 സെക്കൻഡിനുള്ളിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാനും സാധിക്കും.

സുരക്ഷയ്ക്കായി, 6-എയർബാഗുകൾ, എഡിഎഎസ് ലെവൽ-2, ഇഎസ്‍സി, ടിപിഎംഎസ്, 360-ഡിഗ്രി ക്യാമറ, i-പെഡൽ സാങ്കേതികവിദ്യ തുടങ്ങിയ ആധുനിക സവിശേഷതകളും ഇവിയിൽ നൽകിയിട്ടുണ്ട്. ഇതിനുപുറമെ, ഇത് V2L (വെഹിക്കിൾ ടു ലോഡ്), V2V (വെഹിക്കിൾ ടു വെഹിക്കിൾ) ചാർജിംഗ് എന്നിവയെയും കിയ കാരൻസ് ഇവി പിന്തുണയ്ക്കുന്നു. ഇന്ത്യൻ വിപണിയിൽ, ഹ്യുണ്ടായി ക്രെറ്റ ഇവി, ടാറ്റ കർവ് ഇവി, എംജി ഇസഡ്എസ് ഇവി തുടങ്ങിയ മോഡലുകളുമായി ഇവി നേരിട്ട് മത്സരിക്കും. ഐവറി സിൽവർ മാറ്റ്, ഗ്ലേസിയർ വൈറ്റ് പേൾ, പെർട്ടർ ഒലിവ്, ഓറോറ ബ്ലാക്ക് പേൾ, ഇംപീരിയൽ ബ്ലൂ, ഗ്രാവിറ്റി ഗ്രേ എന്നീ ആറ് നിറങ്ങളിലാണ് പുതിയ കിയ ഫാമിലി ഇലക്ട്രിക് കാർ എത്തുന്നത്.

ക്ലാവിസ് ഇവിയുടെ മൊത്തത്തിലുള്ള സിലൗറ്റും അളവുകളും നിലിവെല ഐസിഇയിൽ പ്രവർത്തിക്കുന്ന കാരൻസ് ക്ലാവിസിനോട് കൃത്യമായി സമാനമാണ്. എങ്കിലും, വ്യത്യസ്തമായ ഇലക്ട്രിക് വാഹന ഘടകങ്ങൾ ഇതിനെ വേറിട്ടു നിർത്തുന്നു. ഫ്രണ്ട് ഗ്രിൽ, എയറോഡൈനാമിക് അലോയ് വീലുകൾ, എൽഇഡി ലൈറ്റ് ബാർ എന്നിവയുൾപ്പെടെ ചില മാറ്റങ്ങൾ വരുത്തിയിട്ടുണ്ട്. ഇന്റീരിയറിൽ ഡ്യുവൽ 12.3 ഇഞ്ച് സ്‌ക്രീനുകൾ, വെന്റിലേറ്റഡ് സീറ്റുകൾ, വയർലെസ് ചാർജിംഗ്, പനോരമിക് സൺറൂഫ്, ബോസ് സൗണ്ട് സിസ്റ്റം തുടങ്ങിയ സവിശേഷതകൾ ലഭിക്കും.