കിയ ഇന്ത്യ സമ്മർ ക്യാമ്പ്: വേനലിൽ വണ്ടി റെഡിയാക്കാം

കിയ ഇന്ത്യ രാജ്യവ്യാപകമായി 'സമ്മർ റെഡിനസ് സർവീസ് ക്യാമ്പ്' ആരംഭിച്ചു. ഏപ്രിൽ 6 മുതൽ മേയ് 12 വരെ നടക്കുന്ന ഈ ക്യാമ്പിൽ വാഹനങ്ങൾക്ക് സൗജന്യ 20-പോയിന്റ് പരിശോധന, എസി പ്രവർത്തനക്ഷമത വിലയിരുത്തൽ, കൂടാതെ സർവീസുകൾക്കും ആക്‌സസറികൾക്കും പ്രത്യേക ഇളവുകളും നൽകുന്നു.  

ഉപഭോക്തൃ സേവനാനുഭവം മെച്ചപ്പെടുത്താനുള്ള ശ്രമങ്ങളുടെ ഭാഗമായി കിയ ഇന്ത്യ രാജ്യവ്യാപകമായി ‘സമ്മർ റെഡിനസ് സർവീസ് ക്യാമ്പ്’ ആരംഭിച്ചു. ഏപ്രിൽ 6 മുതൽ മേയ് 12 വരെ നടക്കുന്ന ഈ ക്യാമ്പ് രാജ്യത്തുടനീളമുള്ള 497 അംഗീകൃത കിയ സർവീസ് സെന്ററുകളിൽ സംഘടിപ്പിക്കും. വേനൽക്കാലത്ത് സുരക്ഷിതവും സൗകര്യപ്രദവുമായ യാത്ര ഉറപ്പാക്കുന്നതിനായി വാഹനങ്ങളുടെ സമഗ്ര പരിശോധനയും സേവനങ്ങളും നൽകുകയാണ് ഈ പദ്ധതിയുടെ ലക്ഷ്യം എന്ന് കമ്പനി വാർത്താക്കുറിപ്പിൽ അറിയിച്ചു.

ഈ ക്യാമ്പിന്റെ ഭാഗമായി 20-പോയിന്റ് വാഹന പരിശോധനയും എയർ കണ്ടീഷനിംഗ് പ്രവർത്തനക്ഷമതയുടെ വിലയിരുത്തലും സൗജന്യമായി നടത്തും. കൂടാതെ എസി കെയർ സർവീസുകൾക്ക് 20 ശതമാനം വരെ ഇളവ്, തിരഞ്ഞെടുത്ത ജെന്യുയിൻ ആക്‌സസറികളിൽ കുറഞ്ഞത് അഞ്ച് ശതമാനം ഇളവ്, റോഡ്‌സൈഡ് അസിസ്റ്റൻസ് പദ്ധതികൾക്ക് 10 ശതമാനം ഇളവ് എന്നിവയും ലഭ്യമാണ്. വാഹനങ്ങൾക്ക് സൗജന്യ ടോപ്പ് വാഷ്, ഗുണനിലവാര പരിശോധനകൾ തുടങ്ങിയ സേവനങ്ങളും ക്യാമ്പിന്റെ ഭാഗമാണ്.

കസ്റ്റമർ എൻഗേജ്മെന്റ് ശക്തിപ്പെടുത്തുന്നതിനായി കിയ സർട്ടിഫൈഡ് പ്രീ-ഓൺഡ് (CPO) വിലയിരുത്തലുകളും റഫറൽ പ്രോഗ്രാമുകളും ക്യാമ്പിൽ ഉൾപ്പെടുത്തിയിട്ടുണ്ട്. ഉപഭോക്താക്കൾക്ക് കൂടുതൽ മൂല്യവും സൗകര്യവും നൽകുന്നതിനൊപ്പം ദീർഘകാല ബന്ധം ഉറപ്പാക്കുകയാണ് കിയയുടെ ലക്ഷ്യമെന്ന് കമ്പനി അറിയിച്ചു.

ഉൽപ്പന്നങ്ങൾ നൽകുന്നതിൽ മാത്രം ഒതുങ്ങാതെ ഉപഭോക്താക്കൾക്ക് മികച്ച ഉടമസ്ഥാവകാശ അനുഭവം നൽകുന്നതിലാണ് തങ്ങളുടെ ശ്രദ്ധയെന്നും സീസണൽ ആവശ്യങ്ങൾ മുൻകൂട്ടി പരിഗണിച്ച് ഉപഭോക്താക്കൾക്ക് സുരക്ഷയും സൗകര്യവും ഉറപ്പാക്കുന്നതിനാണ് ഈ ക്യാമ്പ് എന്നും കിയ ഇന്ത്യ സീനിയർ വൈസ് പ്രസിഡന്റായ അതുൽ സൂദ് വ്യക്തമാക്കി.