20 ലക്ഷത്തിൽ താഴെ വില, എവിടെയും കയറിപ്പോകാൻ ഫോർ-വീൽ ഡ്രൈവും; ഇവയാണ് ശരിക്കും എസ്‍യുവികൾ

ഇന്ത്യൻ വാഹന വിപണിയിൽ ഫോർ-വീൽ ഡ്രൈവ് എസ്‌യുവികൾക്ക് വൻ ഡിമാൻഡാണ്. 20 ലക്ഷം രൂപയിൽ താഴെ വിലയുള്ള അഞ്ച് മികച്ച ഫോർ-വീൽ ഡ്രൈവ് എസ്‌യുവികളെക്കുറിച്ച് അറിയാം. 

ഇന്ത്യൻ വാഹന വിപണിയിൽ എസ്‌യുവികൾക്ക് ഇപ്പോൾ വൻ ഡിമാൻഡാണ്. കഴിഞ്ഞ ദശകത്തിൽ എസ്‌യുവി വിഭാഗത്തിൽ നിരവധി പുതിയ സെഗ്‌മെന്റുകൾ ഉയർന്നുവന്നിട്ടുണ്ട്. എങ്കിലും, ഈ മോഡലുകളൊന്നും യഥാർത്ഥ എസ്‌യുവി ടാഗിന് യോഗ്യമല്ല. കാരണം അവയിൽ ഭൂരിഭാഗവും മോണോകോക്ക് ചേസിസിനെ അടിസ്ഥാനമാക്കിയുള്ള ഫ്രണ്ട്-വീൽ-ഡ്രൈവ് കാറുകളാണ്. എന്നാൽ ഫോ‍‍ർ വീൽ ഡ്രൈവ് എസ്‌യുവികൾ ലാഡർ ഫ്രെയിം അടിസ്ഥാനമാക്കിയുള്ള കരുത്തുറ്റ വാഹനങ്ങളാണ്. കൂടാതെ എവിടെയും പോകാൻ കഴിവുള്ളവയുമാണ്. ഇതാ 20 ലക്ഷം രൂപയിൽ താഴെ വിലയുള്ള അഞ്ച് മികച്ച ഫോർ-വീൽ ഡ്രൈവ് എസ്‌യുവികളെക്കുറിച്ച് അറിയാം.

മഹീന്ദ്ര ഥാർ റോക്സ്

20 ലക്ഷം രൂപയിൽ താഴെ വിലയുള്ള 4WD എസ്‌യുവികളുടെ പട്ടികയിലെ വമ്പന്മാരിൽ ഒരാൾ മഹീന്ദ്ര ഥാർ റോക്‌സ് ആണ്. MX5 ഡീസൽ മാനുവൽ വേരിയന്റിന് 19.39 ലക്ഷം രൂപ എക്‌സ്-ഷോറൂം വില മുതൽ ആരംഭിക്കുന്ന ഫോർ-വീൽ ഡ്രൈവ് ശേഷിയുള്ള എസ്‌യുവിയാണിത്. സ്കോർപിയോ N പോലെ, ഥാർ റോക്‌സും ഡീസൽ എഞ്ചിൻ ഓപ്ഷനിൽ 4WD മാത്രമേ വാഗ്‍ദാനം ചെയ്യുന്നുള്ളൂ. 150 bhp കരുത്തും 330 Nm പീക്ക് ടോർക്കും നൽകുന്ന പരിചിതമായ 2.2 ലിറ്റർ എംഹോക്ക് ഡീസൽ എഞ്ചിനാണ് ഇത് ഉപയോഗിക്കുന്നത്. 6-സ്പീഡ് മാനുവൽ ഗിയർബോക്‌സുമായിഎഞ്ചിൻ ഘടിപ്പിച്ചിരിക്കുന്നു. 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് ടോപ്പ്-സ്‌പെക്ക് ട്രിമ്മുകൾക്കൊപ്പം ലഭ്യമാണ്.

മാരുതി സുസുക്കി ജിംനി

12.76 ലക്ഷം രൂപ പ്രാരംഭ എക്സ്-ഷോറൂം വിലയിൽ ജിംനി നിലവിൽ ഇന്ത്യൻ വിപണിയിലെ ഏറ്റവും താങ്ങാനാവുന്ന 4WD എസ്‌യുവിയാണ്. ലോ-റേഞ്ച് ട്രാൻസ്‍ഫർ കേസുള്ള ശരിയായ ഫോർ-വീൽ ഡ്രൈവ് സിസ്റ്റം വാഗ്ദാനം ചെയ്യുന്ന ജിംനി പെട്രോൾ മാത്രമുള്ള മോഡലാണ്. 103 ബിഎച്ച്പിയും 134 എൻഎം പീക്ക് ടോർക്കും പുറപ്പെടുവിക്കുന്ന 1.5 ലിറ്റർ കെ 15 ബി നാച്ചുറലി ആസ്പിറേറ്റഡ് പെട്രോൾ എഞ്ചിനാണ് ഇതിന് കരുത്ത് പകരുന്നത്. 5-സ്പീഡ് മാനുവലും 4-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്സും ഇതിൽ ഘടിപ്പിച്ചിരിക്കുന്നു. ഭാരം കുറഞ്ഞതും ഒതുക്കമുള്ളതുമായ അളവുകൾ ഉള്ള ജിംനി ഓഫ്-റോഡ് പാതകളെ നേരിടാൻ ശേഷിയുള്ള വാഹനമാണ്.

മഹീന്ദ്ര സ്കോർപിയോ എൻ

20 ലക്ഷം രൂപയിൽ താഴെ വിലയിൽ 4WD സിസ്റ്റം വാഗ്ദാനം ചെയ്യുന്ന ഒരേയൊരു 7 സീറ്റർ എസ്‌യുവിയാണ് സ്‌കോർപിയോ എൻ. 6-സ്പീഡ് മാനുവൽ ഗിയർബോക്‌സുമായി ഘടിപ്പിച്ചിരിക്കുന്ന Z4 4WD വേരിയന്റിന് 18.35 ലക്ഷം രൂപയാണ് എക്‌സ്-ഷോറൂം വില. 172 bhp കരുത്തും 370 Nm പീക്ക് ടോർക്കും ഉത്പാദിപ്പിക്കുന്ന 2.2 ലിറ്റർ എംഹോക്ക് ടർബോ ഡീസൽ എഞ്ചിനാണ് ഈ എസ്‌യുവിക്ക് കരുത്ത് പകരുന്നത്. ഡീസൽ എഞ്ചിൻ ഓപ്ഷനോടുകൂടിയ 4WD സിസ്റ്റം മാത്രമേ സ്‌കോർപിയോ N വാഗ്ദാനം ചെയ്യുന്നു

മഹീന്ദ്ര ഥാർ 3 ഡോർ

ഇന്ത്യയിലെ ഏറ്റവും ജനപ്രിയമായ എസ്‌യുവികളിൽ ഒന്നാണ് മഹീന്ദ്ര ഥാർ 3-ഡോർ. പെട്രോൾ, ഡീസൽ പവർട്രെയിനുകൾക്കൊപ്പം 4WD സിസ്റ്റവും 3 ഡോ‍ർ ഥാ‍ർ വാഗ്ദാനം ചെയ്യുന്നു. ഥാർ 4WD യുടെ എക്സ്-ഷോറൂം വില LX പെട്രോൾ എംടി ഹാർഡ് ടോപ്പ് വേരിയന്റിന് 15.20 ലക്ഷം രൂപയിൽ നിന്ന് ആരംഭിക്കുന്നു. ഡീസൽ 4WD ശ്രേണി എക്സ്-ഷോറൂം വില 16.12 ലക്ഷം രൂപയിൽ നിന്ന് ആരംഭിക്കുന്നു. 150 PS 2.0-ലിറ്റർ എംസ്റ്റാലിയൻ പെട്രോളും 132 PS 2.2-ലിറ്റർ എംഹോക്ക് ഡീസൽ എഞ്ചിനുകളുമാണ് ഈ എസ്‌യുവിക്ക് കരുത്ത് പകരുന്നത്. രണ്ട് എഞ്ചിൻ ഓപ്ഷനുകളിലും 6-സ്പീഡ് മാനുവൽ, 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് എന്നിവ ലഭ്യമാണ്.

ഫോഴ്‌സ് ഗൂർഖ

മൂന്ന് ഡോർ, അഞ്ച് ഡോർ എന്നീ ബോഡി സ്റ്റൈലുകളിൽ ഫോഴ്‌സ് ഗൂർഖ ലഭ്യമാണ്. ഗൂർഖ 3-ഡോറിന് 16.75 ലക്ഷം രൂപ എക്സ്-ഷോറൂം വിലയുണ്ട്. അഞ്ച് ഡോർ മോഡലിന് 18 ലക്ഷം രൂപ എക്സ്-ഷോറൂം വിലവരും. 138 ബിഎച്ച്പിയും 320 എൻഎം പീക്ക് ടോർക്കും ഉത്പാദിപ്പിക്കുന്ന 2.6 ലിറ്റർ ഡീസൽ എഞ്ചിനാണ് ഈ എസ്‌യുവിക്ക് കരുത്ത് പകരുന്നത്. അഞ്ച് സ്‍പീഡ് മാനുവൽ ഗിയർബോക്‌സിൽ മാത്രമേ ഇത് ലഭ്യമാകൂ.