ബ്രെസയുടെയും ഗ്രാൻഡ് വിറ്റാരയുടെയും ഇടയിലേക്ക് മാരുതി എസ്‍ക്യുഡോ; ലോഞ്ച് തീയ്യതി പുറത്ത്; ക്രെറ്റയ്ക്കും മറ്റും സഭവിക്കുന്നത് ഇനി കണ്ടറിയണം

മാരുതി സുസുക്കി പുതിയ കോം‌പാക്റ്റ് എസ്‌യുവി എസ്‌കുഡോ സെപ്റ്റംബർ 3 ന് ഇന്ത്യയിൽ പുറത്തിറക്കും. ബ്രെസയ്ക്കും ഗ്രാൻഡ് വിറ്റാരയ്ക്കും ഇടയിലായിരിക്കും ഇതിന്റെ സ്ഥാനം. 

രാജ്യത്തെ ഏറ്റവും വലിയ കാർ വിൽപ്പന കമ്പനിയായ മാരുതി സുസുക്കി ഈ ഉത്സവ സീസണിൽ ഒരു പുതിയ കോം‌പാക്റ്റ് എസ്‌യുവി പുറത്തിറക്കാൻ പോകുന്നു. കമ്പനിയുടെ വരാനിരിക്കുന്ന എസ്‌യുവിയുടെ പേര് മാരുതി സുസുക്കി എസ്‌കുഡോ എന്ന് ആയിരിക്കും. മാരുതി എസ്‌കുഡോയുടെ ലോഞ്ച് തീയതിയും സ്ഥിരീകരിച്ചു. മാരുതിയുടെ ഈ കോം‌പാക്റ്റ് എസ്‌യുവി സെപ്റ്റംബർ മൂന്നിന് ഇന്ത്യയിൽ ലോഞ്ച് ചെയ്യും എന്ന് റഷ്‌ലെയിൻ റിപ്പോർട്ട് ചെയ്യുന്നു. എസ്‍ക്യുഡോ മാരുതിയുടെ അരീന ഡീലർഷിപ്പ് വഴി വിൽക്കും.

കമ്പനിയുടെ ഉൽപ്പന്ന നിരയിൽ, ബ്രെസയ്ക്ക് മുകളിലും ഗ്രാൻഡ് വിറ്റാരയ്ക്ക് താഴെയുമായി മാരുതി എസ്‌കുഡോ സ്ഥാനം പിടിക്കും. ബ്രെസയേക്കാൾ അൽപ്പം വിലയേറിയതും ഗ്രാൻഡ് വിറ്റാരയേക്കാൾ താങ്ങാനാവുന്ന വില ഉള്ളതുമായിരിക്കും എസ്‍ക്യുഡോ എന്നാണ് റിപ്പോ‍ട്ടുകൾ. എസ്‍ക്യുഡോയുടെ പവർട്രെയിനിനെക്കുറിച്ച് പറയുകയാണെങ്കിൽ, മാരുതി എസ്ക്യൂഡോയ്ക്ക് 1.5 ലിറ്റർ മൈൽഡ് ഹൈബ്രിഡ് (103 പിഎസ്) ഉം മറ്റൊരു 1.5 ലിറ്റർ സ്ട്രോംഗ് ഹൈബ്രിഡ് (115 പിഎസ്) എഞ്ചിനും ലഭിക്കും. ഇതിനുപുറമെ, ഉപഭോക്താക്കൾക്ക് കാറിൽ സിഎൻജി ഓപ്ഷനും ലഭിക്കും. കാറിന്റെ എഞ്ചിൻ 5-സ്പീഡ് മാനുവൽ, 6-സ്പീഡ് ഓട്ടോമാറ്റിക്, ഇ-സിവിടി ഗിയർബോക്സുകളുമായി ജോടിയാക്കും. വാഹനം മികച്ച മൈലേജ് വാഗ്‍ദാനം ചെയ്യും എന്നാണ് റിപ്പോർട്ടുകൾ.

രൂപഭംഗിയെക്കുറിച്ചും രൂപകൽപ്പനയെക്കുറിച്ചും പറയുകയാണെങ്കിൽ, ഗ്രാൻഡ് വിറ്റാരയുടെയും ഇവിറ്റാര ഇവിയുടെയും സമ്മിശ്ര ശൈലിയായിരിക്കും ഇതിലുണ്ടാവുക. ഷാർപ്പായിട്ടുള്ള എൽഇഡി ടെയിൽ ലാമ്പുകൾ, പരുക്കൻ, കടുപ്പമുള്ള ബമ്പർ, മേൽക്കൂരയിൽ ഘടിപ്പിച്ച സ്‌പോയിലർ, സ്‌പോർട്ടി അലോയ് വീലുകൾ തുടങ്ങിയവ ഇതിലുണ്ട്. അതേസമയം, കാറിന്റെ ക്യാബിനിൽ, ഒമ്പത് ഇഞ്ച് ടച്ച്‌സ്‌ക്രീൻ, ഏഴ് ഇഞ്ച് എംഐഡി, ഹെഡ്-അപ്പ് ഡിസ്‌പ്ലേ, സൺറൂഫ്, വയർലെസ് ചാർജിംഗ്, വെന്റിലേറ്റഡ് സീറ്റുകൾ, എയർ പ്യൂരിഫയർ തുടങ്ങിയ സവിശേഷതകൾ ഉപഭോക്താക്കൾക്ക് ലഭിക്കും.

ഇന്ത്യൻ വിപണിയിൽ ഇതിന്റെ എക്സ്-ഷോറൂം വില 10 ലക്ഷം മുതൽ 15 ലക്ഷം രൂപ വരെ ആയിരിക്കാൻ സാധ്യതയുണ്ട് എന്നാണ് റിപ്പോർട്ടുകൾ. ഇന്ത്യയിൽ, ഈ മാരുതി കാർ ഹ്യുണ്ടായി ക്രെറ്റ, മാരുതി സുസുക്കി ഗ്രാൻഡ് വിറ്റാര, കിയ സെൽറ്റോസ്, ടൊയോട്ട ഹൈറൈഡർ, ഹോണ്ട എലിവേറ്റ് തുടങ്ങിയ ഇടത്തരം സെഗ്‌മെന്റ് എസ്‌യുവികളുമായി മത്സരിക്കും.