ഫാമിലി കാ‍ർ വാങ്ങാൻ പ്ലാനുണ്ടോ? ഇതാ വമ്പൻ മൈലേജുമായി ഉടനെത്തുന്ന ഹൈബ്രിഡ് എസ്‍യുവികൾ

മാരുതി, മഹീന്ദ്ര, ഹ്യുണ്ടായി, കിയ, ഹോണ്ട, റെനോ, നിസ്സാൻ തുടങ്ങിയ പ്രമുഖ നിർമ്മാതാക്കൾ പുതിയ ഹൈബ്രിഡ് എസ്‌യുവികൾ അവതരിപ്പിക്കാൻ ഒരുങ്ങുകയാണ്.

ഇന്ധനക്ഷമതയും പ്രകടനവും തമ്മിലുള്ള മികച്ച സന്തുലിതാവസ്ഥ വാഗ്ദാനം ചെയ്യുന്നതിനാൽ ഹൈബ്രിഡ് വാഹനങ്ങൾ ശ്രദ്ധേയമായി മാറിയിരിക്കുന്നു. കൂടാതെ, ഇലക്ട്രിക് വാഹനങ്ങളിൽ  നിന്ന് വ്യത്യസ്തമായി, ഹൈബ്രിഡ് കാറുകൾ റേഞ്ച് ഉത്കണ്ഠയോ അടിസ്ഥാന സൗകര്യ വെല്ലുവിളികളോ നേരിടുന്നില്ല. ഇന്ത്യയിലെ എല്ലാ പ്രമുഖ വാഹന നിർമ്മാതാക്കളും വരും വർഷങ്ങളിൽ ഹൈബ്രിഡ് വിഭാഗത്തിലേക്ക് പ്രവേശിക്കാനോ നിലവിലുള്ള ഹൈബ്രിഡ് ഉൽപ്പന്ന നിര വികസിപ്പിക്കാനോ തയ്യാറെടുക്കുന്നതിന്‍റെ മുഖ്യകാരണവും ഇതാണ്. 2027 ഓടെ എത്തുമെന്ന് പ്രതീക്ഷിക്കുന്ന മികച്ച 15 ഹൈബ്രിഡ് എസ്‌യുവികൾ ഇതാ.

മാരുതി എസ്‍ക്യുഡോ ഹൈബ്രിഡ്

ഇന്ത്യയിലെ ഏറ്റവും വലിയ യാത്രാ വാഹന നി‍മ്മാതാക്കളായ മാരുതി സുസുക്കി 2025 സെപ്റ്റംബർ 3 ന് ഗ്രാൻഡ് വിറ്റാരയെ അടിസ്ഥാനമാക്കി ഒരു പുതിയ ഇടത്തരം എസ്‌യുവി പുറത്തിറക്കാൻ ഒരുങ്ങുന്നു . എസ്‍ക്യുഡോ എന്ന് നിലവിൽ അറിയപ്പെടുന്ന ഈ മോഡൽ അരീന ഡീലർഷിപ്പ് വഴി മാത്രമായി വിൽക്കും. ഗ്രാൻഡ് വിറ്റാരയുമായി 1.5 ലിറ്റർ പെട്രോൾ-ഹൈബ്രിഡ് പവർട്രെയിൻ ഇത് പങ്കിടും.

മാരുതി ഫ്രോങ്ക്സ് ഹൈബ്രിഡ്

മാരുതി ഫ്രോങ്ക്സ് ഹൈബ്രിഡ് 2026 ൽ മാരുതി സുസുക്കിയുടെ സ്വന്തം വികസിപ്പിച്ചെടുത്ത ശക്തമായ ഹൈബ്രിഡ് പവർട്രെയിനിന്റെ അരങ്ങേറ്റം കുറിക്കും. കോം‌പാക്റ്റ് ക്രോസ്ഓവറിൽ ബ്രാൻഡിന്റെ സീരീസ് ഹൈബ്രിഡ് സിസ്റ്റവുമായി ജോടിയാക്കിയ 1.2 ലിറ്റർ Z12E പെട്രോൾ എഞ്ചിൻ ഉണ്ടായിരിക്കും.

മഹീന്ദ്ര XUV 3XO ഹൈബ്രിഡ്

2026-ൽ XUV 3XO കോംപാക്റ്റ് എസ്‌യുവിയുമായി മഹീന്ദ്ര & മഹീന്ദ്ര ഹൈബ്രിഡ് വിഭാഗത്തിലേക്ക് കടക്കും. ശക്തമായ ഹൈബ്രിഡ് സിസ്റ്റം 1.2L ടർബോ പെട്രോൾ എഞ്ചിനുമായി ജോടിയാക്കും. മഹീന്ദ്ര BE 6 ഉം XEV 9e ഉം 2026 അല്ലെങ്കിൽ 2027-ൽ ഒരു റേഞ്ച്-എക്സ്റ്റെൻഡർ ഹൈബ്രിഡ് പവർട്രെയിനുമായി വാഗ്ദാനം ചെയ്തേക്കാം.

ഹ്യുണ്ടായിയുടെ കിയയുടെയും ഹൈബ്രിഡ് എസ്‌യുവികൾ

രണ്ട് ഹൈബ്രിഡ് എസ്‌യുവികൾ നി‍‍ർമ്മിക്കാൻ ഹ്യുണ്ടായി മോട്ടോർ ഇന്ത്യ പദ്ധതിയിടുന്നുണ്ട്. പുതുതലമുറ ക്രെറ്റയും ഒരു 7 സീറ്റർ എസ്‌യുവിയും (Ni1i എന്ന കോഡ് നാമം) - നിർമ്മിക്കാൻ പദ്ധതിയിട്ടിട്ടുണ്ട്. അതുപോലെ, കിയ സെൽറ്റോസും 2027 ൽ ഹൈബ്രിഡ് മോഡലായി മാറും, തുടർന്ന് പുതിയ കിയ മൂന്ന്-വരി എസ്‌യുവി (Q4i എന്ന കോഡ് നാമം) പുറത്തിറക്കും. വരാനിരിക്കുന്ന ഈ എല്ലാ ഹൈബ്രിഡ് എസ്‌യുവികളിലും 1.5 ലിറ്റർ പെട്രോൾ ഹൈബ്രിഡ് പവർട്രെയിൻ ഉണ്ടാകുമെന്ന് പ്രതീക്ഷിക്കുന്നു.

ഹോണ്ട ഹൈബ്രിഡ് പദ്ധതികൾ

2025 അവസാനത്തോടെ ഹോണ്ട കാർസ് ഇന്ത്യ ആഗോളതലത്തിൽ പ്രശസ്തമായ ZR-V ഹൈബ്രിഡ് എസ്‌യുവി പുറത്തിറക്കുമെന്ന് റിപ്പോർട്ടുകൾ ഉണ്ട്. 2026 ദീപാവലി സീസണോടെ എലിവേറ്റ് മിഡ്‌സൈസ് എസ്‌യുവിയുടെ ഹൈബ്രിഡ് പതിപ്പും അവതരിപ്പിക്കും. ഹോണ്ടയുടെ പുതിയ 7 സീറ്റർ എസ്‌യുവി മൂന്നാമത്തെ ഹൈബ്രിഡ് ഓഫറായിരിക്കാം. ഇത് ബ്രാൻഡിന്റെ പുതിയ മോഡുലാർ പ്ലാറ്റ്‌ഫോമിന്റെ അരങ്ങേറ്റം കൂടിയാണ്.

റെനോ, നിസാൻ ഹൈബ്രിഡ് പദ്ധതികൾ

2026-ൽ ഏറെ പ്രതീക്ഷയോടെ കാത്തിരിക്കുന്ന വരാനിരിക്കുന്ന ഹൈബ്രിഡ് എസ്‌യുവികളിൽ മൂന്നാം തലമുറ റെനോ ഡസ്റ്ററും അതിന്റെ 7 സീറ്റർ പതിപ്പും (റെനോ ബോറിയൽ) ഉൾപ്പെടുന്നു. അതേ സമയം തന്നെ, ഡസ്റ്ററിന്റെയും ബോറിയലിന്റെയും പുനർനിർമ്മിച്ച പതിപ്പുകൾ നിസ്സാൻ ഇന്ത്യ അവതരിപ്പിക്കും. എങ്കിലും, റെനോ എതിരാളികളുമായി താരതമ്യപ്പെടുത്തുമ്പോൾ നിസാൻ എസ്‌യുവികൾക്ക് വ്യത്യസ്‍തമായ സ്റ്റൈലിംഗ് ഉണ്ടായിരിക്കും.