എസ്‌യുവി വിപണിയിൽ കൊടുങ്കാറ്റ്; അഞ്ച് പുതിയ താരങ്ങൾ വരുന്നു

ഇന്ത്യൻ സബ്-4 മീറ്റർ കോംപാക്റ്റ് എസ്‌യുവി വിപണിയിൽ വലിയ മാറ്റങ്ങൾ വരുന്നു. ഹ്യുണ്ടായി വെന്യു, ടാറ്റ നെക്‌സോൺ, മാരുതി ബ്രെസ്സ, മഹീന്ദ്ര XUV 3XO, കിയ സോനെറ്റ് എന്നിവയുടെ അടുത്ത തലമുറ മോഡലുകൾ വരും വർഷങ്ങളിൽ പുറത്തിറങ്ങും. 

പുതിയ മോഡലുകളുടെ വരവോടെ ഇന്ത്യൻ സബ്-4 മീറ്റർ കോംപാക്റ്റ് എസ്‌യുവി സെഗ്‌മെന്‍റ് വലിയ മാറ്റങ്ങൾക്ക് സാക്ഷ്യം വഹിക്കാൻ ഒരുങ്ങുകയാണ്, അതിൽ അടുത്ത തലമുറ മോഡലുകളും ഉൾപ്പെടുന്നു. ഹ്യുണ്ടായി വെന്യു, ടാറ്റ നെക്‌സോൺ, മാരുതി ബ്രെസ്സ, മഹീന്ദ്ര XUV 3XO, കിയ സോനെറ്റ് തുടങ്ങിയ ഇതിനകം ജനപ്രിയമായ ചില സബ്‌കോംപാക്റ്റ് എസ്‌യുവികൾക്ക് വരും വർഷങ്ങളിൽ ഒരു തലമുറ അപ്‌ഗ്രേഡ് ലഭിക്കും.

പുതുതലമുറ ഹ്യുണ്ടായി വെന്യു 2025 നവംബർ നാലിന് വിൽപ്പനയ്‌ക്കെത്തും. വളരെ ജനപ്രിയമായ ടാറ്റ നെക്‌സോണും കിയ സോണറ്റും 2027 ൽ പുതിയ തലമുറയിലേക്ക് പ്രവേശിക്കുമെന്ന് പ്രതീക്ഷിക്കുന്നു. അതേസമയം മഹീന്ദ്ര XUV 3XO 2028 ൽ ഒരു പ്രധാന മേക്കോവർ നടത്തും. 2029 ൽ ശക്തമായ ഒരു ഹൈബ്രിഡ് പവർട്രെയിനുമായി പുതിയ മാരുതി ബ്രെസ്സ എത്തും. വരാനിരിക്കുന്ന ഈ സബ്‌കോംപാക്റ്റ് എസ്‌യുവികളുടെ പ്രധാന വിശദാംശങ്ങൾ നോക്കാം.

പുതിയ ഹ്യുണ്ടായി വെന്യു

ഔദ്യോഗിക ലോഞ്ചിന് മുന്നോടിയായി പുതിയ തലമുറ ഹ്യുണ്ടായി വെന്യു പൂർണ്ണമായും വെളിപ്പെടുത്തിയിട്ടുണ്ട്. ക്രെറ്റയിൽ നിന്നും ഗ്ലോബൽ-സ്പെക്ക് പാലിസേഡ് എസ്‌യുവികളിൽ നിന്നും നിരവധി ഡിസൈൻ ഘടകങ്ങൾ ഈ എസ്‌യുവിയിൽ ഉൾപ്പെടുത്തിയിട്ടുണ്ട്. ഉള്ളിൽ, 2025 ഹ്യുണ്ടായി വെന്യുവിൽ ഡ്യുവൽ സ്‌ക്രീൻ സജ്ജീകരണം, കൺട്രോളർ ഒടിഎ, ലെവൽ-2 എഡിഎഎസ് എന്നിവ ഉൾപ്പെടും.

പുതിയ ടാറ്റ നെക്‌സോൺ

നിലവിലുള്ള X1 പ്ലാറ്റ്‌ഫോമിന്റെ വലിയതോതിൽ പരിഷ്‌ക്കരിച്ച പതിപ്പിനെ അടിസ്ഥാനമാക്കിയായിരിക്കും രണ്ടാം തലമുറ ടാറ്റ നെക്‌സോൺ ഒരുങ്ങുന്നത്. കർവ്വിൽ നിന്ന് പ്രചോദനം ഉൾക്കൊണ്ട് നിരവധി പുതിയ സവിശേഷതകൾക്കൊപ്പം കോംപാക്റ്റ് എസ്‌യുവിക്ക് കാര്യമായ ഡിസൈൻ മാറ്റങ്ങളും ലഭിച്ചേക്കാം. 1.2 ലിറ്റർ ടർബോ പെട്രോൾ എഞ്ചിൻ നിലവിലെ തലമുറയിൽ നിന്ന് പകർത്തും. അടുത്ത തലമുറയിലും ഡീസൽ എഞ്ചിൻ തുടരും.

പുതിയ മാരുതി ബ്രെസ

പുതിയ തലമുറ ബ്രെസ ഹൈബ്രിഡ് പതിപ്പിലേക്ക് മാറും. 2029 മാരുതി ബ്രെസയിൽ ബ്രാൻഡ് സ്വന്തമായി വികസിപ്പിച്ചെടുത്ത 1.2 ലിറ്റർ, 3-സിലിണ്ടർ Z12E പെട്രോൾ എഞ്ചിൻ, ശക്തമായ ഹൈബ്രിഡ് സിസ്റ്റം എന്നിവ ഉൾപ്പെടും എന്നാണ് റിപ്പോർട്ടുകൾ. എങ്കിലും ഇത് ഉയർന്ന ട്രിമ്മുകളിൽ മാത്രം പരിമിതപ്പെടുത്തിയേക്കാം. നിലവിലുള്ള പെട്രോൾ എഞ്ചിനും ഓഫറിൽ ഉണ്ടായിരിക്കാം.

പുതിയ കിയ സോണെറ്റ്

പുതുതലമുറ കിയ സോണറ്റ് പൂർണ്ണമായും പുനർരൂപകൽപ്പന ചെയ്ത എക്സ്റ്റീരിയർ, കൂടുതൽ ഉയർന്ന നിലവാരമുള്ള ഇന്റീരിയർ, പുതിയ സാങ്കേതികവിദ്യ എന്നിവയുമായി വരാൻ സാധ്യതയുണ്ട്. മെക്കാനിക്കൽ മാറ്റങ്ങളൊന്നും പ്രതീക്ഷിക്കുന്നില്ല. 1.2 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.0 ലിറ്റർ ടർബോ പെട്രോൾ, 1.5 ലിറ്റർ ടർബോ ഡീസൽ എഞ്ചിൻ എന്നിവയുമായി ഈ മോഡൽ തുടർന്നും വരും.

പുതിയ മഹീന്ദ്ര XUV 3XO

2025 ഓഗസ്റ്റ് 15-ന് പ്രദർശിപ്പിച്ച വിഷൻ എക്സ് ആശയത്തെ അടിസ്ഥാനമാക്കിയുള്ളതായിരിക്കും പുതിയ തലമുറ മഹീന്ദ്ര XUV 3XO. ഒന്നിലധികം പവർട്രെയിനുകളുമായി പൊരുത്തപ്പെടുന്ന പുതിയ എൻയു ഐക്യു പ്ലാറ്റ്‌ഫോമിലേക്കും ഇത് മാറിയേക്കാം .