ആർട്ടിക് സർക്കിളിൽ തണുത്ത കാലാവസ്ഥയിൽ കിയ സെൽറ്റോസ് പരീക്ഷണത്തിൽ, ഒപ്പം ഹൈബ്രിഡ് സംവിധാനവും

ആർട്ടിക് സർക്കിളിൽ തണുത്ത കാലാവസ്ഥയിൽ പരീക്ഷണം നടത്തുന്ന പുതിയ കിയ സെൽറ്റോസ് 2026 ജനുവരിയിൽ അവതരിപ്പിക്കുമെന്ന് പ്രതീക്ഷിക്കുന്നു. പുതിയ ഡിസൈൻ, ഹൈബ്രിഡ് പവർട്രെയിൻ, ഇ-എഡബ്ല്യുഡി ഓപ്ഷൻ എന്നിവയുമായാണ് പുതിയ മോഡൽ വരുന്നത്.

ഇന്ത്യൻ റോഡുകളിൽ നിരവധി തവണ പരീക്ഷണ ഓട്ടത്തിന് വിധേയമായ പുതുതലമുറ സെൽറ്റോസ് എസ്‌യുവി കിയ വികസിപ്പിച്ചുകൊണ്ടിരിക്കുകയാണ്.  ഇപ്പോൾ ആർട്ടിക് സർക്കിളിൽ തണുത്ത കാലാവസ്ഥയിൽ പരീക്ഷണം നടത്തുകയാണ് പുതിയ കിയ സെൽറ്റോസ് എന്നാണ് റിപ്പോർട്ടുകൾ. ഔദ്യോഗിക ലോഞ്ച് ടൈംലൈൻ ഇതുവരെ വെളിപ്പെടുത്തിയിട്ടില്ലെങ്കിലും, 2026 ജനുവരിയിൽ പുതിയ തലമുറ കിയ സെൽറ്റോസ് അവതരിപ്പിക്കുമെന്ന് കൊറിയൻ മാധ്യമങ്ങൾ റിപ്പോർട്ട് ചെയ്യുന്നു. ഇതാ വാഹനത്തെപ്പറ്റി ചില കാര്യങ്ങൾ അറിയാം.

പുതിയ തലമുറ സെൽറ്റോസിൽ പൂർണ്ണമായും പരിഷ്കരിച്ച ഫ്രണ്ട് ഫാസിയ ഉണ്ടാകും, പുതിയ ഗ്രിൽ ഡിസൈനും പുതിയ എയർ ഡാമുകൾ ഉൾക്കൊള്ളുന്ന ഫ്രണ്ട് ബമ്പറും ഇതിൽ ഉൾപ്പെടുന്നു. പുതിയ ഹെഡ്‌ലാമ്പ് സജ്ജീകരണവും ഇതിലുണ്ടാകും. പിന്നിൽ, എസ്‌യുവിക്ക് കൂടുതൽ ബോക്‌സിയർ പ്രൊഫൈൽ ഉണ്ടായിരിക്കും, പുതിയ ടെയിൽ-ലൈറ്റുകൾ EV5 ൽ നിന്ന് പ്രചോദനം ഉൾക്കൊള്ളും. എസ്‌യുവിയുടെ ക്യാബിന്റെ ഉള്ളിലും വലിയ മാറ്റങ്ങൾ ഉണ്ടാകും. പുതിയ കാർണിവലുമായും ഇവി5യുമായും ഇത് ക്യാബിൻ ലേഔട്ട് പങ്കിടും. സോഫ്റ്റ്-ടച്ച് മെറ്റീരിയലുകളും ലെതറെറ്റ് ഫിനിഷും ഉള്ള ഒരു ലെയേർഡ് ഡാഷ്‌ബോർഡുമായാണ് എസ്‌യുവി വരുന്നത്. ഇൻഫോടെയ്ൻമെന്റിനും ഡ്രൈവർ ഡിസ്‌പ്ലേയ്ക്കുമായി കാർണിവൽ പോലുള്ള ഡ്യുവൽ സ്‌ക്രീൻ സജ്ജീകരണം ഇതിൽ ഘടിപ്പിക്കും. വെന്റിലേഷൻ ഫംഗ്ഷനോടുകൂടിയ HUD, ഇലക്ട്രിക്കലി അഡ്ജസ്റ്റ് ചെയ്യാവുന്ന ഫ്രണ്ട് സീറ്റുകൾ, ഓട്ടോമാറ്റിക് ക്ലൈമറ്റ് കൺട്രോൾ, പനോരമിക് സൺറൂഫ് തുടങ്ങിയ സവിശേഷതകൾ എസ്‌യുവി തുടർന്നും വാഗ്ദാനം ചെയ്യും.

പുതിയ സെൽറ്റോസിൽ ആദ്യമായി ഹൈബ്രിഡ് പവർട്രെയിൻ, ഇ-എഡബ്ല്യുഡി ഓപ്ഷനുകൾ ഉണ്ടായിരിക്കുമെന്ന് റിപ്പോർട്ടുണ്ട്. കൊറിയയിലും ലോകത്തിന്റെ മറ്റു ഭാഗങ്ങളിലും വിൽപ്പനയ്‌ക്കെത്തുന്ന അഞ്ച് തരം എസ്‌യുവികളിലും ആർവികളിലും തങ്ങളുടെ നിരയെ വൈദ്യുതീകരിക്കാനുള്ള കിയയുടെ തന്ത്രത്തിന്റെ ഭാഗമായിരിക്കും സെൽറ്റോസ് ഹൈബ്രിഡ്. അടുത്ത വർഷം ഓഗസ്റ്റ് മുതൽ കിയ ഓട്ടോലാൻഡ് ഗ്വാങ്‌ജു ഫാക്ടറിയിൽ ഹൈബ്രിഡ് മോഡലിന്റെ വൻതോതിലുള്ള ഉത്പാദനം ആരംഭിക്കുമെന്നാണ് റിപ്പോ‍ട്ടുകൾ. 2019 മുതൽ, കിയ സെൽറ്റോസ് തിരഞ്ഞെടുത്ത അന്താരാഷ്ട്ര വിപണികളിൽ വിൽപ്പനയ്ക്കുണ്ട്. 

പെട്രോൾ, ഹൈബ്രിഡ് പവർട്രെയിനുകൾക്കൊപ്പം പുതുതലമുറ കിയ സെൽറ്റോസ് ലഭ്യമാകുമെന്ന് പുതിയ റിപ്പോർട്ട് അവകാശപ്പെടുന്നു. ഹ്യുണ്ടായി കോന ഹൈബ്രിഡിലും കിയ നിരോയിലും ലഭ്യമായ 141 എച്ച്പി, 1.6 ലിറ്റർ ഹൈബ്രിഡ് സിസ്റ്റം ഹൈബ്രിഡ് യൂണിറ്റിന് ലഭിക്കാൻ സാധ്യതയുണ്ട്.  സെൽറ്റോസ് ഹൈബ്രിഡിനായി കിയ ഒരു സമർപ്പിത ഇലക്ട്രോണിക് ഓൾ-ടൈം ഫോർ-വീൽ-ഡ്രൈവ് (E-AWD) സിസ്റ്റം വികസിപ്പിച്ചുകൊണ്ടിരിക്കുകയാണ്. യൂറോപ്യൻ വിപണിയെ ലക്ഷ്യം വച്ചായിരിക്കും ഈ സിസ്റ്റം. 

പുതിയ കിയ സെൽറ്റോസ് 2026 ജനുവരിയിൽ ആഗോളതലത്തിൽ അരങ്ങേറ്റം കുറിക്കുമെന്നാണ് റിപ്പോർട്ടുകൾ. 2026 ന്റെ ആദ്യ പാദത്തിൽ ഇന്ത്യയിൽ ലോഞ്ച് ചെയ്യുമെന്ന് പ്രതീക്ഷിക്കുന്നു. മുൻ മാധ്യമ റിപ്പോർട്ടുകൾ പ്രകാരം അടുത്ത സെൽറ്റോസ് ദീപാവലിയോടടുത്ത് ഉത്സവ സീസണിൽ ഇന്ത്യയിൽ അരങ്ങേറ്റം കുറിക്കും.