പുതിയ ഡസ്റ്ററിനായുള്ള കൗണ്ട്ഡൗൺ തുടങ്ങി; ലോഞ്ചിന് ഇനി ഇത്രയും ദിവസങ്ങൾ മാത്രം

ഇന്ത്യൻ വിപണിയിൽ ഏറെ ജനപ്രിയമായിരുന്ന റെനോ ഡസ്റ്റർ 2026 ജനുവരി 26-ന് തിരിച്ചെത്തുന്നു. പുതിയ തലമുറ ഡസ്റ്റർ കരുത്തുറ്റ രൂപകൽപ്പന, 1.2 ലിറ്റർ മൈൽഡ്-ഹൈബ്രിഡ് എഞ്ചിൻ, ADAS പോലുള്ള ആധുനിക ഫീച്ചറുകൾ എന്നിവയുമായിട്ടായിരിക്കും എത്തുക. 

2026 ജനുവരി 26 ന് റെനോ ഡസ്റ്റർ ഇന്ത്യയിൽ തിരിച്ചെത്തും. ഈ ദശകത്തിന്റെ ആരംഭം വരെ ഇന്ത്യയിൽ വിറ്റഴിക്കപ്പെട്ട ഏറ്റവും ജനപ്രിയ എസ്‌യുവിയായിരുന്നു റെനോ ഡസ്റ്റർ. അതുകൊണ്ടുതന്നെ പുതുതലമുറ റെനോ ഡസ്റ്ററിനുമേൽ വലിയ പ്രതീക്ഷയുണ്ട്. ശക്തമായ രൂപകൽപ്പനയ്ക്കും ഡീസൽ എഞ്ചിനും പേരുകേട്ടതാണ് റെനോ ഡസ്റ്റർ. കുറച്ച് വർഷങ്ങൾക്ക് മുമ്പ് ഇന്ത്യയിൽ ഈ മോഡൽ നിർത്തലാക്കിയെങ്കിലും രാജ്യത്തെ യൂസ്‍ഡ് കാർ വിപണിയിൽ റെനോ ഡസ്റ്ററുകൾ ശ്രദ്ധ ആകർഷിക്കുന്നത് തുടരുന്നു. ഈ എസ്‌യുവിയുടെ തിരിച്ചുവരവിന്റെ സ്ഥിരീകരണം രാജ്യത്ത് മോഡലിന് വീണ്ടും ആവേശം പകർന്നിട്ടുണ്ട്.

രൂപകൽപ്പനയും അളവുകളും

മുൻ മോഡലിനേക്കാൾ ശക്തമായ ഒരു ഘടനയാണ് പുതിയ തലമുറ റെനോ ഡസ്റ്ററിന്റെ സവിശേഷത. എസ്‌യുവിയുടെ കരുത്തുറ്റ രൂപം മുമ്പത്തേക്കാൾ വലുതും വീതിയുള്ളതും കൂടുതൽ ബോൾഡുമായി കാണപ്പെടുന്നു. ഇന്ത്യയിൽ പുറത്തിറക്കിയ ഡസ്റ്റർ അതേ രൂപകൽപ്പനയും ഒതുക്കമുള്ള അളവുകളും നിലനിർത്തുമെന്ന് പ്രതീക്ഷിക്കുന്നു, ഇത് അതിന്റെ വിലയ്ക്ക് നിർണായകമാണ്.

എഞ്ചിൻ

ഇന്ത്യ-സ്പെക്ക് റെനോ ഡസ്റ്ററിൽ 128 bhp പരമാവധി പവർ ഉത്പാദിപ്പിക്കാൻ കഴിവുള്ള 1.2 ലിറ്റർ മൈൽഡ്-ഹൈബ്രിഡ് പവർട്രെയിൻ ഉണ്ടാകുമെന്ന് പ്രതീക്ഷിക്കുന്നു. ഇത് എസ്‌യുവിയെ താങ്ങാനാവുന്ന വിലയിലാക്കുകയും രാജ്യത്തെ പ്രാദേശിക ഉൽ‌പാദനം സുഗമമാക്കുകയും ചെയ്യും. അന്താരാഷ്ട്ര വിപണി മോഡലിൽ 1.6 ലിറ്റർ എഞ്ചിൻ, രണ്ട് ഇലക്ട്രിക് മോട്ടോറുകൾ, 1.2 kWh ബാറ്ററി എന്നിവയുള്ള ഒരു പൂർണ്ണ ഹൈബ്രിഡ് പതിപ്പ് ഉൾപ്പെടുത്തിയിട്ടണ്ട്. എങ്കിലും, ഇന്ത്യയിൽ ഇത് ലോഞ്ച് ചെയ്യാൻ സാധ്യതയില്ല എന്നാണ് റിപ്പോർട്ടുകൾ.

ഇന്‍റീരിയറും സവിശേഷതകളും

മുൻ മോഡലിനെ അപേക്ഷിച്ച് പുതിയതും വലുതുമായ ഫ്ലോട്ടിംഗ് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം പുതുതലമുറ റെനോ ഡസ്റ്ററിൽ ഉണ്ട്. കൂടാതെ, ADAS, 360-ഡിഗ്രി സറൗണ്ട്-വ്യൂ ക്യാമറ, കൂടുതൽ വിശാലമായ ക്യാബിൻ, വലിയ ബൂട്ട് സ്പേസ് എന്നിവ ഇതിൽ ഉൾപ്പെടും. എന്നിരുന്നാലും, ഇന്ത്യ-സ്പെക്ക് മോഡലിൽ ലഭ്യമായ സവിശേഷതകളെക്കുറിച്ചുള്ള വിശദാംശങ്ങൾ ഇതുവരെ വെളിപ്പെടുത്തിയിട്ടില്ല.