പുതിയ ടാറ്റ സിയറ: കരുത്തിന്റെ നാല് മുഖങ്ങൾ

2025-ഓടെ ടാറ്റ സിയറ പുതിയ രൂപത്തിൽ വിപണിയിലെത്തും. പെട്രോൾ, ഡീസൽ, ഇലക്ട്രിക് ഉൾപ്പെടെ നാല് എഞ്ചിൻ ഓപ്ഷനുകളോടെ എത്തുന്ന ഈ എസ്‌യുവി, ഹ്യുണ്ടായി ക്രെറ്റ പോലുള്ള വാഹനങ്ങളുമായി മത്സരിക്കും.

2030 സാമ്പത്തിക വർഷത്തോടെ പുതിയ സിയറയിൽ തുടങ്ങി ഏഴ് പുതിയ നെയിംപ്ലേറ്റുകൾ അവതരിപ്പിക്കുമെന്ന് ടാറ്റ മോട്ടോഴ്‌സ് സ്ഥിരീകരിച്ചു. 2025 ടാറ്റ സിയറയെക്കുറിച്ച് ഇതിനകം തന്നെ ധാരാളം വിവരങ്ങൾ പുറത്തുവന്നിട്ടുണ്ട്. ഇടത്തരം എസ്‌യുവി വിഭാഗത്തിൽ, ഹ്യുണ്ടായി ക്രെറ്റ, പുതുതായി പുറത്തിറക്കിയ മാരുതി വിക്ടോറിസ്, മാരുതി ഗ്രാൻഡ് വിറ്റാര, കിയ സെൽറ്റോസ് തുടങ്ങിയ കാറുകളെ പുതിയ സിയറ നേരിടും.

മൾട്ടി-പവർട്രെയിൻ തന്ത്രം

സിയറയ്ക്കായി ടാറ്റ മൾട്ടി-പവർട്രെയിൻ തന്ത്രം സ്വീകരിക്കുകയും പെട്രോൾ നാച്ചുറലി ആസ്പിറേറ്റഡ്/ടർബോചാർജ്ഡ്, ഡീസൽ, ഇലക്ട്രിക് എന്നിങ്ങനെ നാല് എഞ്ചിൻ ഓപ്ഷനുകളോടെ അവതരിപ്പിക്കുകയും ചെയ്യും. . സിയറ ഐസിഇയിൽ പ്രവർത്തിക്കുന്ന (പെട്രോൾ & ഡീസൽ) ഇലക്ട്രിക് പതിപ്പുകളുടെയും ഔദ്യോഗിക ലോഞ്ച് തീയതികൾ ഇതുവരെ പ്രഖ്യാപിച്ചിട്ടില്ല. എങ്കിലും, ഐസിഇ മോഡലുകൾ 2025 നവംബറിൽ വിൽപ്പനയ്‌ക്കെത്താൻ സാധ്യതയുണ്ട്. അതേസമയം ഇവി പതിപ്പ് 2025 ജനുവരിയിൽ റോഡുകളിൽ എത്തും.

വാഹനത്തിന്‍റെ വിശദമായ എഞ്ചിൻ സവിശേഷതകൾ ഇപ്പോഴും രഹസ്യമാണ്. എങ്കിലും, സിയറയിൽ തുടക്കത്തിൽ പുതിയ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനും പിന്നീട് 1.5 ലിറ്റർ ടർബോചാർജ്‍ഡ് എഞ്ചിനും ഉണ്ടാകുമെന്ന് വിവിധ റിപ്പോർട്ടുകൾ സൂചിപ്പിക്കുന്നു. നാച്ചുറലി ആസ്പിറേറ്റഡ് ഗ്യാസോലിൻ യൂണിറ്റ് എൻട്രി ലെവൽ വേരിയന്റുകൾക്ക് കരുത്ത് പകരും. ഇത് കുറഞ്ഞ പ്രാരംഭ വിലയിൽ എസ്‌യുവി വാഗ്ദാനം ചെയ്യാൻ ടാറ്റയെ അനുവദിക്കുന്നു.

ഉയർന്ന വകഭേദങ്ങളിൽ 1.5 ലിറ്റർ TGDi ഡയറക്ട് ഇഞ്ചക്ഷൻ ടർബോ പെട്രോൾ എഞ്ചിൻ ഉണ്ടായിരിക്കും. ഈ എഞ്ചിൻ 5,000 ആ‍ർപിഎമ്മിൽ പരമാവധി 170 bhp പവറും 2,000 rpm മുതൽ 3,500 rpm വരെ 280 Nm ടോർക്കും ഉത്പാദിപ്പിക്കും. രണ്ട് പെട്രോൾ എഞ്ചിനുകളും മാനുവൽ, ഓട്ടോമാറ്റിക് ഗിയർബോക്സ് ഓപ്ഷനുകളിൽ ലഭ്യമാകും. സിയറ ഡീസൽ എഞ്ചിനിൽ 2.0 ലിറ്റർ ക്രയോടെക് എഞ്ചിൻ, 6 സ്പീഡ് മാനുവൽ അല്ലെങ്കിൽ 6 സ്പീഡ് ഓട്ടോമാറ്റിക് ട്രാൻസ്മിഷനുകൾ എന്നിവ ഉണ്ടായിരിക്കുമെന്ന് പ്രതീക്ഷിക്കുന്നു. ഈ മോട്ടോർ 170 bhp കരുത്തും 350 Nm ടോർക്കും ഉത്പാദിപ്പിക്കുന്നു.

ഹാരിയർ ഇവിയിൽ നിന്ന് 65kWh, 75kWh ബാറ്ററി പായ്ക്കുകൾ (QWD അല്ലെങ്കിൽ AWD വേരിയന്റുകൾക്കായി നീക്കിവച്ചിരിക്കുന്നു) സിയറ ഇലക്ട്രിക് എസ്‌യുവി കടമെടുത്തേക്കാം. സിയറ ഇവിയും ഓൾ-വീൽ ഡ്രൈവ് സിസ്റ്റവുമായി വരുമെന്നും പൂർണ്ണ ചാർജിൽ 500 കിലോമീറ്ററിലധികം ഡ്രൈവിംഗ് റേഞ്ച് വാഗ്ദാനം ചെയ്യുമെന്നും പ്രതീക്ഷിക്കുന്നു.