ചെറു കാറുകൾ വാങ്ങാൻ ആളില്ല, മാരുതിയുടെ വിൽപ്പന കുത്തനെ ഇടിഞ്ഞു

മാരുതി സുസുക്കിയുടെ ഉത്പാദനം ജൂണിൽ അഞ്ച് വർഷത്തെ ഏറ്റവും താഴ്ന്ന നിലയിലെത്തി. ചെറുകാറുകളുടെ ആവശ്യക്കാർ കുറഞ്ഞതും എസ്‌യുവികളിലേക്കുള്ള മാറ്റവുമാണ് ഇതിന് കാരണം. ഇലക്ട്രിക് വാഹന വിപണിയിലെ മാരുതിയുടെ പിന്നോക്കാവസ്ഥയും ഒരു ഘടകമാണ്.

ഇന്ത്യയിലെ ഏറ്റവും വലിയ വാഹന നിർമ്മാതാക്കളായ മാരുതി സുസുക്കി ഇന്ത്യ ലിമിറ്റഡിന്റെ ഉത്പാദനം ജൂണിൽ അഞ്ച് വർഷത്തെ ഏറ്റവും താഴ്ന്നതായി റിപ്പോ‍ർട്ട്. ചെറുകാറുകൾക്കും കോംപാക്റ്റ് സെഡാനുകൾക്കുമുള്ള ആവശ്യക്കാർ കുറഞ്ഞതാണ് ഇതിന് കാരണം . സാധാരണയായി ജൂണിൽ രണ്ട് വർഷത്തിലൊരിക്കൽ അറ്റകുറ്റപ്പണികൾക്കായി മാരുതി പ്ലാന്റുകൾ അടച്ചുപൂട്ടാറുണ്ട് , എന്നാൽ ഈ വർഷത്തെ കണക്ക് 2020 ന് ശേഷമുള്ള ഏറ്റവും താഴ്ന്ന മാസമാണ് . കമ്പനിയുടെ പ്രതിമാസ ഉൽപാദന റിപ്പോർട്ട് അനുസരിച്ച് , 2021 ജൂണിൽ 163,037 ൽ നിന്ന് ഉത്പാദനം 23 ശതമാനം ഇടിഞ്ഞ് 125,392 ആയി .

ഒരുകാലത്ത് മാരുതിയുടെ പ്രധാന വാഹനമായിരുന്ന ചെറുകാർ വിഭാഗത്തിലെ ഡിമാൻഡ് കുറയുന്നതാണ് ഈ ഇടിവ് പ്രതിഫലിപ്പിക്കുന്നത് . ഇപ്പോൾ ആളുകൾ സ്‌പോർട്‌സ് യൂട്ടിലിറ്റി വാഹനങ്ങളിലേക്കും പ്രീമിയം മോഡലുകളിലേക്കും തിരിയുന്നു . ഇന്ത്യൻ ഓട്ടോമൊബൈൽ മാനുഫാക്‌ചറേഴ്‌സ് സൊസൈറ്റി അഥവാ സിയാം പുറത്തുവിട്ട കണക്കുകൾ പ്രകാരം , മൊത്തം വിൽപ്പനയുടെ 66 ശതമാനവും എസ്‌യുവികളാണ് .​​​​​​​​​​​​​​​

ഇതിനുപുറമെ, മാരുതിയുടെ മോഡൽ ശ്രേണിയിൽ ഇലക്ട്രിക് വാഹനങ്ങളുടെ അഭാവവും ഉണ്ട്. ഇതുമൂലം ഇലക്ട്രിക് വാഹനങ്ങളിൽ മാരുതി പിന്നിലാണ്. ടാറ്റ മോട്ടോഴ്‌സും മഹീന്ദ്ര ആൻഡ് മഹീന്ദ്രയും തുടർച്ചയായി വളർച്ച കൈവരിക്കുന്നു. ഡീല‍ഷിപ്പുകളിലെ ഇൻവെന്ററി ലെവൽ, പ്രത്യേകിച്ച് ആൾട്ടോ, എസ്-പ്രെസോ, ഡിസയർ, സെലെറിയോ തുടങ്ങിയ മോഡലുകൾക്ക്, ക്രമേണ വർദ്ധിച്ചുകൊണ്ടിരിക്കുകയാണെന്നും അമിതമായ സ്റ്റോക്ക് ഒഴിവാക്കാൻ വാഹനം അയ്ക്കുന്നത് നിയന്ത്രിക്കാൻ കമ്പനിയെ നിർബന്ധിതരാക്കുന്നുവെന്നും ഡീലർമാർ പറയുന്നു.

ജൂൺ പാദത്തിൽ മാരുതിയുടെ ആഭ്യന്തര വിൽപ്പനയിൽ 4.5 ശതമാനം ഇടിവുണ്ടായതായിട്ടാണ് റിപ്പോ‍ർട്ടുകൾ. ഇതിൽ ഏറ്റവും ചെറിയ മോഡലുകളുടെ വിൽപ്പനയിൽ 36 ശതമാനം വൻ ഇടിവാണ് ഉണ്ടായത്. അതേസമയം സിയാം പുറത്തുവിട്ട കണക്കുകൾ പ്രകാരം , ഏപ്രിൽ-ജൂൺ കാലയളവിൽ ഇന്ത്യയിലെ പാസഞ്ചർ വാഹന വിൽപ്പന കഴിഞ്ഞ വർഷത്തെ അപേക്ഷിച്ച് 1.4 ശതമാനം ഇടിഞ്ഞ് ഒരുദശലക്ഷം യൂണിറ്റിലെത്തി.