സ്കോഡ കാർ വാങ്ങാൻ പ്ലാനുണ്ടോ? ഈ ഒക്ടോബർ മുതൽ മാറ്റങ്ങൾ!

സ്കോഡ ഓട്ടോ ഇന്ത്യ ഒക്ടോബർ 1 മുതൽ തങ്ങളുടെ കാറുകൾക്ക് 20,000 രൂപ വരെ വില വർധിപ്പിക്കുന്നു. ഇതിനൊപ്പം പുതിയ സ്ലാവിയ ഫെയ്‌സ്‌ലിഫ്റ്റ്, കുഷാഖ്, സൂപ്പർബ് ഡീസൽ തുടങ്ങിയ മോഡലുകൾ വിപണിയിലെത്തിക്കാനും കമ്പനി ഒരുങ്ങുകയാണ്. മികച്ച വിൽപ്പന നേട്ടങ്ങളോടെയാണ് സ്കോഡയുടെ ഈ പുതിയ ചുവടുവെപ്പുകൾ.

പുതിയ സ്കോഡ കാർ വാങ്ങാൻ പദ്ധതിയിടുന്നവർക്ക് അധികം പണം ചെലവഴിക്കേണ്ടിവരും. സ്കോഡ ഓട്ടോ ഇന്ത്യയുടെ മുഴുവൻ മോഡൽ നിരയുടെയും വില വർധിപ്പിക്കാൻ ഒരുങ്ങുകയാണ്. ഒക്ടോബർ 1 മുതൽ പുതിയ വിലകൾ പ്രാബല്യത്തിൽ വരും. ഇൻപുട്ട് ചെലവുകളും പ്രവർത്തന ചെലവുകളും വർധിച്ചതാണ് വില കൂട്ടാനുള്ള കാരണമെന്ന് കമ്പനി വ്യക്തമാക്കി.

വിലയിൽ 1.2% വരെ വർധന

സ്കോഡയുടെ വിവിധ മോഡലുകൾക്കും വേരിയന്റുകൾക്കും വ്യത്യസ്ത നിരക്കിലായിരിക്കും വില വർധിപ്പിക്കുക. പരമാവധി 20000 രൂപ വരെയാണ് ഒരു കാറിന് വില കൂടുക. നിലവിലെ എക്സ്-ഷോറൂം വിലയിൽ 1.2% വരെ വർധനയുണ്ടാകുമെന്നാണ് കമ്പനി അറിയിച്ചിരിക്കുന്നത്. ഇന്ത്യയിലെ സ്കോഡയുടെ നിലവിലെ മോഡൽ നിരയിൽ കൈലാഖ്, കുഷാഖ്, സ്ലാവിയ, കൊഡിയാക്ക് തുടങ്ങിയ വാഹനങ്ങളാണുള്ളത്. 2026ൽ പുതിയ മോഡലുകളും വേരിയന്റുകളും ഫീച്ചർ അപ്‌ഡേറ്റുകളും കമ്പനി അവതരിപ്പിച്ചിരുന്നു.

പുതിയ കുഷാഖും സ്ലാവിയ ഫെയ്‌സ്‌ലിഫ്റ്റും

ഈ വർഷം പുതിയ കുഷാഖ് സ്കോഡ വിപണിയിലെത്തിച്ചു. സ്ലാവിയ ഫെയ്‌സ്‌ലിഫ്റ്റിന്റെ അവതരണത്തിനുള്ള ഒരുക്കങ്ങളും പുരോഗമിക്കുകയാണ്. ഒക്ടോബർ 6ന് പുതിയ സ്ലാവിയ ഫെയ്‌സ്‌ലിഫ്റ്റ് വിപണിയിലെത്തുമെന്നാണ് റിപ്പോർട്ടുകൾ. പുതിയ സ്ലാവിയയിൽ 8 സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്സ്, 360 ഡിഗ്രി ക്യാമറ, പിൻ സീറ്റുകളിലെ മസാജ് സംവിധാനം തുടങ്ങിയ ഫീച്ചറുകൾ ലഭിക്കും. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം ഉൾപ്പെടെയുള്ള പുതിയ സംവിധാനങ്ങളോടെ കൊഡിയാക്കും അപ്‌ഡേറ്റ് ചെയ്തിട്ടുണ്ട്. അടുത്തിടെ കുഷാഖ് സ്‌പോർട്‌ലൈൻ വേരിയന്റും കമ്പനി അവതരിപ്പിച്ചിരുന്നു. 11.32 ലക്ഷം രൂപ മുതലാണ് ഇതിന്റെ എക്സ്-ഷോറൂം വില.

വിൽപ്പനയിലും മുന്നേറ്റം

2025ൽ ഇന്ത്യയിൽ ഏറ്റവും ഉയർന്ന വാർഷിക വിൽപ്പനയാണ് സ്കോഡ ഓട്ടോ ഇന്ത്യ രേഖപ്പെടുത്തിയത്. ആ വർഷം 72665 കാറുകൾ വിറ്റു. 2026ലും വിൽപ്പനയിൽ വളർച്ച തുടരുകയാണ്. ഓഗസ്റ്റ് വരെയായി 50000 യൂണിറ്റിലധികം വിൽപ്പന നേടാൻ കമ്പനിക്ക് കഴിഞ്ഞു. കൈലാഖ്, കുഷാഖ്, സ്ലാവിയ എന്നിവയാണ് ഇന്ത്യയിൽ പ്രാദേശികമായി നിർമിക്കുന്ന പ്രധാന സ്കോഡ മോഡലുകൾ. ഇന്ത്യയിലെ പ്രാദേശിക നിർമാണ പ്രവർത്തനങ്ങളിലൂടെ ഇതുവരെ 250000ലധികം സ്കോഡ കാറുകൾ വിറ്റതായി കമ്പനി വ്യക്തമാക്കുന്നു. കൈലാഖിന്റെ വിൽപ്പനയും 75000 യൂണിറ്റ് പിന്നിട്ടിട്ടുണ്ട്.

പുതിയ സൂപ്പർബ് വരുന്നു

പുതിയ തലമുറ സൂപ്പർബിനെ ഇന്ത്യൻ വിപണിയിലെത്തിക്കാനുള്ള ഒരുക്കത്തിലാണ് സ്കോഡ. പുതിയ സൂപ്പർബിലൂടെ ഡീസൽ പവർ സെഡാൻ വിഭാഗത്തിലേക്ക് കമ്പനി വീണ്ടും പ്രവേശിക്കും. 148 പിഎസ് പവറും 360 എൻഎം ടോർക്കും ഉൽപ്പാദിപ്പിക്കുന്ന 2.0 ലിറ്റർ ടിഡിഐ ഡീസൽ എൻജിനായിരിക്കും പുതിയ സൂപ്പർബിന്റെ പ്രധാന സവിശേഷത. 7 സ്പീഡ് ഡിഎസ്ജി ഓട്ടോമാറ്റിക് ഗിയർബോക്സും ഫ്രണ്ട് വീൽ ഡ്രൈവും ഈ എൻജിനൊപ്പം ലഭിക്കും. പുതിയ സൂപ്പർബ് അടുത്ത വർഷം ഇന്ത്യൻ വിപണിയിലെത്തുമെന്നാണ് പ്രതീക്ഷിക്കുന്നത്.