ടൊയോട്ട ഇന്നോവ ഹൈക്രോസ് ഫെയ്‌സ്‌ലിഫ്റ്റ്: വമ്പൻ മാറ്റങ്ങൾ?

ടൊയോട്ട ഇന്നോവ ഹൈക്രോസിന്റെ ഫെയ്‌സ്‌ലിഫ്റ്റ് പതിപ്പ് ഉടൻ ഇന്ത്യൻ വിപണിയിൽ എത്തിയേക്കും. ഹിലക്‌സിൽ നിന്ന് പ്രചോദനം ഉൾക്കൊണ്ട ഡിസൈനും 12.3 ഇഞ്ച് ടച്ച്‌സ്‌ക്രീൻ ഉൾപ്പെടെയുള്ള പുതിയ ഫീച്ചറുകളും വാഹനത്തിൽ പ്രതീക്ഷിക്കുന്നു. എന്നാൽ നിലവിലെ 2.0 ലിറ്റർ പെട്രോൾ, ഹൈബ്രിഡ് എൻജിനുകളിൽ മാറ്റമുണ്ടാകില്ല.

ഇന്ത്യൻ വിപണിയിൽ ജനപ്രിയമായ ടൊയോട്ട ഇന്നോവ ഹൈക്രോസിന് മുഖംമിനുക്കൽ ഒരുങ്ങുന്നു. ഇന്നോവ ഹൈക്രോസ് ഫെയ്‌സ്‌ലിഫ്റ്റ് ഈ വർഷം അവസാനത്തോടെ രാജ്യത്ത് അവതരിപ്പിച്ചേക്കുമെന്നാണ് റിപ്പോർട്ടുകൾ. ഡിസൈൻ മാറ്റങ്ങൾക്കൊപ്പം പുതിയ ഫീച്ചറുകളും ടെക്‌നോളജി അപ്‌ഗ്രേഡുകളും വാഹനത്തിൽ പ്രതീക്ഷിക്കുന്നുണ്ട്. കഴിഞ്ഞ കുറച്ച് മാസങ്ങളായി ഫെയ്‌സ്‌ലിഫ്റ്റ് പതിപ്പിന്റെ കാമഫ്ലേജ് ചെയ്ത ടെസ്റ്റ് വാഹനങ്ങൾ വിവിധയിടങ്ങളിൽ കണ്ടെത്തിയിട്ടുണ്ട്. ഇതോടെ പുതിയ മോഡലിന്റെ അവതരണം അടുത്തിരിക്കുകയാണെന്ന സൂചനകളാണ് ലഭിക്കുന്നത്.

ഹിലക്‌സിന്റെ ഡിസൈൻ പ്രചോദനം

പുതിയ ഇന്നോവ ഹൈക്രോസിൽ ഏറ്റവും ശ്രദ്ധേയമായ മാറ്റം മുൻഭാഗത്തായിരിക്കുമെന്നാണ് സൂചന. ടെസ്റ്റ് വാഹനങ്ങളിൽ നിന്നുള്ള വിവരങ്ങളും പുറത്തുവന്ന ഡിസൈൻ പേറ്റന്റുകളും പരിശോധിക്കുമ്പോൾ ടൊയോട്ട ഹിലക്‌സിൽ നിന്ന് പ്രചോദനം ഉൾക്കൊണ്ട മുൻഭാഗം പുതിയ ഹൈക്രോസിന് ലഭിച്ചേക്കാം. പുതിയ ഫ്രണ്ട് ഗ്രില്ലും ബമ്പറിൽ ഹണികോമ്പ് പാറ്റേണും ഉൾപ്പെടുന്ന ഡിസൈനാണ് പ്രതീക്ഷിക്കുന്നത്. ഹെഡ്‌ലൈറ്റുകളിലും മാറ്റങ്ങൾ ഉണ്ടാകും. പുതിയ അലോയ് വീലുകൾ ഉൾപ്പെടെയുള്ള ചെറിയ കോസ്മെറ്റിക് പരിഷ്‌കാരങ്ങളും ലഭിച്ചേക്കും. എന്നാൽ ഫെയ്‌സ്‌ലിഫ്റ്റ് പതിപ്പാണെന്നതിനാൽ വാഹനത്തിന്റെ അടിസ്ഥാന ബോഡി ഷെയ്പ്പിൽ വലിയ മാറ്റങ്ങൾ പ്രതീക്ഷിക്കുന്നില്ല. നിലവിലെ ഇന്നോവ ഹൈക്രോസിന്റെ എംപിവി രൂപം തന്നെ നിലനിർത്തിയേക്കും.

12.3 ഇഞ്ച് ടച്ച്‌സ്‌ക്രീൻ എത്തും?

ഇന്റീരിയറിലും പ്രധാനപ്പെട്ട അപ്‌ഗ്രേഡുകൾ പ്രതീക്ഷിക്കുന്നുണ്ട്. ക്യാബിന്റെ അടിസ്ഥാന ലേഔട്ട് നിലവിലെ മോഡലിന് സമാനമായി തുടർന്നേക്കുമെങ്കിലും ഇൻഫോടെയ്ൻമെന്റ് സംവിധാനത്തിൽ വലിയ മാറ്റം വരാൻ സാധ്യതയുണ്ട്. നിലവിൽ 8 ഇഞ്ച്, 10.1 ഇഞ്ച് ടച്ച്‌സ്‌ക്രീൻ ഓപ്ഷനുകളാണ് ഇന്നോവ ഹൈക്രോസിൽ ലഭിക്കുന്നത്. ഫെയ്‌സ്‌ലിഫ്റ്റിൽ ഇതിന് പകരം 12.3 ഇഞ്ച് ടച്ച്‌സ്‌ക്രീൻ എത്തിച്ചേക്കും. ഡ്രൈവർ ഡിസ്‌പ്ലേയും 12.3 ഇഞ്ചായി മാറാനുള്ള സാധ്യതയുണ്ട്. പിന്നിലെ വെന്റിലേറ്റഡ് സീറ്റുകൾ, മെച്ചപ്പെടുത്തിയ ADAS സംവിധാനം, ഹെഡ്‌സ്-അപ്പ് ഡിസ്‌പ്ലേ, പവർഡ് കോ-ഡ്രൈവർ സീറ്റ് തുടങ്ങിയ പ്രീമിയം ഫീച്ചറുകളും പുതിയ പതിപ്പിൽ ഉൾപ്പെടുത്താൻ സാധ്യതയുണ്ട്.

എൻജിനിൽ വലിയ മാറ്റമില്ല

പവർട്രെയിനിൽ കാര്യമായ മാറ്റങ്ങൾ ഉണ്ടാകാൻ സാധ്യത കുറവാണ്. നിലവിലുള്ള 2.0 ലിറ്റർ നാച്ചുറലി ആസ്പിറേറ്റഡ് പെട്രോൾ എൻജിൻ തുടർന്നും ലഭിച്ചേക്കും. 168 ബിഎച്ച്പി കരുത്തും 204 എൻഎം ടോർക്കും ഉത്പാദിപ്പിക്കുന്ന ഈ എൻജിൻ സിവിടി ഓട്ടോമാറ്റിക് ഗിയർബോക്‌സുമായി തുടരും. 2.0 ലിറ്റർ പെട്രോൾ സ്ട്രോങ് ഹൈബ്രിഡ് പതിപ്പും തുടരും. ഹൈബ്രിഡ് സംവിധാനത്തിന് 186 ബിഎച്ച്പിയും 206 എൻഎം സംയോജിത ടോർക്കും ലഭിക്കും. ഈ പതിപ്പിൽ ഇ-സിവിടി ഗിയർബോക്‌സായിരിക്കും ഉപയോഗിക്കുക. പെട്രോൾ, ഹൈബ്രിഡ് പതിപ്പുകളിൽ വ്യത്യസ്‍ത ട്രാൻസ്‍മിഷൻ സംവിധാനങ്ങളാണ് ഉപയോഗിക്കുന്നതെങ്കിലും രണ്ടിലും സിവിടി സാങ്കേതികവിദ്യയാണ് അടിസ്ഥാനമായി ലഭിക്കുന്നത്.

ഈ വർഷം തന്നെ എത്തുമോ?

ഇന്നോവ ഹൈക്രോസ് ഫെയ്‌സ്‌ലിഫ്റ്റ് 2026 അവസാനമോ 2027 ആദ്യമോ അവതരിപ്പിച്ചേക്കുമെന്നായിരുന്നു നേരത്തെയുള്ള റിപ്പോർട്ടുകൾ. എന്നാൽ പുതിയ മോഡലിന്റെ ടെസ്റ്റ് വാഹനങ്ങൾ കൂടുതൽ സജീവമായി നിരത്തുകളിൽ പ്രത്യക്ഷപ്പെടുന്നതോടെ 2026 അവസാനത്തോടെ തന്നെ ലോഞ്ച് ചെയ്യാനുള്ള സാധ്യത ശക്തമായിട്ടുണ്ട്. ഡിസൈൻ മാറ്റങ്ങൾ, വലിയ ഇൻഫോടെയ്ൻമെന്റ് സ്‌ക്രീൻ, കൂടുതൽ പ്രീമിയം ഫീച്ചറുകൾ, അപ്‌ഗ്രേഡ് ചെയ്ത സുരക്ഷാ സംവിധാനങ്ങൾ എന്നിവയോടെ എത്തുന്ന ഫെയ്‌സ്‌ലിഫ്റ്റ് ഇന്നോവ ഹൈക്രോസ് വിപണിയിലെത്തുമ്പോൾ നിലവിലെ മോഡലിനേക്കാൾ കൂടുതൽ ആകർഷകമായ പാക്കേജായി മാറുമെന്നാണ് പ്രതീക്ഷിക്കുന്നത്.