ഫാമിലികൾക്ക് കോളടിച്ചു; വില കുറഞ്ഞ ഏഴ് സീറ്റർ ടൊയോട്ട എംപിവി എത്തി

ടൊയോട്ട റൂമിയോൺ എംപിവി നിരയിലേക്ക് 9.56 ലക്ഷം രൂപ എക്സ്-ഷോറൂം വിലയിൽ പുതിയ എൻട്രി ലെവൽ 'ഇ' പതിപ്പ് അവതരിപ്പിച്ചു. 1.5 ലിറ്റർ പെട്രോൾ എഞ്ചിനിൽ 5-സ്പീഡ് മാനുവൽ ഗിയർബോക്സുമായി വരുന്ന ഈ വേരിയന്റിൽ ആറ് എയർബാഗുകൾ, പ്രൊജക്ടർ ഹെഡ്‌ലാമ്പുകൾ തുടങ്ങിയ സവിശേഷതകളുണ്ട്.  

ടൊയോട്ട റൂമിയോൺ എംപിവി നിരയിൽ പുതിയൊരു എൻട്രി ലെവൽ 'ഇ' പതിപ്പ് കൂടി ഉൾപ്പെടുത്തി. ഇതിന്‍റെ എക്സ്-ഷോറൂം വില 9.56 ലക്ഷം രൂപയാണ്. 10.51 ലക്ഷം വിലയുള്ള എസ് പെട്രോൾ-മാനുവൽ വേരിയന്റുമായി (രണ്ടാമത്തെ ബേസ് വേരിയന്റ്) താരതമ്യപ്പെടുത്തുമ്പോൾ, പുതിയ ഇ പതിപ്പിന് 95,000 രൂപ വില കുറവാണ്. ജി, വി പെട്രോൾ, മാനുവൽ വേരിയന്റുകൾക്ക് യഥാക്രമം 11.64 ലക്ഷവും 12.39 ലക്ഷവുമാണ് വില. ഓട്ടോമാറ്റിക് വേരിയന്റുകൾക്ക് 12.05 ലക്ഷം മുതൽ 13.86 ലക്ഷം വരെയും എസ് സിഎൻജി വേരിയന്റിന് 11.40 ലക്ഷം വരെയുമാണ് എക്സ്-ഷോറൂം വിലകൾ.

ടൊയോട്ട റൂമിയോൺ ഇ വേരിയന്‍റ് സവിശേഷതകൾ

നാല് പവർ വിൻഡോകൾ, ഹിൽ ഹോൾഡ് അസിസ്റ്റ്, ആറ് എയർബാഗുകൾ, റിയർ പാർക്കിംഗ് സെൻസറുകൾ, എൽഇഡി ടെയിൽലാമ്പുകൾ, പ്രൊജക്ടർ ഹാലൊജൻ ഹെഡ്‌ലാമ്പുകൾ തുടങ്ങിയ നിരവധി മികച്ച സവിശേഷതകളോടെയാണ് പുതിയ എൻട്രി ലെവൽ വേരിയന്റ് വരുന്നത്. അതേസമയം എസ് വേരിയന്റിൽ സ്റ്റാൻഡേർഡായി നൽകിയിരിക്കുന്ന ഓഡിയോ സിസ്റ്റം, മാനുവലായി ക്രമീകരിക്കാവുന്ന ഐആർവിഎം, റിയർ എസി വെന്റുകൾ, ഇബിഡി ഉള്ള എബിഎസ്, ബ്രേക്ക് അസിസ്റ്റ് തുടങ്ങിയ സവിശേഷതകൾ ഇതിൽ ഇല്ല.

ക്രോം സറൗണ്ടുള്ള വലിയ ഫ്രണ്ട് ഗ്രിൽ, എൽഇഡി ടെയിൽലാമ്പുകൾ, സിൽവർ വീൽ ക്യാപ്പുകളുള്ള 15 ഇഞ്ച് സ്റ്റീൽ വീലുകൾ എന്നിവ ഇതിന്റെ സവിശേഷതകളാണ്. ടൊയോട്ട റൂമിയോൺ മാരുതി എർട്ടിഗയുമായി മത്സരിക്കുന്നു. അടുത്തിടെ പുറത്തിറക്കിയ നിസ്സാൻ ഗ്രാവൈറ്റ്, റെനോ ട്രൈബർ, കിയ കാരെൻസ് എന്നിവയുമായും ഇത് മത്സരിക്കുന്നു.

ടൊയോട്ട റൂമിയോൺ എഞ്ചിൻ

103 bhp കരുത്തും 137 Nm ടോർക്കും ഉത്പാദിപ്പിക്കുന്ന 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനാണ് റുമോയിസ് എംപിവിക്ക് കരുത്തേകുന്നത്. പുതിയ ഇ ട്രിം 5-സ്‍പീഡ് മാനുവൽ ഗിയർബോക്സിൽ മാത്രമേ ലഭ്യമാകൂ. തിരഞ്ഞെടുത്ത വകഭേദങ്ങളിൽ 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ട്രാൻസ്‍മിഷൻ ഓപ്ഷനും വാഗ്ദാനം ചെയ്യുന്നു. പെട്രോൾ എഞ്ചിനോടൊപ്പം സിഎൻജി കിറ്റ് ഉപയോഗിക്കുന്ന സിഎൻജി വേരിയന്റ് പരമാവധി 88 ബിഎച്ച്പി പവറും 121.5 എൻഎം ടോർക്കും ഉത്പാദിപ്പിക്കുന്നു. ടൊയോട്ട 20.51 കിലോമീറ്റർ/ലിറ്റർ ഇന്ധനക്ഷമത അവകാശപ്പെടുന്നു, അതേസമയം സിഎൻജി വേരിയന്റ് 26.11 കിലോമീറ്റർ/കിലോഗ്രാം മൈലേജ് വാഗ്‍ദാനം ചെയ്യുന്നു.