ഫോക്‌സ്‌വാഗൺ ടെയ്‌റോൺ: ഇന്ത്യയിലേക്കുള്ള പുതിയ കരുത്തൻ

ജർമ്മൻ വാഹന നിർമ്മാതാക്കളായ ഫോക്സ്‍വാഗൺ, തങ്ങളുടെ പുതിയ മൂന്ന് നിര എസ്‌യുവിയായ ടെയ്‌റോൺ 2026 ജനുവരിയിൽ ഇന്ത്യയിൽ അവതരിപ്പിക്കും. ഏകദേശം 49 ലക്ഷം രൂപ വില പ്രതീക്ഷിക്കുന്നു

ജർമ്മൻ വാഹന നിർമ്മാതാക്കളായ ഫോക്സ്‍വാഗണിന്‍റെ പുതിയ മൂന്ന് നിര എസ്‌യുവിയായ ഫോക്‌സ്‌വാഗൺ ടെയ്‌റോൺ 2026 ജനുവരി 28 ന് ഇന്ത്യയിൽ അരങ്ങേറ്റം കുറിക്കും. തുടർന്ന് വിപണിയിലെത്തും. സികെഡി (കംപ്ലീറ്റ്ലി നോക്ക്ഡ് ഡൗൺ) റൂട്ടിലൂടെയാണ് ഇത് രാജ്യത്തേക്ക് കൊണ്ടുവരുന്നത് എന്നതിനാൽ. ഈ എസ്‌യുവിക്ക് ഏകദേശം 49 ലക്ഷം രൂപ മുതൽ 50 ലക്ഷം രൂപ വരെ എക്സ്-ഷോറൂം വില പ്രതീക്ഷിക്കുന്നു.

പുറത്തിറങ്ങിക്കഴിഞ്ഞാൽ ടൊയോട്ട ഫോർച്യൂണർ, ജീപ്പ് മെറിഡിയൻ, എംജി ഗ്ലോസ്റ്റർ തുടങ്ങിയ എസ്‌യുവികളിൽ നിന്ന് ടെയ്‌റോണിന് വെല്ലുവിളി നേരിടേണ്ടിവരും.ഔദ്യോഗിക എഞ്ചിൻ സവിശേഷതകൾ വരും ദിവസങ്ങളിൽ വെളിപ്പെടുത്തും. എങ്കിലും ടിഗുവാൻ ആർ-ലൈനിൽ നിന്ന് കടമെടുത്ത 2.0 ലിറ്റർ TSI പെട്രോൾ എഞ്ചിനുമായി ഫോക്‌സ്‌വാഗൺ ടെയ്‌റോൺ വരുമെന്ന് പ്രതീക്ഷിക്കുന്നു. 7-സ്പീഡ് ഡിഎസ്‍ജി (ഡ്യുവൽ-ക്ലച്ച്) ഓട്ടോമാറ്റിക് ഗിയർബോക്‌സുമായി ജോടിയാക്കിയ ഈ എഞ്ചിൻ പരമാവധി 204 bhp പവറും 320 Nm ടോർക്കും ഉത്പാദിപ്പിക്കുന്നു. എസ്‌യുവിയിൽ ഫോക്‌സ്‌വാഗന്റെ 4MOTION AWD (ഓൾ-വീൽ ഡ്രൈവ്) സിസ്റ്റവും ഉണ്ടാകും.

ഇന്റീരിയറും സവിശേഷതകളും

പുതിയ ഫോക്‌സ്‌വാഗൺ ഏഴ് സീറ്റർ എസ്‌യുവിയുടെ ഇന്റീരിയർ ഒന്നിലധികം നൂതന സാങ്കേതികവിദ്യകളും സവിശേഷതകളും കൊണ്ട് നിറഞ്ഞിരിക്കുമെന്ന് പ്രതീക്ഷിക്കുന്നു. ആഗോളതലത്തിൽ ലഭ്യമായ മോഡലിന് സമാനമായി, ഇന്ത്യ-സ്പെക്ക് പതിപ്പിൽ 10.15 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, 12.6 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, 700W ഹർമൻ കാർഡൺ സിസ്റ്റം, 10-കളർ ആംബിയന്റ് ലൈറ്റിംഗ്, വയർലെസ് ചാർജിംഗ് പാഡുകൾ, പനോരമിക് സൺറൂഫ്, ത്രീ-സോൺ ഓട്ടോമാറ്റിക് ക്ലൈമറ്റ് കൺട്രോൾ, റിയർ വ്യൂ ക്യാമറ, ഡൈനാമിക് ക്ലാസിക് കൺട്രോൾ പ്രോ, 9 എയർബാഗുകൾ എന്നിവയും അതിലേറെയും വാഗ്ദാനം ചെയ്തേക്കാം.

ഡിസൈൻ വിശദാംശങ്ങൾ

ഏറ്റവും പുതിയ ടീസർ വെളിപ്പെടുത്തുന്നത് ഫോക്‌സ്‌വാഗൺ ടെയ്‌റോണിന്റെ മുൻവശത്ത് ഒരു ഫുൾ-വിഡ്ത്ത് എൽഇഡി സ്ട്രിപ്പും പ്രകാശിതമായ ഫോക്‌സ്‌വാഗൺ ലോഗോയും ഉണ്ട് എന്നാണ്. ഈ എൽഇഡി ബാർ ഹെഡ്‌ലാമ്പ് ക്ലസ്റ്ററുകളിലേക്ക് ലയിക്കുന്നു. പിൻവശത്തെ പ്രൊഫൈൽ ഒരു സ്ലിം എൽഇഡി സ്ട്രിപ്പ്, കണക്റ്റഡ് ടെയിൽലാമ്പുകൾ, ബാക്ക്‌ലിറ്റ് വിഡബ്ല്യു ലോഗോ എന്നിവയാൽ അലങ്കരിച്ചിരിക്കുന്നു. ആഗോളതലത്തിൽ വിൽക്കപ്പെടുന്ന ടെയ്‌റോണിൽ 17 ഇഞ്ച് അലോയ് വീലുകൾ സജ്ജീകരിച്ചിട്ടുണ്ടെങ്കിലും, ഇന്ത്യൻ-സ്പെക്ക് മോഡലിൽ ടിഗുവാൻ ആർ ലൈനിന് സമാനമായ വലിയ 19 ഇഞ്ച് അലോയ് വീലുകൾ വരാൻ സാധ്യതയുണ്ട്.