ജീപ്പ് മോഡലുകളുടെ വില കുത്തനെ കുറച്ചു

മുംബൈ: അമേരിക്കൻ വാഹന നിർമാതാക്കളായ ജീപ്പ്​ മോഡലുകളുടെ വിലയിൽ വന്‍കുറവ്. 18.5 ലക്ഷം രൂപയുടെ കുറവാണ്​ വരുത്തിയിരിക്കുന്നത്. ജീപ്പ്​ ഗ്രാൻഡ്​ ചോർക്കി ലിമിറ്റഡ്​ മോഡലിനാണ്​ വൻ കുറവ്​ വരുത്തിയിരിക്കുന്നത്​. ഗ്രാൻഡ്​ ചെറോക്കി സമ്മിറ്റിന്​ 17.85 ലക്ഷം രൂപയുടെ കുറവ് ലഭിക്കും. ഗ്രാൻഡ്​ ചെറോക്കി ലിമിറ്റഡ്​ ഡീസൽ മോഡലിന്​ നിലവിൽ 93.64 ലക്ഷവും ഗ്രാൻഡ്​ ചോർക്കി സമ്മിറ്റ്​ ഡീസലിന്​ 1.03 കോടിയുമാണ്​ വില.

ജീപ്പി​​ന്‍റെ റാങ്ക്ലര്‍ അൺലിമിറ്റഡ്​​ 7.14 ലക്ഷം രൂപയുടെ കുറവാണ് ലഭിക്കുക. ഈ മോഡല്‍ ഇനി 64.45 ലക്ഷം രൂപക്ക്​ ലഭ്യമാവും.  ഗ്രാൻഡ്​ ചെറോക്കി എസ്​.ആർ.ടിയുടെ വിലയിൽ 5 ലക്ഷം രൂപയും കുറച്ചു.

ജി.എസ്​.ടി നിലവിൽ വന്നതോടെ രാജ്യത്തെ മുൻനിര വാഹന നിർമാതാക്കളെല്ലാം വില കുറച്ചിരുന്നു. എസ്​.യു.വികളുടെ വിലയിൽ വൻ കുറവാണ്​ വരുത്തിയിരിക്കുന്നത്​. ഇതി​​ന്‍റെ ചുവട്​ പിടിച്ചാണ്​ ജീപ്പും വില കുറച്ച്​ രംഗത്തെത്തിയിരിക്കുന്നത്​.

മാത്രമല്ല ജൂലൈ 31ന് ഇന്ത്യന്‍ നിര്‍മ്മിത കോംപസിനെയും ജീപ്പ് വിപണിയിലിറക്കാനൊരുങ്ങുകയാണ്. വാഹനലോകം ഏറെ പ്രതീക്ഷയോടെയാണ് കോംപസിന്‍റെ വരവിനെ കാത്തിരിക്കുന്നത്. കോംപസിന്‍റെ വരവിനു മുന്നോടിയായി മറ്റ് മോഡലുകളുടെ വിലയില്‍ വരുത്തിയിരിക്കുന്ന വന്‍ കിഴിവ് വാഹന പ്രേമികള്‍ ആകാംക്ഷയോടെയാണ് ഉറ്റുനോക്കുന്നത്.