കികി ഡാന്സിനെതിരെ കേരളാ പൊലീസും
Synopsis
പുതിയ വീഡിയോ ചലഞ്ചിനെതിരെ കേരള പൊലീസും നടപടി ശക്തമാക്കുന്നു
ഓടുന്ന കാറില് നിന്ന് ചാടിയിറങ്ങി ഡാന്സ് കളിക്കുന്ന പുതിയ വീഡിയോ ചലഞ്ചിനെതിരെ കേരള പൊലീസും നടപടി ശക്തമാക്കുന്നതായയി റിപ്പോര്ട്ട്. അപകടം വിതക്കുന്ന പരിപാടിക്കെതിരെ ശക്തമായ നീക്കത്തിനു പൊലീസ് ഒരുങ്ങുന്നതായാണ് സൂചന.
കഴിഞ്ഞ ജൂണ് 29ന് ഷിഗ്ഗി എന്നയാള് ഒരു വീഡിയോ പോസ്റ്റ് ചെയ്തതോടെയായിരുന്നു കികി ഡാന്സ് ചലഞ്ചിന് തുടക്കം. കനേഡിയന് ഹിപ്പ് ഹോപ്പ് താരം ഡ്രേക്കിന്റെ സൂപ്പര്ഹിറ്റ് ഗാനമായ ഇന് മൈ ഫീലിങ്സ് എന്ന ഗാനത്തിന് ചുവടുവെക്കുന്നതാണ് ചലഞ്ച്. പതിയെ ഓടിക്കൊണ്ടിരിക്കുന്ന കാറില് നിന്നും പുറത്തുചാടുകയും കാറിന്റെ വാതില് തുറന്നിട്ട് പാട്ടിനൊപ്പം നൃത്തം ചെയ്യുന്നതുമാണ് കികി ചലഞ്ച്. ഇന്സ്റ്റാഗ്രാം വഴിയാണ് പ്രധാനമായും ഇത്തരം ചലഞ്ച് വീഡിയോകള് പ്രചരിക്കുന്നത്.
ക്വീന് എന്ന മലയാള സിനിമയിലൂടെ ശ്രദ്ധയയായ നടി സാനിയ അയ്യപ്പനും കഴിഞ്ഞദിവസം ഈ ചലഞ്ചില് പങ്കെടുത്തിരുന്നു. ഇതോടെ കൂടുതല് പേര് രംഗത്തു വരുമോ എന്ന ആശങ്കയിലാണ് പൊലീസ്. വഡോദര സ്വദേശിനിയായ റിസ്വാന മിറിന്റെ വീഡിയോയും സോഷ്യല് മീഡിയയില് വൈറലാണ്.
ലോകമാകെ തരംഗമാകുന്ന ഡാന്സിനെതിരെ വിവിധ രാജ്യങ്ങളിലെ പൊലീസ് രംഗത്തെത്തിയിരുന്നു. കാറിന് പുറത്തു ചാടിയവരില് ചിലര് ഭംഗിയായി വെല്ലുവിളി പൂര്ത്തിയാക്കിയെങ്കിലും ചിലര്ക്ക് ഗുരുതരമായി പരിക്കേറ്റു. തിരക്കേറിയ നഗരങ്ങളില് കാറിന് പുറത്തിറങ്ങി നൃത്തം ചെയ്യുന്നത് മറ്റ് യാത്രക്കാരെ കൂടി പ്രശ്നത്തിലാക്കിയതും കൂടിയായപ്പോള് സംഗതി ഗുരുതരമായി.
ഗള്ഫ് രാജ്യങ്ങളിലും കികി വ്യാപകമാകുകയാണ്. ഈ ചലഞ്ചിന്റെ പേരില് യുഎഇയില് മൂന്ന് പേര് പോലീസ് പിടിയിലായിരുന്നു. വിവിധ രാജ്യങ്ങളിലെ പൊലീസ് കികി ഡാന്സിനെതിരെ മുന്നറിയിപ്പ് നല്കിയിട്ടുണ്ട്.
കികിക്ക് എതിരെ ദില്ലി, മുംബൈ, ബംഗളുരു, ഉത്തര്പ്രദേശ്, ഛണ്ഡിഗഡ് പൊലീസുകള് മുന്നറിയിപ്പ് നല്കിയിട്ടുണ്ട്. നടുറോഡിലെ ഡാൻസ്, നർത്തകരുടെ ജീവന് മാത്രമല്ല മറ്റുള്ളവരുടെ ജീവൻ കൂടി അപകടപ്പെടുത്തുന്നുണ്ടെന്നാണ് മുംബൈ പൊലീസ് പറയുന്നത്. അതുകൊണ്ടു തന്നെ ഇനിയിതു തുടർന്നാൽ ശരിക്കുള്ള മ്യൂസിക്കിനെ നേരിടാൻ തയാറാകൂ എന്നായിരുന്നു മുംബൈ പോലീസിന്റെ ട്വീറ്റ്.