കാവസാക്കി നിഞ്ച 300 പുതിയ പതിപ്പ് പുറത്തിറങ്ങി

കാവസാക്കി നിഞ്ച 300 ന്റെ 2025 പതിപ്പ് പുതിയ ഫീച്ചറുകളും കോസ്‌മെറ്റിക് മാറ്റങ്ങളുമായി ഇന്ത്യയിൽ പുറത്തിറങ്ങി. ZX-6R -ൽ നിന്ന് പ്രചോദനം ഉൾക്കൊണ്ട പ്രൊജക്ടർ ഹെഡ്‌ലൈറ്റ്, ZX-10R പോലുള്ള വലിയ ഫ്ലോട്ടിംഗ് വിൻഡ്‌സ്ക്രീൻ, പുതിയ കളർ ഓപ്ഷനുകൾ എന്നിവയാണ് പ്രധാന മാറ്റങ്ങൾ. മെക്കാനിക്കലായി മാറ്റങ്ങളൊന്നുമില്ല.

ജാപ്പനീസ് വാഹന ബ്രാൻഡായ കാവസാക്കി തങ്ങളുടെ ജനപ്രിയ എൻട്രി ലെവൽ സ്‌പോർട്‌സ് ബൈക്കായ നിഞ്ച 300 ന്റെ 2025 വർഷത്തെ മോഡൽ ഇന്ത്യയിൽ പുറത്തിറക്കി. 3.43 ലക്ഷം രൂപയാണ് ഇതിന്റെ എക്സ്-ഷോറൂം വില. 2025 പതിപ്പിൽ ഫീച്ചർ കൂട്ടിച്ചേർക്കലുകളും കോസ്മെറ്റിക് അപ്‌ഗ്രേഡുകളും ലഭിക്കുന്നു. എന്നാൽ മെക്കാനിക്കലായി, നിൻജ 300-ന് മാറ്റങ്ങളൊന്നുമില്ല. അപ്‌ഡേറ്റ് ചെയ്ത മോട്ടോർസൈക്കിളിന്റെ ഡെലിവറികൾ ഉടൻ ആരംഭിക്കും.

2025 നിൻജ 300 മോട്ടോർസൈക്കിളിന്റെ രൂപം മുമ്പത്തെപ്പോലെ തന്നെ നിലനിർത്തിയിട്ടുണ്ട്. എന്നാൽ അതിൽ ചില ആകർഷകങ്ങളായ മാറ്റങ്ങളും വരുത്തിയിട്ടുണ്ട്. ZX-6R -ൽ നിന്ന് പ്രചോദനം ഉൾക്കൊണ്ട ഒരു പ്രൊജക്ടർ ഹെഡ്‌ലൈറ്റ് ഇപ്പോൾ ബൈക്കിന് ലഭിക്കുന്നു. ഇത് ബൈക്കിന് കൂടുതൽ സ്‍പോർട്ടി രൂപം നൽകുന്നു. കൂടാതെ എയറോഡൈനാമിക്സും റൈഡിംഗ് അനുഭവവും മെച്ചപ്പെടുത്തുന്ന ZX-10R പോലുള്ള ഒരു വലിയ ഫ്ലോട്ടിംഗ് വിൻഡ്‌സ്ക്രീനും ചേർത്തിട്ടുണ്ട്. ഇതിനുപുറമെ, റോഡ് ഗ്രിപ്പും സ്ഥിരതയും മെച്ചപ്പെടുത്തുന്നതിനായി ടയറുകളുടെ ട്രെഡ് പാറ്റേണും അപ്‌ഡേറ്റ് ചെയ്തിട്ടുണ്ട്. ബൈക്ക് ആർ-ഇൻസ്പയർഡ് ലൈം ഗ്രീൻ, കാൻഡി ലൈം ഗ്രീൻ, മെറ്റാലിക് മൂൺഡസ്റ്റ് ഗ്രേ എന്നിങ്ങനെ മൂന്ന് പുതിയ കളർ ഓപ്ഷനുകളിൽ ലഭ്യമാകും. 

അതിന്റെ ചേസിസിലും മാറ്റങ്ങളൊന്നും വരുത്തിയിട്ടില്ല. പുതിയ 2025 നിൻജ 300 മോട്ടോർസൈക്കിൾ ട്യൂബുലാർ ഡയമണ്ട്-ടൈപ്പ് ഫ്രെയിമിലാണ് നിർമ്മിച്ചിരിക്കുന്നത്. മുന്നിൽ 37 എംഎം ടെലിസ്‌കോപ്പിക് ഫോർക്കുകളും പിന്നിൽ മോണോഷോക്ക് സസ്‌പെൻഷനുമുണ്ട്. ഇത് യഥാക്രമം 120 എംഎം, 132 എംഎം യാത്ര വാഗ്ദാനം ചെയ്യുന്നു. ബ്രേക്കിംഗിനായി, മുന്നിൽ 290 എംഎമ്മും പിന്നിൽ 220 എംഎമ്മും പെറ്റൽ ഡിസ്‍ക് ബ്രേക്കുകൾ ഉണ്ട്. സുരക്ഷയും നിയന്ത്രണവും നൽകുന്ന ഡ്യുവൽ-ചാനൽ എബിഎസും ഉണ്ട്. ഇതിന് അതേ ക്ലിപ്പ്-ഓൺ ഹാൻഡിൽബാറുകൾ, ഒരു സ്പ്ലിറ്റ് സീറ്റ് സജ്ജീകരണം, ഒരു സെമി-ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവ ലഭിക്കുന്നു. അപ്‌ഡേറ്റ് ലഭിച്ചതിനുശേഷവും സ്മാർട്ട്‌ഫോൺ കണക്റ്റിവിറ്റി നൽകിയിട്ടില്ല.

ഇതിന്റെ എഞ്ചിനെക്കുറിച്ച് പറയുകയാണെങ്കിൽ, മുമ്പത്തെപ്പോലെ തന്നെ 295 സിസി പാരലൽ-ട്വിൻ എഞ്ചിനാണ് ഇതിനുള്ളത്, ഇത് 11,000 ആർപിഎമ്മിൽ 38.8 bhp കരുത്തും 10,000 ആർപിഎമ്മിൽ 26.1 എൻഎം ടോർക്കും ഉത്പാദിപ്പിക്കുന്നു. ഈ എഞ്ചിൻ അസിസ്റ്റ്, സ്ലിപ്പർ ക്ലച്ച് സവിശേഷതയുള്ള 6-സ്പീഡ് ഗിയർബോക്‌സുമായി ഘടിപ്പിച്ചിരിക്കുന്നു. ഇതുമൂലം ഗിയർ ഷിഫ്റ്റിംഗ് സുഗമമാക്കുന്നു.