വളർന്നുപന്തലിച്ച് ഹീറോ, ഉടൻ യൂറോപ്യൻ വിപണികളിലും മോട്ടോർസൈക്കിളുകളും സ്‍കൂട്ടറുകളും പുറത്തിറക്കും

2025 സാമ്പത്തിക വർഷത്തിന്റെ രണ്ടാം പകുതിയിൽ വിഡ ബ്രാൻഡിന് കീഴിൽ യുകെയിലേക്കും യൂറോപ്പിലേക്കും പ്രവർത്തനങ്ങൾ വ്യാപിപ്പിക്കാൻ ഹീറോ മോട്ടോകോർപ്പ് പദ്ധതിയിടുന്നു. 

ഇന്ത്യൻ ടൂവീലർ ബ്രാൻഡായ ഹീറോ മോട്ടോകോർപ്പ് ഇപ്പോൾ ലോകമെമ്പാടും തങ്ങളുടെ ബിസിനസ് വികസിപ്പിക്കുകയാണ്. 2025 സാമ്പത്തിക വർഷത്തിന്‍റെ രണ്ടാം പകുതിയിൽ വിഡ ബ്രാൻഡിന് കീഴിൽ യുകെയിലേക്കും യൂറോപ്പിലേക്കും പ്രവർത്തനങ്ങൾ വ്യാപിപ്പിക്കാനുള്ള പദ്ധതികൾ ഹീറോ മോട്ടോകോർപ്പ് പ്രഖ്യാപിച്ചു. 2025-26 ലെ രണ്ടാം പാദത്തിൽ കമ്പനി ജർമ്മനി, ഫ്രാൻസ്, സ്പെയിൻ, ബ്രിട്ടൻ എന്നിവിടങ്ങളിൽ വാഹനങ്ങൾ വിൽക്കും. ഇലക്ട്രിക് വാഹന വിപണിയിലും ഹീറോ മോട്ടോകോർപ്പ് മുന്നേറുകയാണ്. യൂറോപ്പിലും ബ്രിട്ടണിലും തങ്ങളുടെ വ്യക്തിമുദ്ര പതിപ്പിക്കാനാണ് കമ്പനി ലക്ഷ്യമിടുന്നത്. കഴിഞ്ഞ വർഷം, ദക്ഷിണേഷ്യയിലും ലാറ്റിൻ അമേരിക്കയിലും കമ്പനി 43% വളർച്ച നേടി.

ഭാവി നിക്ഷേപങ്ങളെക്കുറിച്ച് ഹീറോ മോട്ടോകോർപ്പ് വളരെ സജീവമാണെന്ന് കമ്പനി ചെയർമാൻ പവൻ മുഞ്ജൽ പറഞ്ഞു. ഭാവി മുന്നിൽ കണ്ടാണ് ഹീറോ മോട്ടോകോർപ്പ് പ്രവർത്തിക്കുന്നതെന്നും അദ്ദേഹം ഓഹരി ഉടമകളോട് വ്യക്തമാക്കി. ഇന്ത്യയിലും പുറത്തും കമ്പനി നിക്ഷേപം നടത്തുന്നുണ്ടെന്ന് അദ്ദേഹം പറഞ്ഞു. പുതിയ സംരംഭകരെ സഹായിക്കാനും കമ്പനി ശ്രമിക്കുന്നുണ്ടെന്ന് മുഞ്ജൽ പറഞ്ഞു. ഇതിനായി ഒരു പുതിയ സ്റ്റാർട്ടപ്പ് പദ്ധതി ആരംഭിച്ചിട്ടുണ്ട്. അതിനനുസരിച്ച് കമ്പനി പുതിയ സംരംഭകർക്ക് പണവും മറ്റ് തരത്തിലുള്ള സഹായങ്ങളും നൽകും. ഇത് പുതിയ സംരംഭകർക്ക് അവരുടെ ജോലി ആരംഭിക്കാനും അത് മുന്നോട്ട് കൊണ്ടുപോകാനും സഹായിക്കും. പുതിയ സംരംഭകർക്ക് കമ്പനി ഗവേഷണ വികസന സൗകര്യങ്ങളും നൽകും.

2024-25 ൽ ഹീറോ മോട്ടോകോർപ്പ് ഇലക്ട്രിക് വാഹന വിപണിയിലും മികച്ച പ്രകടനം കാഴ്ചവച്ചിട്ടുണ്ടെന്ന് പവൻ മുഞ്ജൽ പറഞ്ഞു. ഇലക്ട്രിക് വാഹനങ്ങളുടെ കാര്യത്തിൽ കമ്പനി മുന്നിൽ നിൽക്കാൻ ആഗ്രഹിക്കുന്നുവെന്ന് അദ്ദേഹം പറഞ്ഞു. ഇപ്പോൾ ആഗോള വിപുലീകരണ പദ്ധതി പ്രകാരം, 2025-26 സാമ്പത്തിക വർഷത്തിന്റെ രണ്ടാം പാദത്തിൽ ജർമ്മനി, ഫ്രാൻസ്, സ്പെയിൻ, യുകെ എന്നിവിടങ്ങളിൽ ഹീറോ മോട്ടോകോർപ്പ് തങ്ങളുടെ സാന്നിധ്യം വിപുലീകരിക്കും. 2024-25 സാമ്പത്തിക വർഷത്തിൽ, ദക്ഷിണേഷ്യ, ലാറ്റിൻ അമേരിക്ക തുടങ്ങിയ രാജ്യങ്ങളിൽ 43 ശതമാനം വളർച്ച കൈവരിച്ചു എന്നും കമ്പനി പറയുന്നു.

രാജ്യത്തും ലോകത്തും ഏറ്റവും കൂടുതൽ ഇരുചക്ര വാഹനങ്ങൾ വിൽക്കുന്ന കമ്പനികളിൽ ഒന്നാണ് ഹീറോ മോട്ടോകോർപ്പാണ്. അടുത്തിടെ പുറത്തിറക്കിയ വിഡ വിഎക്സ്2 ഉൾപ്പെടെ ഇന്ത്യൻ ഇലക്ട്രിക് ഇരുചക്ര വാഹന വിഭാഗത്തിൽ വിഡ ബ്രാൻഡ് പോലുള്ള നിരവധി ആകർഷകമായ സ്കൂട്ടറുകൾ ഈ ഇന്ത്യൻ കമ്പനി അവതരിപ്പിച്ചിട്ടുണ്ട്. വെറും 45,000 രൂപ മാത്രമാണ് ഈ ഇലക്ട്രിക് സ്‍കൂട്ടറിന്റെ പ്രാരംഭ വില. വരും കാലങ്ങളിൽ, ഉപഭോക്താക്കളുടെ ആവശ്യങ്ങൾ കണക്കിലെടുത്ത് കൂടുതൽ പുതിയ ഉൽപ്പന്നങ്ങൾ കൊണ്ടുവരാൻ കമ്പനി ഒരുങ്ങുകയാണ്. ഇലക്ട്രിക് വാഹന വിപണിയിൽ വലിയൊരു പങ്ക് പിടിച്ചെടുക്കാൻ ലക്ഷ്യമിടുന്നതിനാൽ ഈ സാമ്പത്തിക വർഷം അവസാനത്തോടെ ഇന്ത്യയിൽ നാല് ഇലക്ട്രിക് മോഡലുകൾ പുറത്തിറക്കുമെന്ന് കമ്പനി നേരത്തെ പറഞ്ഞിരുന്നു.