ജാവ യെസ്‍ഡി മോട്ടോർസൈക്കിളുകൾ ഇനി ആമസോണിൽ നിന്നും വാങ്ങാം

ഐക്കണിക്ക് ബ്രാൻഡായ ജാവ യെസ്‍ഡി മോട്ടോർസൈക്കിൾസ് ഇപ്പോൾ ആമസോൺ ഇന്ത്യ വഴിയും ലഭ്യമാണ്. ഫ്ലിപ്പ്കാർട്ടിന് പുറമെയാണ് ഈ പുതിയ പങ്കാളിത്തം, ഇത് ഉപഭോക്താക്കൾക്ക് ഇഎംഐ, ക്യാഷ്ബാക്ക് പോലുള്ള സാമ്പത്തിക ഓപ്ഷനുകളോടെ ഓൺലൈനായി ബൈക്കുകൾ വാങ്ങാൻ അവസരമൊരുക്കുന്നു.

ഐക്കണിക്ക് ഇരുചക്ര വാഹന ബ്രാൻഡായ ജാവ യെസ്‍ഡി മോട്ടോർസൈക്കിൾ ഇനി ആമസോണിൽ നിന്നും വാങ്ങാം. ഇതിനായി ആമസോൺ ഇന്ത്യയുമായി പങ്കാളിത്തം പ്രഖ്യാപിച്ചിരിക്കുകയാണ് ജാവ. ജാവ, യെസ്‍ഡി മോട്ടോർസൈക്കിളുകൾ ആമസോൺ വഴി രാജ്യത്തെ 40 നഗരങ്ങളിൽ ലഭ്യമാകും.

ഫ്ലിപ്‍കാർട്ടിൽ കഴിഞ്ഞ വർഷം മുതൽ

കഴിഞ്ഞ വർഷം ഒക്ടോബറിൽ ജാവ-യെസ്ഡി മോട്ടോർസൈക്കിളുകൾ ഫ്ലിപ്‍കാർട്ടിൽ ലിസ്റ്റ് ചെയ്തിരുന്നു. ഇപ്പോൾ ആമസോൺ പങ്കാളിത്തം കൂടി ആരംഭിച്ചതോടെ ജാവ യെസ്‍ഡിബൈക്കുകളുടെ ഓൺലൈൻ ലഭ്യത കൂടുതൽ വിപുലീകരിക്കുന്നു. ജാവ 350 , 42, 42 FJ 350, 42 ബോബർ , പെരാക് എന്നിവയും യെസ്‍ഡി അഡ്വഞ്ചർ , സ്ക്രാംബ്ലർ എന്നിവയും ആമസോണിലും ഫ്ലിപ്‍കാർട്ടിലും ലഭ്യമാണ്. 

ഉപഭോക്താക്കൾക്ക് നേട്ടം

ഇ-കൊമേഴ്‌സ് വഴി വാങ്ങുന്നതിലൂടെ ഉപഭോക്താക്കൾക്ക് നിരവധി സാമ്പത്തിക ഓപ്ഷനുകളിൽ നിന്ന് തിരഞ്ഞെടുക്കാനും ജാവ, യെസ്ഡി മോട്ടോർസൈക്കിളുകളുടെ ഡീലുകൾ പരിശോധിക്കാനും കഴിയും. ഇതിൽ ഇഎംഐ പ്ലാനുകളും ഓൺലൈൻ വാങ്ങലുകളിൽ ക്യാഷ്ബാക്കുകളും ഉൾപ്പെടുന്നു. ആമസോൺ പ്രൈം ഉപഭോക്താക്കൾക്ക് ആമസോൺ പേ ഐസിഐസിഐ കോ-ബ്രാൻഡഡ് ക്രെഡിറ്റ് കാർഡുകളിൽ അഞ്ച് ശതമാനം ക്യാഷ്ബാക്ക് ലഭിക്കും. കൂടാതെ, ഫ്ലിപ്പ്കാർട്ട് 24 മാസത്തെ, നോ-കോസ്റ്റ് ഇഎംഐയും, ഫ്ലിപ്പ്കാർട്ട് ആക്സിസ്, ഫ്ലിപ്പ്കാർട്ട് എസ്ബിഐ ക്രെഡിറ്റ് കാർഡുകൾ പോലുള്ള കോ-ബ്രാൻഡഡ് ക്രെഡിറ്റ് കാർഡുകളിൽ അഞ്ച് ശതമാനം ക്യാഷ്ബാക്കും ( 4,000 രൂപ വരെ) വാഗ്ദാനം ചെയ്യുന്നു. കൂടാതെ, ഫ്ലിപ്പ്കാർട്ടിൽ എക്സ്ക്ലൂസീവ് മോട്ടോർസൈക്കിൾ ഫിനാൻസ്, ഇൻഷുറൻസ് സൗകര്യങ്ങളും ലഭ്യമാണ്.

ആമസോണിലും ഫ്ലിപ്‍കാർട്ടിലും 30ൽ അധികം നഗരങ്ങളിലായി 40 ഡീലർമാർ ഇപ്പോൾ സജീവമാണെന്ന് ജാവ-യെസ്‍ഡി പറയുന്നു. വരും ആഴ്ചകളിൽ കൂടുതൽ പേർ ഇതിൽ ചേരുമെന്ന് പ്രതീക്ഷിക്കുന്നു. കർണാടക, തമിഴ്‌നാട്, തെലങ്കാന, രാജസ്ഥാൻ, ഉത്തർപ്രദേശ്, ഹരിയാന, പഞ്ചാബ്, ജമ്മു ആൻഡ് കശ്മീർ, ഉത്തരാഖണ്ഡ്, പശ്ചിമ ബംഗാൾ, ഒഡീഷ, ഛത്തീസ്ഗഢ്, ജാർഖണ്ഡ്, അസം, മണിപ്പൂർ, മഹാരാഷ്ട്ര, ഗുജറാത്ത് എന്നിവയുൾപ്പെടെ ഒന്നിലധികം സംസ്ഥാനങ്ങളെ ഈ ബ്രാൻഡ് നിലവിൽ ഉൾക്കൊള്ളുന്നു.

വിലയും കുറഞ്ഞു

അടുത്തിടെ നടപ്പിലാക്കിയ പുതിയ ജിഎസ്‍ടി 2.0 പ്രകാരം ജാവ, യെസ്ഡി മോട്ടോർസൈക്കിളുകൾക്ക് വിലക്കുറവ് ലഭിച്ചു. ഇപ്പോൾ ബൈക്കുകൾക്ക് 18 ശതമാനം നികുതി ചുമത്തിയിരിക്കുന്നു. ഇത് ജാവ - യെസ്‍ഡി ശ്രേണിയിലുടനീളം വിലയിൽ ഗണ്യമായ കുറവുണ്ടാക്കുന്നു. ജാവ, യെസ്‍ഡി ശ്രേണിയിലെ മുഴുവൻ മോഡലുകൾക്കും 350 സിസിയിൽ താഴെ ഡിസ്‌പ്ലേസ്‌മെന്റ് ശേഷിയുള്ള എഞ്ചിനുകൾ ലഭിക്കുന്നു. കമ്പനി അടുത്തിടെ അപ്‌ഡേറ്റ് ചെയ്ത യെസ്ഡി റോഡ്‌സ്റ്ററും പുറത്തിറക്കിയിരുന്നു.