ജിഎസ്‍ടി കുറച്ചതിനു ശേഷം ഈ ടൂവീലറുകൾ വാങ്ങിയാൽ വൻ ലാഭം

കേന്ദ്ര സർക്കാരിന്‍റെ ജിഎസ്‍ടി പരിഷ്‍കരണത്തെ തുടർന്ന് ഉത്സവ സീസണിൽ ബൈക്ക്, സ്‍കൂട്ടർ വിലകളിൽ ഗണ്യമായ കുറവ് വന്നിരിക്കുന്നു. പ്രമുഖ ബ്രാൻഡുകൾ മോഡലുകളിൽ ആകർഷകമായ ഓഫറുകളും വിലക്കിഴിവുകളും നൽകുന്നു. 

ഉത്സവ സീസണിൽ ഒരു ഇരുചക്ര വാഹനം വാങ്ങുന്നതിനെക്കുറിച്ച് നിങ്ങൾ ആലോചിക്കുന്നുണ്ടെങ്കിൽ, ഇതാണ് ഏറ്റവും അനുയോജ്യമായ സമയം. കേന്ദ്ര സർക്കാരിന്‍റെ ജിഎസ്‍ടി 2.0 പരിഷ്‍കരരണത്തെത്തുടർന്ന് ബൈക്ക്, സ്‍കൂട്ടർ വിലകളിൽ ഗണ്യമായ വിലക്കുറവ് ലഭിക്കുന്നു. വിവിധ കമ്പനികൾ ഉപഭോക്താക്കൾക്ക് ആനുകൂല്യങ്ങൾ കൈമാറുകയും വിവിധ ഓഫറുകൾ വാഗ്ദാനം ചെയ്യുകയും ചെയ്യുന്നു. ബജാജ് മുതൽ ടിവിഎസ്, ഹോണ്ട, റോയൽ എൻഫീൽഡ് വരെ, എല്ലാ പ്രമുഖ ബ്രാൻഡുകളും അവരുടെ ജനപ്രിയ മോഡലുകളുടെ വില കുറച്ചിട്ടുണ്ട്. ജിഎസ്ടി പരിഷ്കാരങ്ങൾക്ക് ശേഷം വിപണിയിൽ ലഭ്യമായ ഏറ്റവും മികച്ച അഞ്ച് ഇരുചക്ര വാഹന ഡീലുകളെക്കുറിച്ച് അറിയാം.

ബജാജ് ഓട്ടോ തങ്ങളുടെ ജനപ്രിയ പൾസർ ശ്രേണിയെ കൂടുതൽ ആകർഷകമാക്കി. കമ്പനിയുടെ "ഹാട്രിക് ഓഫർ" ഉപഭോക്താക്കൾക്ക് ജിഎസ്ടി ആനുകൂല്യങ്ങൾ വാഗ്ദാനം ചെയ്യുന്നതിനു പുറമേ, ഫിനാൻസിംഗ്, ഇൻഷുറൻസ് ആനുകൂല്യങ്ങൾ എന്നിവയിൽ പൂജ്യം പ്രോസസിംഗ് ഫീസും ഉൾപ്പെടുന്നു. ഇത് പൾസർ RS200-ൽ മൊത്തം 26,000 രൂപയിലധികം ലാഭിക്കാൻ സഹായിക്കുന്നു. അതേസമയം ടിവിഎസ് തങ്ങളുടെ ജനപ്രിയ അപ്പാച്ചെ സീരീസിലും കാര്യമായ വിലക്കുറവ് വരുത്തിയിട്ടുണ്ട്. എൻട്രി ലെവൽ RTR 160 ഇപ്പോൾ 1.02 ലക്ഷം രൂപയിൽ ആരംഭിക്കുന്നു.അതേസമയം ഏറ്റവും ഉയർന്ന ശ്രേണിയിലുള്ള അപ്പാച്ചെ RR310 ഏകദേശം 27,000 രൂപ കുറച്ചിട്ടുണ്ട്.

ഇടത്തരം ബൈക്കുകളിലും ഉപഭോക്താക്കൾക്ക് കാര്യമായ ആനുകൂല്യങ്ങൾ ലഭിക്കുന്നുണ്ട്. ഹോണ്ട തങ്ങളുടെ സിബി സീരീസിന്‍റെ വില കുറച്ചു. ഹോണ്ട സിബി350 സീരീസിന് ഏകദേശം 19,000 രൂപയുടെ വിലക്കുറവ് ലഭിച്ചു. മുമ്പ് 1.70 ലക്ഷം വിലയുണ്ടായിരുന്ന സിബി300എഫ് ഇപ്പോൾ 1.55 ലക്ഷം രൂപയ്ക്ക് ലഭ്യമാണ്. ഹോണ്ട സിബി300ആറിന്റെ വിലയും 2.19 ലക്ഷം രൂപയായി കുറച്ചു. ഹോണ്ടയുടെ 300സിസി ബൈക്കുകൾ ഇപ്പോൾ കൂടുതൽ താങ്ങാനാവുന്നതാണെന്നും വിപണിയിലെ സാന്നിധ്യം ശക്തിപ്പെടുത്തുമെന്നും ഇത് വ്യക്തമായി സൂചിപ്പിക്കുന്നു.

ഐക്കണിക്ക് ബുള്ളറ്റ് നിർമ്മാതാക്കളായ റോയൽ എൻഫീൽഡ് തങ്ങളുടെ 350 സിസി മോഡലുകളിൽ വലിയ കിഴിവുകളും വാഗ്ദാനം ചെയ്യുന്നു. ക്ലാസിക് 350 റെഡ്‍ഡിച്ച് ഇപ്പോൾ 1.81 ലക്ഷത്തിനും ഹണ്ടർ 350 റെട്രോ 1.37 ലക്ഷത്തിനും ലഭ്യമാണ്. മീറ്റിയർ 350, ബുള്ളറ്റ് 350, ഗോവൻ ക്ലാസിക് 350 എന്നിവയിലും സമാനമായ കിഴിവുകൾ ലഭ്യമാണ്. അതേസമയം 350 സിസിക്ക് മുകളിലുള്ള റോയൽ എൻഫീൽഡ് ബൈക്കുകളുടെ വില 40 ശതമാനം ജിഎസ്‍ടി സ്ലാബ് കാരണം വർദ്ധിച്ചു.