
ഇന്ത്യൻ ഇരുചക്ര വാഹന വിപണിയിൽ അഡ്വഞ്ചർ ബൈക്കുകൾക്ക് പ്രിയമേറുകയാണ്. നഗരങ്ങളിലെ തിരക്കേറിയ റോഡുകൾ മുതൽ ദീർഘദൂര യാത്രകളും ഓഫ്റോഡ് റൈഡുകളും വരെ ഒരുപോലെ കൈകാര്യം ചെയ്യാൻ കഴിയുന്ന ബൈക്കുകളോടാണ് ഉപഭോക്താക്കൾക്ക് ഇപ്പോൾ താൽപ്പര്യം. ഈ ആവശ്യം മുന്നിൽക്കണ്ട് പുതിയ മോഡലുകളുമായി രംഗത്തെത്താനുള്ള ഒരുക്കത്തിലാണ് പ്രമുഖ ഇരുചക്ര വാഹന നിർമാതാക്കൾ. റോയൽ എൻഫീൽഡ്, ഹീറോ മോട്ടോകോർപ്, ബജാജ് ഓട്ടോ എന്നീ കമ്പനികളിൽ നിന്നായി 5 പുതിയ അഡ്വഞ്ചർ ബൈക്കുകളാണ് വരാനിരിക്കുന്നത്. ഇതിൽ വലിയ എൻജിൻ ശേഷിയുള്ള മോഡലുകളും ഇലക്ട്രിക് ബൈക്കും ഉൾപ്പെടുന്നു. വരാനിരിക്കുന്ന ഈ ബൈക്കുകളുടെ പ്രധാന സവിശേഷതകളും ലോഞ്ച് വിവരങ്ങളും അറിയാം.
റോയൽ എൻഫീൽഡിന്റെ ഇതുവരെയുള്ള ഏറ്റവും വലിയ അഡ്വഞ്ചർ ബൈക്കായിരിക്കും ഹിമാലയൻ 750. 2026ലെ ഇഐസിഎംഎ മോട്ടോർ ഷോയിൽ കമ്പനി ഈ മോഡൽ പ്രദർശിപ്പിച്ചിരുന്നു. 55 ബിഎച്ച്പി കരുത്തും 63 എൻഎം ടോർക്കും നൽകുന്ന 743 സിസി, എയർ ആൻഡ് ഓയിൽ കൂൾഡ്, പാരലൽ ട്വിൻ എൻജിനാണ് വാഹനത്തിന്റെ ഹൃദയം. 6 സ്പീഡ് ഗിയർബോക്സും അസിസ്റ്റ് സ്ലിപ്പർ ക്ലച്ചും ഇതിലുണ്ടാകും. അഞ്ച് റൈഡിങ് മോഡുകൾ, ക്രൂയിസ് കൺട്രോൾ, കോർണറിങ് എബിഎസ്, ട്രാക്ഷൻ കൺട്രോൾ, 4 ഇഞ്ച് ടിഎഫ്ടി ഡിസ്പ്ലേ എന്നിവയും പ്രതീക്ഷിക്കാം. 19 ഇഞ്ച് ഫ്രണ്ട് വീലും 17 ഇഞ്ച് റിയർ വീലുമാണ് മറ്റൊരു പ്രത്യേകത.
ഹീറോ മോട്ടോകോർപ് അവതരിപ്പിക്കാനൊരുങ്ങുന്ന മറ്റൊരു പ്രധാന മോഡലാണ് എക്സ്പൾസ് 450. 2026ലെ ഇഐസിഎംഎയിൽ ആഗോളതലത്തിൽ ആദ്യമായി ഈ ബൈക്ക് പ്രദർശിപ്പിച്ചു. 46.7 ബിഎച്ച്പി കരുത്തും 38 എൻഎം ടോർക്കും നൽകുന്ന 421 സിസി ലിക്വിഡ് കൂൾഡ് സിംഗിൾ സിലിണ്ടർ എൻജിനാണ് ഇതിലുള്ളത്. 6 സ്പീഡ് ഗിയർബോക്സാണ് ട്രാൻസ്മിഷൻ ചുമതലകൾ നിർവഹിക്കുന്നത്. 43 എംഎം ക്രമീകരിക്കാവുന്ന കെവൈബി അപ്സൈഡ് ഡൗൺ ഫ്രണ്ട് ഫോർക്കുകളും 225 എംഎം സസ്പെൻഷൻ ട്രാവലും ബൈക്കിന്റെ പ്രത്യേകതകളാണ്. ട്രാക്ഷൻ കൺട്രോൾ, റൈഡിങ് മോഡുകൾ, ആൻഡ്രോയിഡ് ഓട്ടോ, ആപ്പിൾ കാർപ്ലേ കണക്റ്റിവിറ്റിയുള്ള 7 ഇഞ്ച് ടിഎഫ്ടി സ്ക്രീൻ എന്നിവയും ലഭിക്കും. വിദേശ വിപണികളിലെ വിതരണം 2027ൽ ആരംഭിക്കുമെന്നാണ് സൂചന. പിന്നാലെ ഇന്ത്യൻ വിപണിയിലും എത്തുമെന്നാണ് പ്രതീക്ഷ.
അഡ്വഞ്ചർ ബൈക്ക് ശ്രേണിയിലേക്ക് പുതിയൊരു മോഡലുമായി എത്താനുള്ള ഒരുക്കത്തിലാണ് ബജാജ് ഓട്ടോ. ട്രെക്കർ എന്ന പേരിൽ അവതരിപ്പിച്ചേക്കാവുന്ന ഈ ഡ്യുവൽ സ്പോർട് ബൈക്കിന്റെ പരീക്ഷണയോട്ട ചിത്രങ്ങൾ നേരത്തെ പുറത്തുവന്നിരുന്നു. ഉയർത്തിയ ഫ്രണ്ട് ഫെൻഡർ, കൂടുതൽ സസ്പെൻഷൻ ട്രാവൽ, നേരായ ഹാൻഡിൽബാർ, ഉയർന്ന നിലയിലുള്ള എക്സ്ഹോസ്റ്റ് എന്നിവയാണ് പ്രധാന ഡിസൈൻ സവിശേഷതകൾ. മുന്നിൽ ടെലിസ്കോപിക് ഫോർക്കുകളും പിന്നിൽ ലിങ്കേജോടുകൂടിയ മോണോഷോക്ക് സസ്പെൻഷനും ലഭിച്ചേക്കും. പൾസർ എൻ250യിൽ ഉപയോഗിക്കുന്ന 250 സിസി എയർ ആൻഡ് ഓയിൽ കൂൾഡ് എൻജിനെ അടിസ്ഥാനമാക്കിയുള്ള പവർട്രെയിൻ ആയിരിക്കും ഇതിലുണ്ടാകുകയെന്നാണ് സൂചന. ബ്രസീലിയൻ വിപണിയിലായിരിക്കും ആദ്യ അവതരണമെന്നാണ് റിപ്പോർട്ടുകൾ.
വിദേശ വിപണികളെ ലക്ഷ്യമിട്ട് ഹീറോ വികസിപ്പിക്കുന്ന മറ്റൊരു മോഡലാണ് എക്സ്പൾസ് 150. 2026ലെ ഇഐസിഎംഎയിൽ ഈ ബൈക്കും കമ്പനി അനാച്ഛാദനം ചെയ്തിരുന്നു. 12.2 ബിഎച്ച്പി കരുത്തും 12.8 എൻഎം ടോർക്കും നൽകുന്ന 150 സിസി എയർ കൂൾഡ് സിംഗിൾ സിലിണ്ടർ എൻജിനാണ് വാഹനത്തിലുള്ളത്. 5 സ്പീഡ് ഗിയർബോക്സാണ് നൽകിയിരിക്കുന്നത്. 141.5 കിലോഗ്രാമാണ് ബൈക്കിന്റെ ഭാരം. 19 ഇഞ്ച് ഫ്രണ്ട് വീലും 17 ഇഞ്ച് റിയർ വീലും വാഹനത്തിലുണ്ട്. 220 എംഎം ഗ്രൗണ്ട് ക്ലിയറൻസും 826 എംഎം സീറ്റ് ഉയരവുമാണ് മറ്റൊരു പ്രത്യേകത. എൻജിൻ പ്രൊട്ടക്ഷൻ പ്ലേറ്റ്, ഹാൻഡ്ഗാർഡ്, ലഗേജ് കാരിയർ തുടങ്ങിയവയും ലഭിക്കും.
ഇലക്ട്രിക് അഡ്വഞ്ചർ ബൈക്ക് ശ്രേണിയിലേക്കും കടക്കാനുള്ള ഒരുക്കത്തിലാണ് റോയൽ എൻഫീൽഡ്. കമ്പനിയുടെ എച്ച്ഐഎം-ഇ പദ്ധതിയുടെ ഭാഗമായാണ് ഹിമാലയൻ ഇലക്ട്രിക് വികസിപ്പിക്കുന്നത്. 2023ലെ ഇഐസിഎംഎയിൽ ആദ്യ പ്രോട്ടോടൈപ്പ് പ്രദർശിപ്പിച്ച കമ്പനി പിന്നീട് കൂടുതൽ പരിഷ്കരിച്ച പതിപ്പും അവതരിപ്പിച്ചിരുന്നു. പർവതപ്രദേശങ്ങളിൽ ഉൾപ്പെടെ ബൈക്കിന്റെ പരീക്ഷണയോട്ടം നടത്തിയിട്ടുണ്ട്. നിലവിൽ പ്രകടനവും സാങ്കേതികവിദ്യയും മെച്ചപ്പെടുത്തുന്നതിനുള്ള പ്രവർത്തനങ്ങളിലാണ് കമ്പനി. 2027ൽ വിപണിയിലെത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ ഔദ്യോഗിക ലോഞ്ച് സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല. ഈ അഞ്ച് മോഡലുകളും വിപണിയിലെത്തുന്നതോടെ ഇന്ത്യയിലെ അഡ്വഞ്ചർ ബൈക്ക് ശ്രേണി കൂടുതൽ സജീവമാകുമെന്നാണ് പ്രതീക്ഷിക്കുന്നത്.