C TET Result : സി ടെറ്റ് പരീക്ഷ ഫലം പ്രഖ്യാപിച്ചു; പരിശോധിക്കേണ്ടതെങ്ങനെ? ഇക്കാര്യങ്ങൾ ഉറപ്പാക്കണം
Synopsis
ഉദ്യോഗാർത്ഥികൾക്ക് വെബ്സൈറ്റ് സന്ദർശിച്ച് പരീക്ഷഫലം അറിയാവുന്നതാണ്.
ദില്ലി: സെൻട്രൽ ടീച്ചർ എലിജിബിലിറ്റി ടെസ്റ്റ് പരീക്ഷ (Central Teachers Eligibility Test) C TET ഫലം പ്രഖ്യാപിച്ച് സെൻട്രൽ ബോർഡ് ഓഫ് സെക്കണ്ടറി എഡ്യൂക്കേഷൻ (Central Board of Secondary Education). ഫെബ്രുവരി 15നാണ് ഫലം (Result published) പ്രസിദ്ധീകരിച്ചത്. ctet.nic.in പരീക്ഷ ഫലം ലഭ്യമാണ്. ഉദ്യോഗാർത്ഥികൾക്ക് വെബ്സൈറ്റ് സന്ദർശിച്ച് പരീക്ഷഫലം അറിയാവുന്നതാണ്.
ഫലം പരിശോധിക്കേണ്ടതെങ്ങനെ?
ഔദ്യോഗിക വെബ്സൈറ്റായ ctet.nic.in സന്ദർശിക്കുക. ഹോം പേജിൽ CTET result 2021 എന്ന ലിങ്ക് ക്ലിക്ക് ചെയ്യുക. പുതിയ പേജിൽ ആപ്ലിക്കേഷൻ നമ്പറും ജനനതീയതിയും അല്ലെങ്കിൽ ആപ്ലിക്കേഷൻ നമ്പറും പാസ്വേർഡും നൽകി ഫലം അറിയാം. നെഗറ്റീവ് മാർക്കില്ലാതെ, മൾട്ടിപ്പിൾ ചോയിസ് ക്വസ്റ്റയൻസ് ഫോർമാറ്റിലാണ് പരീക്ഷ നടത്തിയത്. ഓൺലൈനായി നടത്തിയ പരീക്ഷയിൽ, ഹിന്ദി ഇംഗ്ലീഷ് എന്നീ രണ്ടു ഭാഷകളിലായി ചോദ്യപേപ്പർ ലഭ്യമാക്കിയിരുന്നു.
എല്ലാ വിഭാഗത്തിലുമുള്ള ഉദ്യോഗാർത്ഥികൾക്ക് സിടെറ്റ് യോഗ്യത സർട്ടിഫിക്കറ്റിന്റെ കാലാവധി ആജീവനാന്തം ആയിരിക്കും. 2011 മുതൽ മുൻകാല പ്രാബല്യത്തോടെ യോഗ്യത സർട്ടിഫിക്കറ്റിന്റെ കാലാവധി 7 വർഷത്തിൽ നിന്ന് ആജീവനാന്തം ആക്കി മാറ്റിയിരുന്നു. കേന്ദ്ര സർക്കാർ നിയന്ത്രണത്തിലുള്ള എയ്ഡഡ്, അൺ എയ്ഡഡ് സിബിഎസ്ഇ സ്കൂളുകളിലും കേന്ദ്രീയ വിദ്യാലയങ്ങളിലും അധ്യാപകരാകാനുള്ള യോഗ്യത പരീക്ഷയാണ് സെൻട്രൽ ടീച്ചർ എലിജിബിലിറ്റി ടെസ്റ്റ് അഥവാ സി ടെറ്റ്.
പരീക്ഷയിൽ യോഗ്യത നേടാൻ 60 ശതമാനം മാർക്ക് നേടണം. സംവരണ വിഭാഗത്തിലുൾപ്പെട്ട വിദ്യാർത്ഥികൾക്ക് 55 ശതമാനമാണ് കട്ട് ഓഫ്. യോഗ്യത നേടുന്നവർക്ക് അധ്യാപകരായി ജോലിക്ക് അപേക്ഷിക്കാവുന്നതാണ്. പേപ്പർ 1 പാസ്സാകുന്നവർക്ക് ഒന്ന് മുതൽ 5 വരെ ക്ലാസുകളിലും പേപ്പർ 2 പാസ്സാകുന്നവർക്ക് 6 മുതൽ എട്ട് വരെ ക്ലാസുകളിലും പഠിപ്പിക്കാം. 2021 സിടെറ്റ് പരീക്ഷക്ക് 20 ലക്ഷത്തിലധികം വിദ്യാർത്ഥികളാണ് രജിസ്റ്റർ ചെയ്തത്.
ലഭിക്കുന്ന സ്കോർ കാർഡിൽ പിശകുകളില്ലെന്ന് ഓരോ ഉദ്യോഗാർത്ഥിയും ഉറപ്പാക്കേണ്ടതാണ്. പേര്, സ്പെല്ലിംഗ് എന്നിവ തെറ്റില്ലെന്ന് ഉറപ്പു വരുത്തുക, പരീക്ഷ - പേപ്പര് 1, പേപ്പർ 2, പരീക്ഷ കേന്ദ്രത്തിന്റെ പേര്, മാർക്കുകൾ ഓരോന്നും ആകെ മാർക്കും പരിശോധിക്കുക, കട്ട് ഓഫ് മാർക്ക്, ഫോട്ടോ എന്നീ അടിസ്ഥാന കാര്യങ്ങളിൽ പിഴവുകളില്ലെന്ന് ഉറപ്പ് വരുത്തണം. എന്തെങ്കിലും പിഴവുകളുണ്ടെങ്കിൽ അക്കാര്യം അധികാരികളെ അറിയിക്കണം.