നീറ്റിൽ ഒന്നാം റാങ്കുകാരൻ, തന്റെ ലക്ഷ്യത്തിലേക്കുള്ള യാത്ര തുടങ്ങിയതിന് പിന്നിൽ ഒരു സ്വകാര്യ ദുഃഖം, വെളിപ്പെടുത്തി ആര്യൻ

2026-ലെ നീറ്റ് യുജി പരീക്ഷയിൽ ഒന്നാം റാങ്ക് നേടിയ ആര്യൻ ഗുപ്ത തൻ്റെ വിജയത്തിന് പിന്നിലെ പ്രചോദനം വെളിപ്പെടുത്തുന്നു. ഡോക്ടർമാരുടെ കുടുംബത്തിൽ നിന്നുള്ള ആര്യൻ, അർബുദരോഗ വിദഗ്ദ്ധനാകാൻ ആഗ്രഹിക്കുന്നതിന് പിന്നിൽ ഒരു വ്യക്തിപരമായ നഷ്ടത്തിൻ്റെ കഥയുണ്ട്.

ദില്ലി: രാജ്യത്തെ ഏറ്റവും കഠിനമായ മെഡിക്കൽ പ്രവേശന പരീക്ഷയായ നീറ്റ് യുജി 2026 ൽ ഒന്നാം റാങ്ക് കരസ്ഥമാക്കിയിരിക്കുകയാണ് ആര്യൻ ഗുപ്ത. എന്നാൽ ഈ ഉന്നതവിജയത്തിനപ്പുറം, ഒരു ഡോക്ടറാകാനുള്ള തൻ്റെ തീരുമാനത്തിന് പിന്നിൽ ചില കാരണങ്ങളുണ്ട് ആര്യന്. അത് തന്നെയാണ് ആര്യനെ ശ്രദ്ധേയനാക്കുന്നതും. വെറുമൊരു ഡോക്ടറാകുക എന്നതിലുപരി, അർബുദ ചികിത്സാ രംഗത്ത് പ്രവർത്തിക്കാനാണ് ആര്യൻ ലക്ഷ്യമിടുന്നത്. ഈ വലിയ സ്വപ്നത്തിന് പിന്നിൽ ആര്യൻ്റെ ജീവിതത്തിലുണ്ടായ ഒരു വ്യക്തിപരമായ നഷ്ടത്തിൻ്റെ കഥയുണ്ട്. ലക്ഷ്യത്തിന് കൂടുതൽ ആഴമേറിയ അർത്ഥം നൽകിയത് തന്റെ മുത്തശ്ശിയുടെ വേർപാടായിരുന്നു. താൻ മൂന്നാം ക്ലാസിൽ പഠിക്കുമ്പോൾ സ്റ്റേജ് 4 ക്യാൻസർ ബാധിച്ച് മരണപ്പെട്ട മുത്തശ്ശിയുടെ ഓർമ്മകളാണ് തന്നെ ഒരു ഓങ്കോളജിസ്റ്റ്  ആകുക എന്ന ഉറച്ച തീരുമാനത്തിലേക്ക് എത്തിച്ചതെന്ന് ആര്യൻ വെളിപ്പെടുത്തി. ആ ദുഃഖമാണ് അർബുദത്തിനെതിരെ പോരാടുക എന്ന ലക്ഷ്യത്തിലേക്ക് അദ്ദേഹത്തെ നയിച്ചത്. ഈയൊരു ലക്ഷ്യബോധം തന്നെയാണ് കഠിനമായ പരീക്ഷയ്ക്ക് തയ്യാറെടുക്കാൻ തനിക്ക് ഊർജ്ജം നൽകിയതെന്നും ആര്യൻ പറയുന്നു.

ഡോക്ടർമാരുടെ കുടുംബത്തിൽ നിന്ന് ഒന്നാമനിലേക്ക്

ഡോക്ടർമാരുടെ ഒരു കുടുംബത്തിലാണ് ആര്യൻ ഗുപ്ത ജനിച്ചതും വളർന്നതും. വൈദ്യശാസ്ത്ര രംഗത്തേക്ക് ചുവടുവെക്കാൻ തനിക്ക് ഏറ്റവും വലിയ പ്രചോദനമായത് ഈ കുടുംബ പശ്ചാത്തലം തന്നെയാണെന്ന് അദ്ദേഹം തുറന്നുപറയുന്നു. ചെറുപ്പം മുതലേ കണ്ടുവളർന്ന ചുറ്റുപാടുകൾ ആര്യനെ ഈ മേഖലയിലേക്ക് ആകർഷിക്കുകയായിരുന്നു. കുടുംബത്തിൽ നിന്നുള്ള പിന്തുണ പഠനവഴിയിൽ വലിയൊരു മുതൽക്കൂട്ട് തന്നെയായിരുന്നു. എങ്കിലും, തൻ്റെ കരിയറിന് വ്യക്തമായ ഒരു ദിശാബോധം നൽകിയത് ജീവിതത്തിലെ ആ നിർണായകമായ അനുഭവമാണ്. അതോടെയാണ് ഒരു ഓങ്കോളജിസ്റ്റ് ആകണമെന്ന തീരുമാനം ആര്യൻ ഉറപ്പിച്ചത്. അർബുദത്തിനെതിരായ പോരാട്ടമാണ് ആര്യൻ തൻ്റെ ജീവിതലക്ഷ്യമായി കാണുന്നത്, അതും വ്യക്തമായ കാരണങ്ങളോടെ. തൻ്റെ അറിവും കഴിവും ഉപയോഗിച്ച് ഈ രംഗത്ത് വലിയ മാറ്റങ്ങൾ കൊണ്ടുവരാൻ സാധിക്കുമെന്നാണ് അദ്ദേഹത്തിൻ്റെ പ്രതീക്ഷ. നീറ്റ് പരീക്ഷയിലെ ഒന്നാം റാങ്ക് ആ ലക്ഷ്യത്തിലേക്കുള്ള ആദ്യ ചുവടുവെപ്പ് മാത്രമാണ്.