ഐ.ഇ.എസ്, ഐ.എസ്.എസ് അഭിമുഖം മാറ്റിവെച്ച് യു.പി.എസ്.സി

 ഏപ്രിൽ 20 മുതൽ 23 വരെയാണ് അഭിമുഖം നടത്താൻ നിശ്ചയിച്ചിരുന്നത്. കൊവിഡ്-19 രോഗബാധയുടെ പശ്ചാത്തലത്തിലാണ് നിലവിലെ തീരുമാനം.

ദില്ലി: 2020-ലെ ഇന്ത്യൻ ഇക്കണോമിക് സർവീസ്, ഇന്ത്യൻ സ്റ്റാറ്റിസ്റ്റിക്കൽ സർവീസ് പരീക്ഷയുടെ അഭിമുഖം മാറ്റിവെച്ചതായി യൂണിയൻ പബ്ലിക് സർവീസ് കമ്മീഷൻ (യു.പി.എസ്.സി) അറിയിപ്പ്. പുതുക്കിയ പരീക്ഷാതീയതികൾ വൈകാതെ അറിയിക്കും. ഏപ്രിൽ 20 മുതൽ 23 വരെയാണ് അഭിമുഖം നടത്താൻ നിശ്ചയിച്ചിരുന്നത്. കൊവിഡ്-19 രോഗബാധയുടെ പശ്ചാത്തലത്തിലാണ് നിലവിലെ തീരുമാനം. ഏപ്രിൽ 20 മുതൽ നടത്താനിരുന്ന എല്ലാ റിക്രൂട്ട്മെന്റ് നടപടികളും മാറ്റിവെക്കാനും യു.പി.എസ്.സി തീരുമാനിച്ചു.

ഐ.ഇ.എസ്, ഐ.എസ്.എസ് അഭിമുഖത്തിന് യോഗ്യത നേടിയിരുന്നത് 162 ഉദ്യോഗാർഥികളാണ്.  ഇതുകൂടാതെ ജൂലൈ 16-നാണ് 2021-ലെ ഐ.ഇ.എസ്, ഐ.എസ്.എസ് പരീക്ഷകൾ നടത്താൻ നിശ്ചയിച്ചിരിക്കുന്നത്. upsc.gov.in എന്ന വെബ്സൈറ്റ് വഴി ഏപ്രിൽ 27 വരെ ഇതിനായി അപേക്ഷിക്കാം. അപേക്ഷ പിൻവലിക്കാനുള്ള സംവിധാനവും യു.പി.എസ്.സി ഒരുക്കുന്നുണ്ട്.