ആമസോണ് ഇന്റര്നെറ്റ് സര്വീസസ് വരുമാനം കുത്തനെ ഉയര്ന്നു; പക്ഷേ കമ്പനി നഷ്ടത്തിലാണ്
Published : Dec 17, 2020, 10:55 PM IST
Synopsis
മുന്വര്ഷം 71.1 കോടി രൂപ ലാഭമുണ്ടാക്കിയ കമ്പനി 2020 മാര്ച്ച് 30 ന് 20 ലക്ഷം രൂപ നഷ്ടം രേഖപ്പെടുത്തി.
ബെംഗളൂരു: ആമസോണ് ഇന്റര്നെറ്റ് സര്വീസസ് പ്രൈവറ്റ് ലിമിറ്റഡിന്റെ വരുമാനം 58 ശതമാനം ഉയര്ന്ന് 4215.9 കോടി രൂപയിലെത്തി. ഇ-കൊമേഴ്സ് ഭീമന്റെ ക്ലൗഡ് സേവന സ്ഥാപനമാണിത്. 2020 സാമ്പത്തിക വര്ഷത്തിലെ കണക്കാണിത്.
2018-19 സാമ്പത്തിക വര്ഷത്തില് 2637.2 കോടി രൂപയായിരുന്നു വരുമാനം. രജിസ്ട്രാര് ഓഫ് കമ്പനീസില് സമര്പ്പിക്കപ്പെട്ട രേഖകളുടെ അടിസ്ഥാനത്തിലാണ് ഇത്. എന്നാല് മുന്വര്ഷം 71.1 കോടി രൂപ ലാഭമുണ്ടാക്കിയ കമ്പനി 2020 മാര്ച്ച് 30 ന് 20 ലക്ഷം രൂപ നഷ്ടം രേഖപ്പെടുത്തി.
2019-20 സാമ്പത്തിക വര്ഷത്തില് 4005.5 കോടി രൂപ ക്ലൗഡ് അനുബന്ധ സേവനത്തില് നിന്നാണ് നേടിയത്. 156.1 കോടി രൂപ മാര്ക്കറ്റിങ് സേവനത്തിലൂടെ ലഭിച്ച വരുമാനമാണ്. അതേസമയം ഇതേക്കുറിച്ച് പ്രതികരിക്കാന് ആമസോണ് ഇന്റര്നെറ്റ് സര്വീസസസ് പ്രൈവറ്റ് ലിമിറ്റഡ് തയ്യാറായിട്ടില്ല.