'സാലറി കട്ട്' പ്രഖ്യാപിച്ച് മുകേഷ് അംബാനിയുടെ റിലയൻസ് ഇൻഡസ്ട്രീസ് ലിമിറ്റഡ് !

കുറവ് ശമ്പളം/ വരുമാനം ലഭിക്കുന്നവർക്ക് നിർദ്ദേശം ബാധിക്കില്ലെന്നും കത്തിൽ വ്യക്തമാക്കി.

മുംബൈ: കൊറോണ വൈറസ് മഹാമാരിയുടെ പ്രത്യാഘാതങ്ങൾ കണക്കിലെടുത്ത് ഹൈഡ്രോകാർബൺ ഡിവിഷനിലെ ചില ജീവനക്കാരുടെ ശമ്പളം 10 ശതമാനം കുറയ്ക്കുമെന്ന് റിലയൻസ് ഇൻഡസ്ട്രീസ് ലിമിറ്റഡ് അറിയിച്ചു.

കമ്പനിയുടെ ഡയറക്ടർ ബോർഡ് അവരുടെ ശമ്പളത്തിന്റെ 30 ശതമാനം മുതൽ 50 ശതമാനം വരെ ഉപേക്ഷിക്കുമെന്നും ഇന്ത്യയിലെ ഏറ്റവും ധനികനായ ചെയർമാൻ മുകേഷ് അംബാനി തന്റെ വേതനം നഷ്ടപരിഹാരമായി കമ്പനിക്ക് നൽകുമെന്നും റിലയൻസ് ഇൻഡസ്ട്രീസ് എക്സിക്യൂട്ടീവ് ഡയറക്ടർ ഹിറ്റൽ ആർ മെശ്വാനി ഒപ്പിട്ട കത്തിൽ പറയുന്നു.

പ്രതിവർഷം 15 ലക്ഷം രൂപയിൽ കൂടുതൽ വരുമാനം നേടുന്ന ഹൈഡ്രോകാർബൺ ഡിവിഷനിലെ ജീവനക്കാർക്കാണ് ഈ ശമ്പളം വെട്ടിക്കുറവ് ബാധകം. അതിൽ കുറവ് ശമ്പളം/ വരുമാനം ലഭിക്കുന്നവർക്ക് നിർദ്ദേശം ബാധിക്കില്ലെന്നും കത്തിൽ വ്യക്തമാക്കി.

"ശുദ്ധീകരിച്ച ഉൽ‌പന്നങ്ങൾക്കും പെട്രോകെമിക്കലുകൾക്കുമുള്ള ഡിമാൻഡ് കുറഞ്ഞത് ഹൈഡ്രോകാർബൺ ബിസിനസിനെ പ്രതികൂലമായി ബാധിച്ചു. ഇത് ഞങ്ങളുടെ ഹൈഡ്രോകാർബൺ ബിസിനസിൽ സമ്മർദ്ദം ചെലുത്തിയിട്ടുണ്ട്, എല്ലാ മേഖലകളിലും ഒപ്റ്റിമൈസേഷനും ചെലവ് കുറയ്ക്കലും ആവശ്യമാണ്, ”കത്തിൽ പറയുന്നു.