തുടര്‍ച്ചയായ രണ്ടാം ലോക ടെസ്റ്റ് ചാമ്പ്യന്‍ഷിപ്പ് ഫൈനല്‍ ലക്ഷ്യമിട്ട് ദക്ഷിണാഫ്രിക്ക; പ്രതീക്ഷ പങ്കുവെച്ച് എയ്ഡന്‍ മാര്‍ക്രം

തുടർച്ചയായ രണ്ടാം തവണയും ലോക ടെസ്റ്റ് ചാമ്പ്യൻഷിപ്പ് ഫൈനലിൽ എത്താൻ ദക്ഷിണാഫ്രിക്കയ്ക്ക് സാധിക്കുമെന്ന് ഓപ്പണർ എയ്ഡൻ മാർക്രം വ്യക്തമാക്കി. നിലവിൽ പോയിന്റ് പട്ടികയിൽ മൂന്നാം സ്ഥാനത്തുള്ള ടീം ഓസ്‌ട്രേലിയക്കെതിരായ അവസാന ടെസ്റ്റ് ജയിച്ച് പരമ്പര സ്വന്തമാക്കാനുള്ള തയ്യാറെടുപ്പിലാണ്.

കേപ്ടൗണ്‍: തുടര്‍ച്ചയായ രണ്ടാം തവണയും ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ എത്താനുള്ള ശേഷി ദക്ഷിണാഫ്രിക്കയ്ക്കുണ്ടെന്ന് ഓപ്പണര്‍ എയ്ഡന്‍ മാര്‍ക്രം. 2025ല്‍ കുറിച്ച ചരിത്രവിജയത്തിന്റെ തുടര്‍ച്ചയായി ഇത്തവണയും ഫൈനല്‍ കളിക്കുക എന്നതാണ് നിലവിലെ ചാമ്പ്യന്മാരുടെ ലക്ഷ്യം. ലോര്‍ഡ്‌സില്‍ നടന്ന കഴിഞ്ഞ ഫൈനലില്‍ ഓസ്‌ട്രേലിയയെ അഞ്ച് വിക്കറ്റിന് തോല്‍പ്പിച്ചാണ് ദക്ഷിണാഫ്രിക്ക കന്നി കിരീടം ചൂടിയത്. മത്സരത്തില്‍ മാര്‍ക്രം നേടിയ 136 റണ്‍സാണ് ടീമിന് വിജയമൊരുക്കിയത്.

കഴിഞ്ഞ തവണ അവസാന ഘട്ടത്തില്‍ തുടര്‍ച്ചയായ ഏഴ് ടെസ്റ്റുകള്‍ ജയിച്ചാണ് ദക്ഷിണാഫ്രിക്ക ഫൈനലിലേക്ക് യോഗ്യത നേടിയത്. ടീമിന് ഇത്തവണ വീണ്ടും മികച്ച പ്രകടനം പുറത്തെടുക്കാനും ഫൈനലിലെത്താനും കൂടുതല്‍ വാശിയുണ്ടെന്ന് മാര്‍ക്രം വ്യക്തമാക്കി. ''വീണ്ടുമൊരു ഫൈനലില്‍ എത്താന്‍ ഞങ്ങള്‍ക്ക് സാധിക്കുമെന്നാണ് എന്റെ വിശ്വാസം. കഴിഞ്ഞ തവണ ഞങ്ങളുടെ ഫൈനല്‍ പ്രവേശനത്തെക്കുറിച്ചും അതിലേക്കുള്ള യാത്രയെക്കുറിച്ചും ഒരുപാട് സംസാരിച്ചിരുന്നു. വളരെ കഠിനമായ വഴിയിലൂടെയാണ് ഞങ്ങള്‍ അത് നേടിയെടുത്തത്. അതുകൊണ്ടുതന്നെ ഇത്തവണ വീണ്ടും ഫൈനലിലെത്താന്‍ ടീമിനുള്ളില്‍ വലിയൊരു ആഗ്രഹവും പോരാട്ടവീര്യവുമുണ്ട്.'' മാര്‍ക്രം പറഞ്ഞു.

പ്രോട്ടീസിന് ഫൈനലിലെത്താനാകുമോ?

പോയിന്റ് പട്ടികയില്‍ നിലവില്‍ മൂന്നാം സ്ഥാനത്താണ് ദക്ഷിണാഫ്രിക്ക. ആറ് ടെസ്റ്റുകളില്‍ നിന്ന് 48 പോയിന്റും 66.67 പോയിന്റ് ശതമാനവുമാണ് അവര്‍ക്കുള്ളത്. ഓസ്‌ട്രേലിയ പട്ടികയില്‍ ഒന്നാമതും ന്യൂസിലന്‍ഡ് രണ്ടാമതുമാണ്. 55.56 പോയിന്റ് ശതമാനത്തോടെ ബംഗ്ലാദേശ് നാലാമതും 51.52 ശതമാനത്തോടെ ഇന്ത്യയും തൊട്ടുപിന്നിലുണ്ട്. ഓസ്‌ട്രേലിയക്കെതിരെ ഡര്‍ബനില്‍ നടന്ന ആദ്യ ടെസ്റ്റ് തോറ്റെങ്കിലും, ഗിബെര്‍ഹയില്‍ നടന്ന രണ്ടാം ടെസ്റ്റില്‍ ഇന്നിംഗ്‌സിനും 31 റണ്‍സിനും ജയിച്ച് പ്രോട്ടീസ് ശക്തമായി തിരിച്ചെത്തി മൂന്ന് മത്സരങ്ങളുടെ പരമ്പര 1-1ന് സമനിലയിലാക്കി. കേപ് ടൗണിലെ ന്യൂലാന്‍ഡ്‌സില്‍ നടക്കുന്ന നിര്‍ണായകമായ അവസാന ടെസ്റ്റിലും ഈ ആധിപത്യം തുടരാനും പരമ്പര സ്വന്തമാക്കാനുമാണ് ദക്ഷിണാഫ്രിക്ക ലക്ഷ്യമിടുന്നത്.