പിങ്ക് ടി20 വനിതാ ക്രിക്കറ്റ്: ആംബറിനെ മറികടന്ന് പേള്‍സ്, റൂബിക്കെതിരെ സാഫറയറിന് ജയം

ഷാനിയുടെ 37 റണ്‍സും ആര്യനന്ദയുടെയും സ്റ്റെഫിയുടെയും മികച്ച ബൗളിങ്ങുമാണ് പേള്‍സിന്റെ വിജയത്തില്‍ നിര്‍ണായകമായത്.

തിരുവനന്തപുരം: കെസിഎ സംഘടിപ്പിക്കുന്ന പിങ്ക് ടി 20 ചലഞ്ചേഴ്‌സ് വനിതാ ക്രിക്കറ്റ് ടൂര്‍ണ്ണമെന്റില്‍ പേള്‍സിനും സാഫയറിനും വിജയം. പേള്‍സ് 18 റണ്‍സിന് ആംബറിനെ തോല്‍പ്പിച്ചപ്പോള്‍ റൂബിക്കെതിരെ അഞ്ച് വിക്കറ്റിനായിരുന്നു സാഫയറിന്റെ വിജയം. ആംബറിനെതിരെ ആദ്യം ബാറ്റ് ചെയ്ത പേള്‍സ് 20 ഓവറില്‍ ഏഴ് വിക്കറ്റ് നഷ്ടത്തില്‍ 114 റണ്‍സെടുത്തു. ക്യാപ്റ്റന്‍ ഷാനിയുടെ ഇന്നിങ്‌സാണ് പേള്‍സിന് കരുത്ത് പകര്‍ന്നത്. ഷാനി 45 പന്തുകളില്‍ നിന്ന് 37 റണ്‍സെടുത്തു. ദിവ്യ ഗണേഷ് 19ഉം കീര്‍ത്തി ജെയിംസ് 15ഉം റണ്‍സ് നേടി. 

രണ്ട് വിക്കറ്റുകള്‍ വീതം വീഴ്ത്തിയ ദര്‍ശന മോഹനനും അക്‌സയുമാണ് ആംബര്‍ ബൌളിങ് നിരയില്‍ തിളങ്ങിയത് . മറുപടി ബാറ്റിങ്ങിന് ഇറങ്ങിയ ആംബറിന് വേണ്ടി ശീതളും ശ്രുതി ശിവദാസനും മാത്രമാണ് അല്പമെങ്കിലും പിടിച്ചു നിന്നത്. ശീതള്‍ 28ഉം ശ്രുതി 18ഉം റണ്‍സെടുത്തു. മറ്റുള്ളവര്‍ കാര്യമായ സംഭാവനകളില്ലാതെ മടങ്ങിയതോടെ 19.3 ഓവറില്‍ 96 റണ്‍സിന് ആംബര്‍ ഓള്‍ ഔട്ടായി.മൂന്ന് വിക്കറ്റ് വീഴ്ത്തിയ ആര്യനന്ദയും രണ്ട് വിക്കറ്റ് വീഴ്ത്തിയ സ്റ്റെഫി സ്റ്റാന്‍ലിയുമാണ് പേള്‍സിന് വേണ്ടി മികച്ച ബൌളിങ് കാഴ്ച വച്ചത്.

രണ്ടാം മത്സരത്തില്‍ സാഫയറിനെതിരെ ആദ്യം ബാറ്റ് ചെയ്ത റൂബിക്ക് 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 66 റണ്‍സ് മാത്രമാണ് നേടാനായത്. ബാറ്റിങ് നിരെ ആകെ തകര്‍ന്നടിഞ്ഞപ്പോള്‍ 20 റണ്‍സെടുത്ത അബിന എം മാത്രമാണ് രണ്ടക്കം കടന്നത്. സാഫയറിന് വേണ്ടി അലീന ഷിബു മൂന്നും ശ്രേയ റോയ് രണ്ട് വിക്കറ്റും വീഴ്ത്തി. മറുപടി ബാറ്റിങ്ങിന് ഇറങ്ങിയ സാഫയറിന് ക്യാപ്റ്റ്ന്‍ അക്ഷയ സദാനന്ദന്‍ മികച്ച തുടക്കം നല്കി. 29 റണ്‍സെടുത്ത അക്ഷയ പുറത്തായതോടെ തുടരെ മൂന്ന് വിക്കറ്റുകള്‍ കൂടി സാഫയറിന് നഷ്ടമായി. 

എന്നാല്‍ ഐശ്വര്യയും അനുശ്രീയും ചേര്‍ന്ന് 34 പന്തുകള്‍ ബാക്കി നില്‌ക്കെ ടീമിനെ ലക്ഷ്യത്തിലെത്തിച്ചു. റൂബിക്ക് വേണ്ടി വിനയ സുരേന്ദ്രന്‍ മൂന്ന് വിക്കറ്റ് വീഴ്ത്തി. വിജയത്തോടെ സാഫയര്‍ പോയിന്റ് പട്ടികയില്‍ മൂന്നാം സ്ഥാനത്തെത്തി. മറുവശത്ത് കളിച്ച എട്ട് മല്‌സരങ്ങളും തോറ്റാണ് ടീം റൂബിയുടെ മടക്കം.