'നിനക്കെന്താ വട്ടാണോ'? ടോസ് കിട്ടിയാല്‍ എന്ത് ചെയ്യണമെന്ന ചോദിച്ച സൂര്യയോട് രോഹിത്, വാങ്കഡെയിൽ ചിരിപടർത്തി 'ഹിറ്റ്മാൻ'

ടോസിന് പോകുന്നതിന് തൊട്ടു മുമ്പ് രോഹിത്തിന് അടുത്തെത്തി സൂര്യ ചോദിച്ചത് ടോസ് കിട്ടിയാല്‍ എന്ത് ചെയ്യണമെന്നായിരുന്നു.

മുംബൈ: ടി20 ലോകകപ്പില്‍ ഇന്നലെ മുംബൈ വാങ്കഡെ സ്റ്റേഡിയത്തിൽ നടന്ന ഇന്ത്യ-അമേരിക്ക പോരാട്ടത്തിന് മുൻപ് ഗ്രൗണ്ടില്‍ ഇന്ത്യയുടെ മുന്‍ നായകനും ലോകകപ്പിന്‍റെ ബ്രാൻഡ് അംബാസഡറുമായ രോഹിത് ശര്‍മയും ക്യാപ്റ്റൻ സൂര്യകുമാര്‍ യാദവും തമ്മില്‍ നടന്ന രസകരമായ സംഭാഷണം പങ്കുവെച്ച് ഐസിസി. മത്സരത്തിന് മുന്നോടിയായി ടോസ് കിട്ടിയാൽ ബാറ്റിംഗ് വേണോ ഫീൽഡിംഗ് വേണോ എന്ന് ചോദിച്ച നായകൻ സൂര്യകുമാർ യാദവിന് രോഹിത് ശർമ്മ നൽകിയ മറുപടിയാണ് ആരാധകര്‍ക്കിടയില്‍ വൈറലായത്.

ടോസിന് പോകുന്നതിന് തൊട്ടു മുമ്പ് രോഹിത്തിന് അടുത്തെത്തി സൂര്യ ചോദിച്ചത് ടോസ് കിട്ടിയാല്‍ എന്ത് ചെയ്യണമെന്നായിരുന്നു. നിനക്ക് വട്ടാണോ, ഫീല്‍ഡിംഗ് എടുത്താല്‍ മതി എന്നായിരുന്നു രോഹിത്തിന്‍റെ ചിരിച്ചുകൊണ്ടുള്ള മറുപടി.മുംബൈയിലെ പിച്ചിന്‍റെ സ്വഭാവം മുൻകൂട്ടി കണ്ടായിരുന്നു രോഹിത്തിന്‍റെ ഈ തമാശ കലർന്ന മറുപടി.

എന്നാൽ മത്സരത്തിൽ ടോസ് നേടിയത് യുഎസ്എ നായകൻ മൊനാങ്ക് പട്ടേലായിരുന്നു. അമേരിക്ക ഇന്ത്യയെ ബാറ്റിംഗിന് അയക്കുകയും ചെയ്തു. രോഹിത് ഭയന്നതുപോലെ തന്നെ വാങ്കഡെയിലെ പിച്ച് ബാറ്റിംഗിന് അത്ര എളുപ്പമായിരുന്നില്ല. എന്നാൽ ഒരുവശത്ത് വിക്കറ്റുകൾ വീഴുമ്പോഴും ക്യാപ്റ്റൻ സൂര്യകുമാർ യാദവ് ഉറച്ചുനിന്നു. 49 പന്തിൽ 10 ഫോറും 4 സിക്സും സഹിതം പുറത്താകാതെ 84 റൺസ് നേടിയ സൂര്യയാണ് ഇന്ത്യയെ 161 എന്ന പൊരുതാവുന്ന സ്കോറിലെത്തിച്ചത്. മറുപടി ബാറ്റിംഗിൽ അമേരിക്കയെ 132 റൺസിൽ ഒതുക്കി ഇന്ത്യ 29 റൺസിന്‍റെ വിജയം സ്വന്തമാക്കി. അവസാന നിമിഷം പരിക്കേറ്റ ഹര്‍ഷിത് റാണക്ക് പകരം ടീമിലെത്തി 3 വിക്കറ്റ് വീഴ്ത്തിയ മുഹമ്മദ് സിറാജാണ് ഇന്ത്യക്കായി ബൗളിംഗിൽ തിളങ്ങിയത്.

പിച്ച് അൽപം കടുപ്പമേറിയതായിരുന്നു. ജയിച്ചു എന്നതുകൊണ്ട് മാത്രം പിഴവുകൾ മറച്ചുവെക്കാനാവില്ല. ഞങ്ങൾ ഇതിലും നന്നായി ബാറ്റ് ചെയ്യേണ്ടതുണ്ടെന്ന് മത്സരശേഷം സൂര്യകുമാര്‍ യാദവ് പറഞ്ഞിരുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക