ചിന്നസ്വാമിയില്‍ മാക്‌സ്‌വെല്‍ വെടിക്കെട്ട്; ഇന്ത്യക്ക് പരമ്പര നഷ്‌ടം

രണ്ടാം ടി20യില്‍ ഓസ്‌ട്രേലിയ ഏഴ് വിക്കറ്റിന് വിജയിച്ചു. ഇന്ത്യയുയര്‍ത്തിയ 191 റണ്‍സ് വിജയലക്ഷ്യം രണ്ട് പന്തുകള്‍ ബാക്കിനില്‍ക്കേ മൂന്ന് വിക്കറ്റ് നഷ്ടത്തില്‍ ഓസീസ് മറികടന്നു. 

ബെംഗളൂരു: ചിന്നസ്വാമിയിലെ മാക്‌സ്‌വെല്‍ വെടിക്കെട്ടില്‍ ഓസ്‌ട്രേലിയക്കെതിരായ ടി20 പരമ്പര ഇന്ത്യക്ക് നഷ്ടം. രണ്ടാം ടി20യില്‍ ഓസ്‌ട്രേലിയ ഏഴ് വിക്കറ്റിന് വിജയിച്ചു. ഇന്ത്യയുയര്‍ത്തിയ 191 റണ്‍സ് വിജയലക്ഷ്യം രണ്ട് പന്തുകള്‍ ബാക്കിനില്‍ക്കേ മൂന്ന് വിക്കറ്റ് നഷ്ടത്തില്‍ ഓസീസ് മറികടന്നു. തകര്‍പ്പന്‍ സെഞ്ചുറി നേടിയ മാക്‌സി 55 പന്തില്‍ ഒമ്പത് സിക്‌സും ഏഴ് ബൗണ്ടറിയും സഹിതം പുറത്താകാതെ 113 റണ്‍സെടുത്തു. ഇതോടെ പരമ്പര 2-0ന് ഓസീസ് സ്വന്തമാക്കി.

മറുപടി ബാറ്റിംഗില്‍ ഓസീസിന് തുടക്കത്തിലെ രണ്ട് വിക്കറ്റ് നഷ്ടമായിരുന്നു. മാര്‍ക്‌സ് സ്‌റ്റോയിനിസ് (7), ആരോണ്‍ ഫിഞ്ച് (8) എന്നിവര്‍ പുറത്തായപ്പോള്‍ ഓസീസ് സ്‌കോര്‍ രണ്ട് വിക്കറ്റിന് 22. എന്നാല്‍ ഡാര്‍സി ഷോര്‍ട്ട് ഓസീസിനെ മുന്നോട്ടുനയിച്ചു. 12-ാം ഓവറില്‍ ഡാര്‍സി പുറത്താകുമ്പോള്‍ ഓസീസ് സ്‌കോര്‍ 100നടുത്തെത്തി. 28 പന്തില്‍ 40 റണ്‍സാണ് ഡാര്‍സി ഷോര്‍ട്ട്‌ നേടിയത്. 

പിന്നാലെ ചിന്നസ്വാമി സ്റ്റേഡിയത്തില്‍ കണ്ടത് മാക്‌സി വെടിക്കെട്ട്. 28 പന്തില്‍ താരം അര്‍ദ്ധ സെഞ്ചുറി പൂര്‍ത്തിയാക്കി. എന്നാല്‍ അവസാന അഞ്ച് ഓവറില്‍ ഓസീസിന് 60 റണ്‍സെന്ന കൂറ്റന്‍ ലക്ഷ്യം മുന്നിലുണ്ടായിരുന്നു. ഈ ലക്ഷ്യം അനായാസം മാക്‌സിയും ഹാന്‍‌ഡ്സ്‌കോമ്പും ചേര്‍ന്ന് നേടി. 50 പന്തില്‍ മാക്‌സി 100 തികച്ചു. 19-ാം ഓവറില്‍ ബുംറ ഇന്ത്യക്ക് പ്രതീക്ഷ നല്‍കിയെങ്കിലും അവസാന ഓവറില്‍ വേണ്ടിയിരുന്ന ഒമ്പത് റണ്‍സ് നാല് പന്തില്‍ ഓസീസ് നേടി. ഹാന്‍ഡ്‌സ്‌കോമ്പ് 20 റണ്‍സെടുത്ത് മാക്‌സിക്കൊപ്പം പുറത്താകാതെ നിന്നു.

നേരത്തെ, കെ എല്‍. രാഹുല്‍ (47), വിരാട് കോലി (38 പന്തില്‍ 72), എം എസ്. ധോണി (23 പന്തില്‍ 40) എന്നിവരുടെ ഇന്നിങ്‌സാണ് ഇന്ത്യക്ക് മികച്ച സ്‌കോര്‍ സമ്മാനിച്ചത്. ഓസീസിന് വേണ്ടി ബെഹ്രന്‍ഡോര്‍ഫ്, കൗള്‍ട്ടര്‍നൈല്‍, ഡാര്‍സി ഷോര്‍ട്ട്, പാറ്റ് കമ്മിന്‍സ് എന്നിവര്‍ ഓരോ വിക്കറ്റ് വീഴ്ത്തി. 

മികച്ച തുടക്കമാണ് ഇന്ത്യക്ക് ലഭിച്ചത്. ആദ്യ വിക്കറ്റില്‍ കെ.എല്‍ രാഹുല്‍- ശിഖര്‍ ധവാന്‍ സഖ്യം 61 റണ്‍സ് കൂട്ടിച്ചേര്‍ത്തു. എന്നാല്‍ എന്നാല്‍ തുടരെ മൂന്ന് വിക്കറ്റുകള്‍ ഇന്ത്യക്ക് നഷ്ടമായി. രാഹുല്‍, ധവാന്‍ (24 പന്തില്‍ 14), ഋഷഭ് പന്ത് (1) എന്നിവരാണ് മടങ്ങിയത്. നാല് സിക്‌സും മൂന്ന് ഫോറും അടങ്ങുന്നതാണ് രാഹുലിന്റെ ഇന്നിങ്‌സ്. 

എന്നാല്‍ ക്രീസില്‍ ഒത്തുച്ചേര്‍ന്ന കോലി- ധോണി സഖ്യം ഇന്ത്യയെ മികച്ച സ്‌കോറിലേക്ക് നയിച്ചു. ഇരുവരും 100 റണ്‍സ് കൂട്ടിച്ചേര്‍ത്തു. ആറ് സിക്‌സും രണ്ട് ഫോറും അടങ്ങുന്നതായിരുന്നു കോലിയുടെ ഇന്നിങ്‌സ്. അക്രമിച്ച് കളിച്ച ധോണി മൂന്ന് വീതം സിക്‌സും ഫോറും നേടി. അവസാനങ്ങളില്‍ ദിനേശ് കാര്‍ത്തികും (മൂന്ന് പന്തില്‍ 8) തിളങ്ങിയതോടെ ഇന്ത്യയുടെ സ്‌കോര്‍ 190ലെത്തി.