ക്രിസ് ഗെയില്‍ ഗ്രീന്‍ഫീല്‍ഡില്‍ ബാറ്റ് വീശും; കാണികളെ ആവേശത്തിലാക്കാന്‍ യൂണിവേഴ്‌സല്‍ ബോസ് കാര്യവട്ടത്ത്

ലോക ക്രിക്കറ്റിലെ സിക്‌സര്‍ രാജാവായ ക്രിസ് ഗെയില്‍ ഓഗസ്റ്റ് 29-ന് തിരുവനന്തപുരം കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ ബാറ്റ് ചെയ്യും. കെസിഎല്ലിലെ കൊച്ചി ബ്ലൂ ടൈഗേഴ്‌സിന്റെ മത്സരത്തിന് മുന്നോടിയായി നടക്കുന്ന പ്രത്യേക ബാറ്റിങ് പ്രകടനത്തിലാണ് അദ്ദേഹം പങ്കെടുക്കുക. ഗെയ്ലിന്റെ വെടിക്കെട്ട് ബാറ്റിങ് നേരിൽ കാണാനുള്ള അപൂർവ്വ അവസരമാണിത്.

തിരുവനന്തപുരം: ലോക ക്രിക്കറ്റിലെ സിക്‌സര്‍ രാജാവായ 'യൂണിവേഴ്‌സല്‍ ബോസ്' ക്രിസ് ഗെയ്ല്‍ വീണ്ടും പാഡണിയുന്നു. ആരാധകരെ ആവേശത്തിലാഴ്ത്താന്‍ ഓഗസ്റ്റ് 29-ന് തിരുവനന്തപുരം കാര്യവട്ടം ഗ്രീന്‍ഫീല്‍ഡ് ഇന്റര്‍നാഷണല്‍ സ്റ്റേഡിയത്തിലാണ് ഗെയ്ല്‍ ബാറ്റ് വീശുക. ഉച്ചയ്ക്ക് 2.30-ന് നടക്കുന്ന കെസിഎല്ലിലെ കൊച്ചി ബ്ലൂ ടൈഗേഴ്‌സിന്റെ മത്സരത്തിന് മുന്നോടിയായി ആരാധകര്‍ക്കായി ഒരുക്കുന്ന പ്രത്യേക ബാറ്റിങ് പ്രകടനത്തിലാകും അദ്ദേഹം ക്രീസിലെത്തുക.

ഗാലറികളെ ഇളക്കിമറിക്കുന്ന ഗെയ്ലിന്റെ വിഖ്യാതമായ വെടിക്കെട്ട് ബാറ്റിങ്ങും പടുകൂറ്റന്‍ സിക്‌സറുകളും നേരില്‍ കാണാന്‍ ക്രിക്കറ്റ് പ്രേമികള്‍ക്ക് ലഭിക്കുന്ന അപൂര്‍വ്വ അവസരമാണിത്. ലോകമെമ്പാടുമുള്ള കാണികളെ ആവേശത്തിലാറാടിച്ച ഗെയ്ലിന്റെ സ്‌ഫോടനാത്മക ബാറ്റിങ് ശൈലിക്ക് സാക്ഷിയാകാന്‍ കഴിയുന്നത് ക്രിക്കറ്റ് ആരാധകര്‍ക്ക് വലിയൊരു വിരുന്നായിരിക്കുമെന്ന് കൊച്ചി ബ്ലൂ ടൈഗേഴ്‌സ് ഉടമ സുഭാഷ് മാനുവല്‍ വ്യക്തമാക്കി. ഈ ബാറ്റിങ് വിസ്മയത്തിനും തുടര്‍ന്ന് നടക്കുന്ന കൊച്ചി ബ്ലൂ ടൈഗേഴ്‌സിന്റെ പോരാട്ടത്തിനും സാക്ഷ്യം വഹിക്കാന്‍ മുഴുവന്‍ കായികപ്രേമികളെയും സ്റ്റേഡിയത്തിലേക്ക് സ്വാഗതം ചെയ്യുന്നതായും അദ്ദേഹം കൂട്ടിച്ചേര്‍ത്തു.