ബിസിസിഐയെ തള്ളി ദക്ഷിണാഫ്രിക്ക! എട്ട് താരങ്ങള് ഐപിഎല് പ്ലേ ഓഫിന് മുമ്പ് തിരിച്ചെത്തണം, ടീമുകള് തിരിച്ചടി
Synopsis
ലോക ടെസ്റ്റ് ചാംപ്യൻഷിപ്പ് ഫൈനലിനായി ദക്ഷിണാഫ്രിക്ക എട്ട് ഐപിഎൽ താരങ്ങളെ തിരിച്ചുവിളിക്കുന്നു. മേയ് 26ന് താരങ്ങൾ നാട്ടിലേക്ക് മടങ്ങും.
കേപ്ടൗണ്: ലോക ടെസ്റ്റ് ചാംപ്യന്ഷിപ്പ് ഫൈനലിനുള്ള ദക്ഷിണാഫ്രിക്കന് ടീമിലേക്ക് തെരഞ്ഞെടുക്കപ്പെട്ട എട്ട് താരങ്ങള്ക്ക് ഐപിഎല് പ്ലേ ഓഫ് മത്സരങ്ങള് നഷ്ടമാവും. മുംബൈയുടെ കോര്ബിന് ബോഷ്, ഹൈദരാബാദിന്റെ വിയാന് മൗള്ഡര്, പഞ്ചാബിന്റെ മാര്കോ യാന്സന്, ലക്നൗവിന്റെ എയ്ഡന് മാര്ക്രാം, ബെംഗളൂരുവിന്റെ ലുംഗി എന്ഗിഡി, ഗുജറാത്തിന്റെ കാഗിസോ റബാഡ, മുംബൈയില് റയാന് റിക്കിള്ട്ടണ്, ഡല്ഹിയുടെ ട്രിസ്റ്റന് സ്റ്റബ്സ് എന്നിവര് ഈമാസം 26ന് നാട്ടിലേക്ക് മടങ്ങും. എട്ട് താരങ്ങളെ 26ന് തിരിച്ചയക്കണമെന്ന് ബിസിസിഐ ടീം ഫ്രാഞ്ചൈസികളെ അറിയിച്ചു.
നേരത്തേ മേയ് 25ന് ഫൈനല് നടത്താനായിരുന്നു നിശ്ചയിച്ചിരുന്നത്. ഇതനുസരിച്ചാണ് താരങ്ങളുടെ മടക്ക യാത്ര ക്രമീകരിച്ചത്. എന്നാല് അതിര്ത്തിയിലെ സംഘര്ഷത്തെ തുടര്ന്ന് ഒരാഴ്ച ഐപിഎല് നിര്ത്തിവച്ചപ്പോള് ഫൈനല് മേയ് മൂന്നിലേക്ക് മാറ്റുകയായിരുന്നു. ജൂണ് പതിനൊന്നിന് തുടങ്ങുന്ന ലോക ടെസ്റ്റ് ചാംപ്യന്ഷിപ്പ് ഫൈനലില് ഓസ്ട്രേലിയയാണ് ദക്ഷിണാഫ്രിക്കയുടെ എതിരാളികള്. ഫൈനലിനുള്ള ദക്ഷിണാഫ്രിക്കന് ടീമിനെ തെംബ ബവൂമ നയിക്കും. 15 അംഗ ടീമിനെയാണ് ഹെഡ് കോച്ച് ഷുക്രി കോണ്റാഡ് പ്രഖ്യാപിച്ചത്. എട്ട് മാസത്തെ ഇടവേളയ്ക്ക് ശേഷം ലുങ്കി എന്ഗിഡിയും ദക്ഷിണാഫ്രിക്കന് ടീമിലെത്തി.
എയ്ഡന് മാര്ക്രം, ടോണി ഡി സോര്സി, ഡേവിഡ് ബെഡിംഗ്ഹാം, റിയാന് റിക്കല്ട്ടണ്, ട്രിസ്റ്റന് സ്റ്റബ്സ്, വിക്കറ്റ് കീപ്പര് കൈല് വെറെയ്ന് എന്നിവരുള്പ്പെടുന്നതാണ് ദക്ഷിണാഫ്രിക്കയുടെ ബാറ്റിംഗ് നിര. പേസര്മാരായി ഡെയ്ന് പാറ്റേഴ്സണ്, ഓള്റൗണ്ടര്മാരായ മാര്ക്കോ ജാന്സെന്, വിയാന് മള്ഡര്, കോര്ബിന് ബോഷ് എന്നിവരും ടീമിലുണ്ട്. കേശവ് മഹാരാജും സെനുരന് മുത്തുസാമിയും സ്പിന്നാര്മാരായും ടീമിലെത്തി. ഇവരില് ഒരാള്ക്കായിക്കും പ്ലേയിംഗ് ഇലവനില് അവസരം ലഭിക്കുക.
ടെസ്റ്റ് ചാംപ്യന്ഷിപ്പ് ഫൈനലിനുള്ള ദക്ഷിണാഫ്രിക്കന് സ്ക്വാഡ്: തെംബ ബാവുമ (ക്യാപ്റ്റന്), ടോണി ഡി സോര്സി, എയ്ഡന് മാര്ക്രം, വിയാന് മള്ഡര്, മാര്ക്കോ ജാന്സെന്, കാഗിസോ റബാഡ, കേശവ് മഹാരാജ്, ലുങ്കി എന്ഗിഡി, കോര്ബിന് ബോഷ്, കെയ്ല് വെറെയ്നെ, ഡേവിഡ് ബെഡിംഗ്ഹാം, ട്രിസ്റ്റന് സ്റ്റബ്സ്, റയാന് റിക്കല്ടണ്, സെനുറാന് മുത്തുസാമി.