ഐപിഎല്: പവര് പ്ലേയില് അടിതെറ്റി ഹൈദരാബാദ്, ഡല്ഹിക്കെതിരെ ബാറ്റിംഗ് തകര്ച്ച, 4 വിക്കറ്റ് നഷ്ടം
Synopsis
ഒരറ്റത്ത് ഹെഡ് തകര്ത്തടിക്കുമ്പോഴും തുടര്ച്ചയായി വിക്കറ്റുകള് നഷ്ടമായത് ഹൈദരാബാദിന് തിരിച്ചടിയായി.
വിശാഖപട്ടണം: പവര് പ്ലേയില് തകര്ത്തടിക്കുന്ന ഹൈദരാബാദിന്റെ പതിവ് തെറ്റിച്ച് ഡല്ഹി ക്യാപിറ്റല്സ്. ഐപിഎല്ലില് ഡല്ഹി ക്യാപിറ്റല്സിനെതിരെ ടോസ് നേടി ബാറ്റിംഗിനിറങ്ങിയ ഹൈദരാബാദ് ഒടുവില് വിവരം ലഭിക്കുമ്പോള് എട്ടോവറില് നാലു് വിക്കറ്റ് നഷ്ടത്തില് 90 റണ്സെന്ന നിലയിലാണ്. 13 പന്തില് 22 റണ്സുമായി ഹെന്റിച്ച് ക്ലാസനും 17 പന്തില് 34 റണ്സുമായി അനികേത് വര്മയുമാണ് ക്രീസില്. അഭിഷേക് ശര്മ, ഇഷാന് കിഷന്, നിതീഷ് കുമാര് റെഡ്ഡി, ട്രാവിസ് ഹെഡ് എന്നിവരുടെ വിക്കറ്റുകലാണ് ഹൈദരാബാദിന് നഷ്ടമായത്. ഡല്ഹിക്കായി മിച്ചല് സ്റ്റാര്ക്ക് മൂന്ന് വിക്കറ്റെടുത്തു.
ടോസ് നേടി ക്രീസിലിറങ്ങിയ ഹൈദരാബാദിനായി ട്രാവിസ് ഹെഡ് തകര്ത്തടിച്ച് തുടങ്ങി. മിച്ചല് സ്റ്റാര്ക്ക് എറിഞ്ഞ ആദ്യ ഓവറിലെ രണ്ടും മൂന്നും പന്തുകള് ഹെഡ് ബൗണ്ടറി കടത്തി തുടങ്ങിയ. അഞ്ചാം പന്തില് സിംഗിള് എടുക്കാനുള്ള ശ്രമത്തില് അഭിഷേക് ശർമ റണ്ണൗട്ടായത് ഹൈദരാബാദിന് ആദ്യ പ്രഹമായി. മുകേഷ് കുമാര് എറിഞ്ഞ രണ്ടാം ഓവറില് അതിശക്തമായ എല്ബിഡബ്ല്യു അപ്പീല് അതിജീവിച്ച ഇഷാന് കിഷനും ക്രീസില് അധികം ആയുസുണ്ടായില്ല. മിച്ചല് സ്റ്റാര്ക്ക് എറിഞ്ഞ മൂന്നാം ഓവറില് കിഷനെ(2) സ്റ്റാര്ക്ക് തേര്ഡ് മാനില് ട്രിസ്റ്റന് സ്റ്റബ്സിന്റെ കൈകളിലെത്തിച്ചു. പിന്നാലെ സ്റ്റാര്ക്ക് അഞ്ച് വൈഡ് വഴങ്ങിയെങ്കിലും നിതീഷ് കുമാര് റെഡ്ഡിയെ(0) അക്കൗണ്ട് തുറക്കും മുമ്പെ മടക്കി ഹൈദാരാബാദിനെ കൂട്ടത്തകര്ച്ചയിലാക്കി.
ഒരറ്റത്ത് ഹെഡ് തകര്ത്തടിക്കുമ്പോഴും തുടര്ച്ചയായി വിക്കറ്റുകള് നഷ്ടമായത് ഹൈദരാബാദിന് തിരിച്ചടിയായി. മുകേഷ് കുമാര് എറിഞ്ഞ പവര് പ്ലേയിലെ നാലാം ഓവറില് എട്ട് റണ്സ് മാത്രമെടുക്കാനെ ഹൈദരാബാദിനായുള്ളു. മിച്ചല് സ്റ്റാര്ക്കിന് പവര് പ്ലേയില് മൂന്നാം ഓവര് നല്കാനുള്ള ഡല്ഹി ക്യാപിറ്റല്സ് നായകന് അക്സര് പട്ടേലിന്റെ തീരുമാനം വീണ്ടും ഫലം കാണുന്നതാണ് പിന്നീട് കണ്ടത്. പവര് പ്ലേയിലെ അഞ്ചാം ഓവര് എറിയാനെത്തിയ സ്റ്റാര്ക്ക് ആദ്യ പന്തില് തന്നെ തകര്ത്തടിച്ച ട്രാവിസ് ഹെഡിനെ(12 പന്തില് 22) വിക്കറ്റിന് പിന്നില് കെ എൽ രാഹുലിന്റെ കൈകളിലെത്തിച്ചു. ഇതോടെ 37-4ലേക്ക് ഹൈദരാബാദ് കൂപ്പുകുത്തി. സ്റ്റാര്ക്കിന്റെ ഓവറില് സിക്സും ഫോറും പറത്തിയ ക്ലാസസന് ഹൈദരാബാദിനെ 50 കടത്തി.
അക്സര് പട്ടേല് എറിഞ്ഞ വര് പ്ലേയിലെ അവസാന ഓവറില് അനികേത് വര്മ നല്കിയ ക്യാച്ച് എക്സ്ട്രാ കവറില് അഭിഷേക് പോറല് കൈവിട്ടത് ഹൈദരാബാദിന് അനുഗ്രഹമായി. ആ ഓവറില് എട്ട് റണ്സ് മാത്രം നേടി പവര് പ്ലേയില് 58 റണ്സിലെത്തിയ ഹൈദരാബാദ് ഏഴാം ഓവറിലും എട്ടാം ഓവറിലും 16 റണ്സ് വീതമെടുത്ത് 90 റണ്സിലെത്തി.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!