പരിക്ക്, ത്രിരാഷ്ട്ര പരമ്പരയ്ക്കുള്ള ന്യൂസിലന്‍ഡ് ടീമില്‍ നിന്ന് ഗ്ലെന്‍ ഫിലിപ്‌സിനെ ഒഴിവാക്കി

പരിക്കേറ്റതിനെ തുടർന്ന് ത്രിരാഷ്ട്ര പരമ്പരയിൽ നിന്ന് ഗ്ലെൻ ഫിലിപ്‌സിനെ ഒഴിവാക്കി.

ഹരാരെ: സിംബാബ്‌വെയില്‍ പുരോഗമിക്കുന്ന ത്രിരാഷ്ട്ര പരമ്പരയ്ക്കുള്ള ന്യൂസിലന്‍ഡ് ടീമില്‍ നിന്ന് ഗ്ലെന്‍ ഫിലിപ്‌സിനെ ഒഴിവാക്കി. മേജര്‍ ലീഗ് ക്രിക്കറ്റ് ടൂര്‍ണമെന്റിനിടെയാണ് താരത്തിന് പരിക്കേല്‍ക്കുന്നത്. എങ്കിലും അദ്ദേഹത്തെ ത്രിരാഷ്ട്ര പരമ്പരയ്ക്കുള്ള ടീമില്‍ ഉള്‍പ്പെടുത്തിയിരുന്നു. എന്നാല്‍ ഫിലിപ്‌സിന് നാല് ആഴ്ചത്തെ വിശ്രമം ആവശ്യമുള്ളതിനാല്‍ ഒഴിവാക്കുകയായിരുന്നു. സിംബാബ്‌വെയ്‌ക്കെതിരെ ന്യൂസിലാന്‍ഡ് ടീമിന്റെ രണ്ട് ടെസ്റ്റ് മത്സരങ്ങള്‍ക്കുള്ള ടീമില്‍ നിന്നും ഫിലിപ്‌സിനെ ഒഴിവാക്കും. വിക്കറ്റ് കീപ്പര്‍ മിച്ചല്‍ ഹെ, ഓള്‍റൗണ്ടര്‍ ജിമ്മി നീഷിം എന്നിവരില്‍ ഒരാള്‍ പകരക്കാരനായി കളിക്കും.

അതേസമയം, പരമ്പരയില്‍ ന്യൂസിലന്‍ഡ് ഇന്ന് രണ്ടാം ജയം സ്വന്തമാക്കി. സിംബാബ്‌വെയ്‌ക്കെതിരായ മത്സരത്തില്‍ എട്ട് വിക്കറ്റിന്റെ ജയമാണ് കിവീസ് നേടിയത്. ഹരാരെ സ്‌പോര്‍ട്‌സ് ക്ലബില്‍ നടന്ന മത്സരത്തില്‍ 121 റണ്‍സ് വിജയലക്ഷ്യം രണ്ട് വിക്കറ്റ് മാത്രം നഷ്ടത്തില്‍ മറികടക്കുകയായിരുന്നു ന്യൂസിലന്‍ഡ്. 40 പന്തില്‍ 59 റണ്‍സുമായി പുറത്താവാതെ നിന്ന ഡെവോണ്‍ കോണ്‍വെയാണ് കിവീസിനെ വിജയത്തിലേക്ക് നയിച്ചത്. പരമ്പരയില്‍ ന്യൂസിലന്‍ഡിന്റെ രണ്ടാം ജയമാണിത്. ആദ്യ മത്സരത്തില്‍ പരമ്പരയിലെ മൂന്നാമത്തെ ടീമായ ദക്ഷിണാഫ്രിക്കയെ തോല്‍പ്പിച്ചിരുന്നു കിവീസ്.

വിജയലക്ഷ്യത്തിലേക്ക് ബാറ്റിംഗ് തുടങ്ങിയ കിവീസിന് തുടക്കത്തില്‍ തന്നെ ടിം സീഫെര്‍ട്ടിന്റെ (3) വിക്കറ്റ് നഷ്ടമായി. എന്നാല്‍ മൂന്നാം വിക്കറ്റില്‍ ഡെവോണ്‍ കോണ്‍വെ - രചിന്‍ രവീന്ദ്ര (19 പന്തില്‍ 30) സഖ്യം 59 റണ്‍സ് കൂട്ടിചേര്‍ത്തു. രചിന്‍ പുറത്തായെങ്കില്‍ ഡാരില്‍ മിച്ചലിനെ (19 പന്തില്‍ 26) കൂട്ടുപിടിച്ച് കോണ്‍വെ ടീമിനെ വിജയത്തിലേക്ക് നയിച്ചു. കോണ്‍വെയുടെ ഇന്നിംഗ്‌സില്‍ രണ്ട് സിക്‌സും നാല് ഫോറുമുണ്ടായിരുന്നു. നേരത്തെ, ടോസ് നഷ്ടപ്പെട്ട് ബാറ്റിംഗിനെത്തിയ ആതിഥേയര്‍ക്ക് വേണ്ടി വെസ്ലി മധെവേരെ (36) മാത്രമാണ് തിളങ്ങിയത്. ന്യൂസിലന്‍ഡിന് വേണ്ടി മാറ്റ് ഹെന്റി മൂന്ന് വിക്കറ്റ് വീഴ്ത്തി.

മധെവേരേയ്ക്ക് പുറമെ ബ്രയാന്‍ ബെന്നറ്റ് (21), സിക്കന്ദര്‍ റാസ (12), റ്യാന്‍ ബേണ്‍ (12), മൂന്യോഗ (13) എന്നിവരാണ് സിംബാബ്‌വെയ്ക്ക് വേണ്ടി രണ്ടക്കം കണ്ട മറ്റുതാരങ്ങള്‍. ക്ലൈവ് മഡാന്റെ (8), തഷിക മുസെകിവ (4) എന്നിവരും പുറത്തായി. ടിനോതെന്‍ഡ മപോസ (9) പുറത്താവാതെ നിന്നു. മറുപടി ബാറ്റിംഗില്‍ ടിം സീഫെര്‍ട്ടിന്റെ (3) വിക്കറ്റാണ് ന്യൂസിലന്‍ഡിന് നഷ്ടമായത്. ബ്ലെസിംഗ് മുസറബാനിക്കാണ് വിക്കറ്റ്. നിലവില്‍ നാല് പോയിന്റുമായി ന്യൂസിലന്‍ഡാണ് പരമ്പരയില്‍ ഒന്നാമത്. രണ്ട് മത്സരങ്ങളില്‍ ഒരു ജയമുള്ള ദക്ഷിണാഫ്രിക്ക രണ്ടാം സ്ഥാനത്തുണ്ട്. രണ്ട് മത്സരങ്ങളും പരാജയപ്പെട്ട സിംബാബ്‌വെയ്ക്ക് പോയിന്റില്ല.