IND vs SA : ചിന്നസ്വാമി ടി20 മഴ കൊണ്ടുപോയി; മത്സരം ഉപേക്ഷിച്ചു, പരമ്പര വീതംവെയ്ക്കും
Synopsis
ഇന്ത്യന് ഇന്നിംഗ്സ് 3.3 ഓവറില് 28-2 എന്ന നിലയില് നില്ക്കുമ്പോഴാണ് വീണ്ടും മഴയെത്തിയത്
ബെംഗളൂരു: ചിന്നസ്വാമിയിലെ ആവേശപ്പോര് മഴമുടക്കിയപ്പോള് ഇന്ത്യ-ദക്ഷിണാഫ്രിക്ക ടി20(India vs South Africa) പരമ്പരയിലെ അഞ്ചാമത്തെയും അവസാനത്തേയും മത്സരം(IND vs SA 5th T20I) ഉപേക്ഷിച്ചു. ഇതോടെ 2-2ന് പരമ്പര ഇരു ടീമുകളും പങ്കിടും. തുടക്കത്തില് മഴമൂലം വൈകിയാരംഭിച്ച മത്സരത്തില് ഇന്ത്യന് ഇന്നിംഗ്സ് 3.3 ഓവറില് 28-2 എന്ന നിലയില് നില്ക്കുമ്പോഴാണ് വീണ്ടും മഴയെത്തിയത്. പിന്നീട് മത്സരം പുനരംരാഭിക്കാന് കഴിഞ്ഞില്ല.
ഏഴ് മണിക്ക് ആരംഭിക്കേണ്ടിയിരുന്ന മത്സരം മഴമൂലം 7.50നാണ് ആരംഭിച്ചത്. മത്സരം ഇരു ടീമിനും 19 ഓവർ വീതമായി ചുരുക്കുകയും ചെയ്തു. ഫൈനലിന് സമാനമായ അഞ്ചാം ടി20യില് ദക്ഷിണാഫ്രിക്കയ്ക്കെതിരെ ആദ്യ ഓവറില് കേശവ് മഹാരാജിനെ തുടർച്ചയായി രണ്ട് സിക്സറിന് പറത്തിയാണ് ഇഷാന് കിഷന് തുടങ്ങിയത്. എന്നാല് രണ്ടാം ഓവറില് എന്ഗിഡി സ്ലോ ബോളില് ഇഷാനെ(7 പന്തില് 15) ബൌള്ഡാക്കി. നാലാം ഓവറില് പന്തെടുത്തപ്പോള് റുതുരാജ് ഗെയ്ക്വാദിനെയും(12 പന്തില് 10) എന്ഗിഡി പുറത്താക്കി. ഇന്ത്യ 3.3 ഓവറില് 28-2 എന്ന നിലയിലുള്ളപ്പോള് വീണ്ടും മഴയെത്തുകയായിരുന്നു.
ടോസ് നേടിയ ദക്ഷിണാഫ്രിക്കന് നായകന് കേശവ് മഹാരാജ് ബൌളിംഗ് തെരഞ്ഞെടുക്കുകയായിരുന്നു. മൂന്ന് മാറ്റങ്ങള് പ്രോട്ടീസിന്റെ പ്ലേയിംഗ് ഇലവനിലുണ്ടായിരുന്നു. സ്ഥിരം നായകന് തെംബാ ബാവുമ ഇന്ന് കളിച്ചില്ല. തബ്രൈസ് ഷംസി, മാർക്കോ യാന്സന് എന്നിവരാണ് പുറത്തായ മറ്റ് താരങ്ങള്. ട്രിസ്റ്റണ് സ്റ്റബ്സ്, റീസാ ഹെന്ഡ്രിക്സ്, കാഗിസോ റബാഡ എന്നിവർ ദക്ഷിണാഫ്രിക്കയുടെ പ്ലേയിംഗ് ഇലവനിലെത്തിയപ്പോള് ഇന്ത്യന് ടീമില് മാറ്റമുണ്ടായിരുന്നില്ല.
ഇന്ത്യ: റുതുരാജ് ഗെയ്ക്വാദ്, ഇഷാന് കിഷന്, ശ്രേയസ് അയ്യർ, റിഷഭ് പന്ത്(വിക്കറ്റ് കീപ്പർ/ക്യാപ്റ്റന്), ഹാർദിക് പാണ്ഡ്യ, ദിനേശ് കാർത്തിക്, അക്സർ പട്ടേല്, ഭുവനേശ്വർ കുമാർ, യുസ്വേന്ദ്ര ചാഹല്, ആവേശ് ഖാന്.
ദക്ഷിണാഫ്രിക്ക: ക്വിന്റണ് ഡികോക്ക്(വിക്കറ്റ് കീപ്പർ), റീസാ ഹെന്ഡ്രിക്സ്, റാസ്സീ വാന്ഡർ ഡസ്സന്, ഡേവിഡ് മില്ലർ, ഹെന്റിച്ച് ക്ലാസന്, ട്രിസ്റ്റന് സ്റ്റബ്സ്, ഡ്വെയ്ന് പ്രിറ്റോറിയസ്, കാഗിസോ റബാഡ, കേശവ് മഹാരാജ്(ക്യാപ്റ്റന്), ലുങ്കി എന്ഗിഡി, ആന്റിച്ച് നോർക്യ.
ഓസ്ട്രേലിയയില് 200 ചേസ് ചെയ്യാന് കരുത്തന്; ഇംപാക്ട് പ്ലേയറുടെ പേരുമായി നെഹ്റ
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!