ധ്രുവ് ജുറെലിന് പിന്നാലെ സെഞ്ചുറിയുമായി ദേവ്ദത്ത് പടിക്കലും, 500 കടന്ന് ഇന്ത്യ എ, ഓസ്ട്രേലിയ എക്കെതിരെ ലീഡിലേക്ക്
Synopsis
ഓസ്ട്രേലിയ എക്കെതിരായ അനൗദ്യോഗിക ടെസ്റ്റില് ധ്രുവ് ജുറെലിന് പിന്നാലെ ദേവ്ദത്ത് പടിക്കലും സെഞ്ചുറി നേടി. ഇരുവരുടെയും സെഞ്ചുറി മികവില് ഇന്ത്യ എ ഓസ്ട്രേലിയ എക്കെതിരെ ലീഡിലേക്ക് നീങ്ങുന്നു.
ലക്നൗ: ഓസ്ട്രേലിയ എക്കെതിരായ അനൗദ്യോഗിക ടെസ്റ്റില് ധ്രുവ് ജുറെലിന് പിന്നാലെ സെഞ്ചുറി നേടിയ മലയാളി താരം ദേവ്ദത്ത് പടിക്കിലിന്റെ ബാറ്റിംഗ് മികവില് ഒന്നാം ഇന്നിംഗ്സ് ലീഡിനരികെ ഇന്ത്യ എ. ഓസ്ട്രേലിയയുടെ ഒന്നാം ഇന്നിംഗ്സ് സ്കോറായ 532 റണ്സിന് മറുപടിയായി നാലാം ദിനം ലഞ്ചിന് പിരിയുമ്പോള് ഇന്ത്യ എ ഏഴ് വിക്കറ്റ് നഷ്ടത്തില് 520 റണ്സെന്ന നിലയിലാണ്. ആറ് റണ്സോടെ ഹര്ഷ് ദുബെയാണ് ക്രീസില്. 140 റണ്സെടുത്ത ധ്രുവ് ജുറെലിന്റെയും 16 റണ്സെടുത്ത തനുഷ് കൊടിയാന്റെയും 150 റണ്സെടുത്ത ദേവ്ദത്ത് പടിക്കലിന്റെയും വിക്കറ്റുകളാണ് ഇന്ത്യ എക്ക് ഇന്ന് നഷ്ടമായത്.
പടിക്കല് മിന്നി
140 റണ്സെടുത്ത ധ്രുവ് ജുറെലിന ഒനീല് ആണ് പുറത്താക്കിയത്. അഞ്ചാം വിക്കറ്റില് 228 റൺസ് കൂട്ടിച്ചേര്ത്തശേഷമാണ് ധ്രുവ് ജുറെല്-ദേവ്ദത്ത് പടിക്കല് സഖ്യം വേര്പിരിഞ്ഞത്. 16 റണ്സെടുത്ത കൊടിയാനെ കോറി റോച്ചിസിയോലി പുറത്താക്കി. ലഞ്ചിന് തൊട്ടു മുമ്പ് ദേവ്ദത്ത് പടിക്കലിനെ കൂടി മടക്കി റോച്ചിസിയോലി ഇന്ത്യയുടെ ലീഡ് പ്രതീക്ഷകൾക്ക് തിരിച്ചടി നല്കി. മൂന്ന് വിക്കറ്റ് കൈയിലിരിക്കെ ഓസീസിന്റെ ഒന്നാം ഇന്നിംഗ്സ് സ്കോറിനൊപ്പമെത്താന് ഇന്ത്യക്ക് 12 റണ്സ് കൂടി വേണം.
നാലു വിക്കറ്റ് നഷ്ത്തില് 413 റണ്സെന്ന നിലയിലാണ് ഇന്ത്യ നാലാം ദിനം ക്രീസിലിറങ്ങിയത്. ഇന്നലെ ഓസീസിന്റെ കൂറ്റന് ഒന്നാം ഇന്നിംഗ്സ് സ്കോറിന് മറുപടി പറയാനിറങ്ങിയ ഇന്ത്യക്ക് സ്കോര്ബോര്ഡില് 88 റണ്സുള്ളപ്പോഴാണ് ആദ്യ വിക്കറ്റ് നഷ്ടമായത്. 44 റണ്സെടുത്ത അഭിമന്യൂ ഈശ്വരനെ ലിയാം സ്കോട്ട് ആണ് മടക്കിയത്. പിന്നാലെ ജഗദീശനും(64) പവലിയനില് തിരിച്ചെത്തി. സായ് സുദര്ശനൊപ്പം 49 റണ്സ് ചേര്ത്ത ശേഷമാണ് ജഗദീശന് മടങ്ങിയത്. തുടര്ന്ന് ദേവ്ദത്ത് - സായ് സഖ്യം 76 റണ്സ് കൂട്ടിചേര്ത്തു. എന്നാല് കൂപ്പര് കൊണോലി ബ്രേക്ക് ത്രൂമായെത്തി. സായ് വിക്കറ്റിന് മുന്നില് കുടുങ്ങുകയായിരുന്നു.
അഞ്ചാമനായി ക്രീസിലെത്തിയ ക്യാപ്റ്റൻ ശ്രേയസ് അയ്യര്ക്ക് ബാറ്റിംഗില് തിളങ്ങാനായില്ല. എട്ട് റണ്സ് മാത്രമെടുത്ത താരം കോറി റോച്ചിസിയോലിയുടെ പന്തില് വിക്കറ്റിന് മുന്നില് കുടുങ്ങിപുറത്താവുകയായിരുന്നു. വെസ്റ്റ് ഇന്ഡീസിനെതിരെ അടുത്ത മാസം തുടങ്ങുന്ന ടെസ്റ്റ് പരമ്പരയ്ക്കുള്ള ഇന്ത്യൻ ടീമില് തിരിച്ചെത്താമെന്ന് പ്രതീക്ഷിക്കുന്ന ശ്രേയസിന് തിരിച്ചടിയാണ് ഓസ്ട്രേലിയ എക്കെതിരായ മോശം പ്രകടനം.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക