ഹര്‍മന്‍പ്രീത് ഷോ, കൂട്ടിന് ഷഫാലിയും; സിംബാബ്‌വെക്കെതിരായ ടി20 പരമ്പര ഇന്ത്യ തൂത്തുവാരി

സിംബാബ്‌വെ വനിതകൾക്കെതിരായ മൂന്ന് മത്സരങ്ങളുള്ള ടി20 പരമ്പര ഇന്ത്യ തൂത്തുവാരി. അവസാന മത്സരത്തിൽ ഹർമൻപ്രീത് കൗറിന്റെയും ഷഫാലി വർമയുടെയും ബാറ്റിംഗ് മികവിൽ ഇന്ത്യ 92 റൺസിന്റെ കൂറ്റൻ ജയം സ്വന്തമാക്കി. ഇനി മൂന്ന് ഏകദിന മത്സരങ്ങൾ കൂടിയാണ് പരമ്പരയിൽ ബാക്കിയുള്ളത്.

റായ്പൂര്‍: സിംബാബ്‌വെ വനിതകള്‍ക്കെതിരായ ടി20 പരമ്പര ഇന്ത്യ തൂത്തുവാരി. മൂന്ന് മത്സരങ്ങളുള്ള പരമ്പരയിലെ അവസാന ടി20യില്‍ 92 റണ്‍സിന്റെ കൂറ്റന്‍ ജയാണ് ഇന്ത്യ നേടിയത്. റായ്പൂര്‍, വീര്‍ നാരായണ്‍ സിംഗ് ഇന്റര്‍നാഷണല്‍ സ്റ്റേഡിയത്തില്‍ ടോസ് നേടി ബാറ്റിംഗ് തെരഞ്ഞെടുത്ത ഇന്ത്യ ഏഴ് വിക്കറ്റ് നഷ്ടത്തില്‍ 216 റണ്‍സാണ് നേടിയത്. 41 പന്തില്‍ 91 റണ്‍സുമായി പുറത്താവാതെ നിന്ന മുന്‍ ക്യാപ്റ്റന്‍ ഹര്‍മന്‍പ്രീത് കൗറാണ് ഇന്ത്യയുടെ ടോപ് സ്‌കോറര്‍. മറുപടി ബാറ്റിംഗില്‍ സിംബാബ്‌വെക്ക് ഏഴ് വിക്കറ്റ് നഷ്ടത്തില്‍ 124 റണ്‍സ് നേടാനാണ് സാധിച്ചത്. നന്ദനി ശര്‍മ ഇന്ത്യക്ക് വേണ്ടി മൂന്ന് വിക്കറ്റ് നേടി.

49 പന്തില്‍ 60 റണ്‍സ് നേടിയ ഷെയ്ന്‍ മയേഴ്‌സ്, 50 പന്തില്‍ 44 റണ്‍സ് നേടിയ ബിലൊവ്ഡ് ബിസ എന്നിവര്‍ മാത്രമാണ് സിംബാബ്‌വെ നിരയില്‍ പൊരുതിയത്. മറ്റാര്‍ക്കും രണ്ടക്കം കാണാന്‍ പോലും സാധിച്ചില്ല. ഇന്ത്യന്‍ ബൗളര്‍മാരില്‍ നന്ദനിക്ക് പുറമെ ക്രാന്തി ഗൗദ്, അരുന്ദതി റെഡ്ഡി, ദീപ്തി ശര്‍മ, നിക്കി പ്രസാദ് എന്നിവര്‍ ഓരോ വിക്കറ്റും വീഴ്ത്തി.

നേരത്തെ, ഹര്‍മന്‍പ്രീതിന് പുറമെ ഷഫാലി വര്‍മയും (37 പന്തില്‍ 69) ഇന്ത്യന്‍ നിരയില്‍ മികച്ച പ്രകടനം പുറത്തെടുത്തിരുന്നു. അനുഷ്‌ക ശര്‍മയാണ് (20 പന്തില്‍ 28) രണ്ടക്കം കണ്ട മറ്റൊരു താരം. നികി പ്രസാദ് (9), റിച്ച ഘോഷ് (1), ദീപ്തി ശര്‍മ (0), അരുന്ദതി റെഡ്ഡി (4), പ്രേമ റാവത്ത് (4) എന്നിവരുടെ വിക്കറ്റുകളും ഇന്ത്യക്ക് നഷ്ടമായി. ക്യാപ്റ്റന്‍ സ്മൃതി മന്ദാന ബാറ്റിംഗിനെത്തിയില്ല. ക്യാപ്റ്റന്‍ സ്ഥാനത്ത് നിന്ന് പിന്മാറി, സമ്മര്‍ദ്ദമില്ലാതെ കളിച്ച ഹര്‍മന്‍പ്രീത് അഞ്ച് സിക്‌സും 10 ഫോറും നേടി. ഷഫാലിയുടെ അക്കൗണ്ടില്‍ അഞ്ച് സിക്‌സും ആറ് ഫോറുമുണ്ടായിരുന്നു. പരമ്പരയില്‍ ഇനി മൂന്ന് ഏകദിന മത്സരങ്ങള്‍ കൂടി ബാക്കിയുണ്ട്.