'ക്രിക്കറ്റില് ആവേശം സ്വാഭാവികം'; വൈഭവിനെ പുറത്താക്കിയ സംഭവത്തില്, ജാമിസണ് പിന്തുണയുമായി ഫെര്ഗൂസന്
Synopsis
രാജസ്ഥാന് റോയല്സ് താരം വൈഭവ് സൂര്യവന്ഷിയെ പുറത്താക്കിയ ശേഷമുള്ള കെയ്ല് ജാമിസന്റെ പ്രകോപനപരമായ പെരുമാറ്റത്തിന് പിന്തുണയുമായി സഹതാരം ലോക്കി ഫെര്ഗൂസന്. ക്രിക്കറ്റില് കളിക്കാര് വികാരങ്ങള് പ്രകടിപ്പിക്കുന്നത് സ്വാഭാവികമാണെന്നും അത് ആരാധകര്ക്ക് ഇഷ്ടമുള്ള കാര്യമാണെന്നും ഫെര്ഗൂസന് പറഞ്ഞു.
അഹമ്മദാബാദ്: രാജസ്ഥാന് റോയല്സിന്റെ കൗമാര താരം വൈഭവ് സൂര്യവന്ഷിയെ പുറത്താക്കിയ ശേഷം പ്രകോപനപരമായി പെരുമാറിയതിന് ശിക്ഷിക്കപ്പെട്ട കെയ്ല് ജാമിസണ് പിന്തുണയുമായി ന്യൂസിലന്ഡ് സഹതാരം ലോക്കി ഫെര്ഗൂസന്. ക്രിക്കറ്റില് കളിക്കാര് ആവേശവും വികാരങ്ങളും പ്രകടിപ്പിക്കുന്നത് സ്വാഭാവികമാണെന്നും അത് ആരാധകര്ക്ക് ഇഷ്ടപ്പെടുന്ന കാര്യമാണെന്നും ഫെര്ഗൂസന് പറഞ്ഞു. ഞായറാഴ്ച ഗുജറാത്ത് ടൈറ്റന്സിനെതിരായ മത്സരത്തിന് മുന്നോടിയായിട്ടാണ് പഞ്ചാബ് കിംഗ്സ് താരം തന്റെ നിലപാട് വ്യക്തമാക്കിയത്.
ആവേശം ക്രിക്കറ്റിന് നല്ലത്
വെള്ളിയാഴ്ച നടന്ന മത്സരത്തില് 15 വയസ്സുകാരനായ സൂര്യവന്ഷിയെ പുറത്താക്കിയ ശേഷം ജാമിസണ് നടത്തിയ ആഘോഷമാണ് വിവാദമായത്. 'കെയ്ല് എന്റെ അടുത്ത സുഹൃത്താണ്. വിക്കറ്റ് നേടിയപ്പോള് അവന് ആവേശഭരിതനായി, അത് തികച്ചും മനസ്സിലാക്കാവുന്നതേയുള്ളൂ. ഇന്ത്യയിലെ സാഹചര്യങ്ങളില് വിക്കറ്റ് വീഴ്ത്തുക എന്നത് അത്ര എളുപ്പമുള്ള കാര്യമല്ല. ആവേശം കാണിക്കുന്നത് കളിയുടെ ഭാഗമാണ്.' ഫെര്ഗൂസന് പറഞ്ഞു. ബാറ്റര്മാര്ക്കും ഫീല്ഡര്മാര്ക്കും നല്കുന്നതിനേക്കാള് കര്ശനമായ നിയന്ത്രണങ്ങളാണോ ബൗളര്മാര്ക്ക് നല്കുന്നത് എന്ന ചോദ്യത്തിന് നേരിട്ട് മറുപടി നല്കാന് ഫെര്ഗൂസന് തയ്യാറായില്ല.
എങ്കിലും, വിരാട് കോലിയെപ്പോലുള്ള താരങ്ങളുടെ അമിതമായ ആഘോഷങ്ങള് ചര്ച്ചയാകുന്ന സാഹചര്യത്തില് ഫെര്ഗൂസന്റെ വാക്കുകള്ക്ക് പ്രാധാന്യമുണ്ട്. 'കളിക്കാരുടെ ഉള്ളിലെ ആവേശം പുറത്തുവരുന്നത് ക്രിക്കറ്റിന് നല്ലതാണ്. താരങ്ങള് വികാരങ്ങള് പ്രകടിപ്പിക്കുന്നത് കാണാനാണ് ആരാധകര്ക്കും ഇഷ്ടം.' അദ്ദേഹം കൂട്ടിച്ചേര്ത്തു.
പഞ്ചാബ് കിംഗ്സിന്റെ ബൗളിംഗ് കരുത്ത്
സീസണിലെ ആദ്യ മത്സരങ്ങള് നഷ്ടമായ ശേഷം ടീമിലേക്ക് തിരിച്ചെത്തിയ ലോക്കി ഫെര്ഗൂസന് പഞ്ചാബ് കിംഗ്സിന്റെ ബൗളിംഗ് നിരയ്ക്ക് വലിയ കരുത്താണ്. ബാറ്റിംഗില് ടീം മികച്ച പ്രകടനം നടത്തുന്നുണ്ടെങ്കിലും, അഞ്ച് തവണ 200-ന് മുകളില് റണ്സ് വഴങ്ങിയ ബൗളിംഗ് നിരയിലെ പോരായ്മകള് പരിഹരിക്കാനുള്ള ശ്രമത്തിലാണെന്ന് അദ്ദേഹം പറഞ്ഞു.
'അര്ഷദീപ് സിംഗും യുസ്വേന്ദ്ര ചഹാലും നയിക്കുന്ന ഞങ്ങളുടെ ബൗളിംഗ് നിര മികച്ചതാണ്. കഴിഞ്ഞ മത്സരത്തില് സ്പിന്നര്മാര് നന്നായി പന്തെറിഞ്ഞു. ചെറിയ പിഴവുകള് തിരുത്തി ആസൂത്രണത്തോടെ മുന്നോട്ട് പോകാനാണ് ഞങ്ങള് ശ്രമിക്കുന്നത്.' ഫെര്ഗൂസന് കൂട്ടിചേര്ത്തു.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!