രചിന്‍ രവീന്ദ്ര തിരിച്ചെത്തി; ഇന്ത്യക്കെതിരായ ഏകദിന പരമ്പരയ്ക്ക് ന്യൂസിലന്‍ഡിന് വ്യത്യസ്ത ടീമുകള്‍
Synopsis
ഇന്ത്യക്കെതിരായ അഞ്ച് മത്സരങ്ങളുടെ ഏകദിന പരമ്പരയ്ക്കുള്ള ന്യൂസിലാന്‍ഡ് ടീമിനെ പ്രഖ്യാപിച്ചു. ആദ്യ മൂന്ന് മത്സരങ്ങൾക്കും അവസാന രണ്ട് മത്സരങ്ങൾക്കുമായി രണ്ട് വ്യത്യസ്ത ടീമുകളെയാണ് പ്രഖ്യാപിച്ചിരിക്കുന്നത്.
വെല്ലിംഗ്ടണ്‍: ഇന്ത്യക്കെതിരായ വരാനിരിക്കുന്ന അഞ്ച് മത്സരങ്ങളുടെ ഏകദിന പരമ്പരയ്ക്കുള്ള ന്യൂസിലാന്‍ഡ് ടീമിനെ പ്രഖ്യാപിച്ചു. ഫിന്‍ അലന്‍, ലോക്കി ഫെര്‍ഗൂസന്‍, ടിം സീഫെര്‍ട്ട് എന്നിവര്‍ ഏകദിന ടീമിലേക്ക് തിരിച്ചെത്തി. പരിക്കിനെ തുടര്‍ന്ന് ടി20 പരമ്പര കളിക്കാതിരിക്കുന്ന രചിന്‍ രവീന്ദ്ര, ആദ്യ മൂന്ന് ഏകദിനങ്ങള്‍ക്കുള്ള ടീമില്‍ ഇടം നേടി. നവംബര്‍ 4-ന് ഓക്ലന്‍ഡിലെ ഈഡന്‍ പാര്‍ക്കിലാണ് പരമ്പര ആരംഭിക്കുന്നത്. ആദ്യ മൂന്ന് ഏകദിനങ്ങള്‍ക്കും അവസാന രണ്ട് മത്സരങ്ങള്‍ക്കുമായി രണ്ട് വ്യത്യസ്ത സ്‌ക്വാഡുകളെയാണ് ന്യൂസിലാന്‍ഡ് പ്രഖ്യാപിച്ചിരിക്കുന്നത്.
വൈറ്റ് ബോള്‍ ക്യാപ്റ്റന്‍ മിിച്ചല്‍ സാന്റ്നര് ടീമിനെ നയിക്കും. അവസാന രണ്ട് ഏകദിനങ്ങള്‍ക്കായി ഏഴ് പുതിയ കളിക്കാര്‍ ടീമിനൊപ്പം ചേരും. ഒഴിവാക്കപ്പെടുന്ന താരങ്ങള്‍ ടെസ്റ്റ് മത്സരങ്ങള്‍ക്കുള്ള ടീമിനൊപ്പം ചേരും. 2023ന് ശേഷമാണ് ഫിന്‍ അലനും ലോക്കി ഫെര്‍ഗൂസനും ഏകദിന ടീമില്‍ ഇടംനേടുന്നത്. മുംബൈയില്‍ ഇന്ത്യക്കെതിരായ ലോകകപ്പ് സെമി ഫൈനലിലാണ് ഫെര്‍ഗൂസന്‍ അവസാനമായി ഏകദിനം കളിച്ചത്. 18 മാസം മുമ്പ് പാകിസ്ഥാനെതിരായ ഹോം പരമ്പരയിലാണ് ടിം സീഫെര്‍ട്ട് അവസാനമായി ഏകദിനം കളിച്ചത്. ഈ മൂന്ന് താരങ്ങളും പരമ്പരയിലെ അവസാന രണ്ട് മത്സരങ്ങള്‍ക്കായി ടീമിനൊപ്പം ചേരും.
സാക്ക് ഫൗള്‍ക്‌സ്, വില്ല്യം ഒറൂര്‍ക്കെ, ബെന്‍ സിയേഴ്‌സ് എന്നിവര്‍ പരിക്കിന്റെ പിടിയിലായതിനാല്‍ സെലക്ഷന് ലഭ്യമായിരുന്നില്ല. കഴിഞ്ഞ ജനുവരിയില്‍ ഇന്ത്യയില്‍ വെച്ച് ഏകദിന പരമ്പര 2-1ന് ന്യൂസിലന്‍ഡ് ജയിച്ചിരുന്നു. അന്ന് കളിച്ച താരങ്ങളില്‍ മിക്കവരും ടീമില്‍ സ്ഥാനം നിലനിര്‍ത്തിയിട്ടുണ്ട്.
2027ല്‍ ദക്ഷിണാഫ്രിക്ക, സിംബാബ്വെ, നമീബിയ എന്നിവിടങ്ങളില്‍ നടക്കുന്ന ഏകദിന ലോകകപ്പിന് മുന്നോടിയായി ടീമിന്റെ കരുത്ത് പരിശോധിക്കാനുള്ള മികച്ച അവസരമായാണ് ഇന്ത്യക്കെതിരായ ഈ ഹോം പരമ്പരയെ കാണുന്നതെന്ന് ന്യൂസിലാന്‍ഡ് ഹെഡ് കോച്ച് റോബ് വാള്‍ട്ടര്‍ വ്യക്തമാക്കി.
ഇന്ത്യക്കെതിരെ ആദ്യ മൂന്ന് ഏകദിനങ്ങള്‍ക്കുള്ള ന്യൂസിലാന്‍ഡ് ടീം: മിച്ചല്‍ സാന്റ്നര് (ക്യാപ്റ്റന്‍), മൈക്കല്‍ ബ്രേസ്‌വെല്‍, മാര്‍ക്ക് ചാപ്മാന്‍, ഡെവോണ്‍ കോണ്‍വേ, ജേക്കബ് ഡഫി, മാറ്റ് ഹെന്റി, കെയ്ല്‍ ജാമിസണ്‍, ടോം ലാഥം (വിക്കറ്റ് കീപ്പര്‍), ഡാരില്‍ മിച്ചല്‍, ഗ്ലെന്‍ ഫിലിപ്‌സ്, രചിന്‍ രവീന്ദ്ര, നഥാന്‍ സ്മിത്ത്, വില്ല് യംഗ്, ബ്ലെയര്‍ ടിക്ക്‌നര്‍.
അവസാന രണ്ട് മത്സരങ്ങള്‍ക്കുള്ള ടീം: മിച്ചല്‍ സാന്റ്നര് (ക്യാപ്റ്റന്‍), ഫിന്‍ അലന്‍, മൈക്കല്‍ ബ്രേസ്‌വെല്‍, മാര്‍ക്ക് ചാപ്മാന്‍, ക്രിസ്റ്റ്യന്‍ ക്ലാര്‍ക്ക്, ജേക്കബ് ഡഫി, മാറ്റ് ഫിഷര്‍, ലോക്കി ഫെര്‍ഗൂസന്‍, മിച്ച് ഹേ (വിക്കറ്റ് കീപ്പര്‍), നിക്ക് കെല്ലി, ടിം സീഫെര്‍ട്ട് (വിക്കറ്റ് കീപ്പര്‍), ബ്ലെയര്‍ ടിക്ക്‌നര്‍, വില്ല് യംഗ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!