റിയല് കേരള സ്റ്റോറി; സഞ്ജു സാംസണിന്റെ ചിറകില് ഇന്ത്യ ടി20 ലോകകപ്പ് സെമിയില്, വിന്ഡീസിനെ തകര്ത്തത് അഞ്ച് വിക്കറ്റിന്
Synopsis
ടി20 ലോകകപ്പ് സൂപ്പര് എട്ടില് വെസ്റ്റ് ഇന്ഡീസിനെ അഞ്ച് വിക്കറ്റിന് തകര്ത്ത് ഇന്ത്യ സെമി ഫൈനലില് പ്രവേശിച്ചു.
കൊല്ക്കത്ത: സഞ്ജു സാംസണിന്റെ ചിറകിലേറി ഇന്ത്യ ടി20 ലോകകപ്പിന്റെ സെമി ഫൈനലില്. സൂപ്പര് എട്ടില് നിര്ണായക മത്സരത്തില് വെസ്റ്റ് ഇന്ഡീസിനെ അഞ്ച് വിക്കറ്റിന് തോല്പ്പിച്ചാണ് ഇന്ത്യ അവസാന നാലിലെത്തുന്നത്. ഇംഗ്ലണ്ടാണ് സെമിയില് ഇന്ത്യയുടെ എതിരാളി. കൊല്ക്കത്ത, ഈഡന് ഗാര്ഡന്സില് ടോസ് നഷ്ടപ്പെട്ട് ബാറ്റിംഗിനെത്തിയ വിന്ഡീസ് നിശ്ചിത ഓവറില് നാല് വിക്കറ്റ് നഷ്ടത്തില് 195 റണ്സാണ് നേടിയത്. 25 പന്തില് 40 റണ്സ് നേടിയ റോസ്റ്റണ് ചേസാണ് വിന്ഡീസിന്റെ ടോപ് സ്കോറര്. ഇന്ത്യക്ക് വേണ്ടി ജസ്പ്രിത് ബുമ്ര രണ്ട് വിക്കറ്റ് വീഴ്ത്തി. മറുപടി ബാറ്റിംഗില് ഇന്ത്യ 19.2 ഓവറില് അഞ്ച് വിക്കറ്റ് നഷ്ടത്തില് ലക്ഷ്യം മറികടന്നു. സഞ്ജുവിന്റെ (50 പന്തില് പുറത്താവാതെ 97) ഇന്നിംഗ്സാണ് ഇന്ത്യയെ വിജയത്തിലേക്ക് നയിച്ചത്.
മറുപടി ബാറ്റിംഗില് മോശം തുടക്കമായിരുന്നു ഇന്ത്യക്ക്. മൂന്നാം ഓവറില് ഇന്ത്യക്ക് അഭിഷേക് ശര്മയുടെ (10) വിക്കറ്റ് നഷ്ടമായി. ഹൊസീന്റെ പന്തില് ഷിംറോണ് ഹെറ്റ്മെയര്ക്ക് ക്യാച്ച്. അഞ്ചാം ഓവറില് ഇഷാന് കിഷനും (10) മടങ്ങി. ഹോള്ഡര്ക്കായിരുന്നു വിക്കറ്റ്. പിന്നാലെ സൂര്യകുമാര് യാദവ് (18) - സഞ്ജു കൂട്ടുകെട്ട് 58 റണ്സ് കൂട്ടിചേര്ത്തു. എന്നാല് 11-ാം ഓവറില് സൂര്യ മടങ്ങി. തുടര്ന്നെത്തിയ തിലക് വര്മ (15 പന്തില് 27) - സഞ്ജു സഖ്യം വേഗത്തില് 42 റണ്സ് ചേര്ത്തു. എന്നാല് 15-ാം ഓവറില് തിലക് മടങ്ങി. തുടര്ന്നെത്തിയ ഹാര്ദിക് പാണ്ഡ്യക്കും (17) കാര്യമായൊന്നും ചെയ്യാന് സാധിച്ചില്ല. 19-ാം ഓവറിലാണ് ഹാര്ദിക് മടങ്ങുന്നത്. എന്നാല് സഞ്ജു - ശിവം ദുബെ (4 പന്തില് 8) സഖ്യം ഇന്ത്യയെ വിജയത്തിലേക്ക് നയിച്ചു. അവസാന ഓവറില് ഏഴ് റണ്സാണ് ഇന്ത്യക്ക് ജയിക്കാന് വേണ്ടിയിരുന്നു. റൊമാരിയോ ആദ്യ പന്ത് തന്നെ സഞ്ജു സിക്സര് പറത്തി. പിന്നാലെ ഫോറും. ഇന്ത്യക്ക് അഞ്ച് വിക്കറ്റ് ജയം. 50 പന്തുകള് നേരിട്ട താരം നാല് സിക്സും 12 ഫോറും നേടി.
ടോസ് നഷ്ടപ്പെട്ട് ബാറ്റിംഗിനെത്തിയ വിന്ഡീസിന് വേണ്ടി ബാറ്റ് ചെയ്ത മിക്കവരും ഭേദപ്പെട്ട പ്രകടനം പുറത്തെടുത്തു. നേരത്തെ, പതിഞ്ഞ തുടക്കമായിരുന്നു വിന്ഡീസിന്. ഒന്നാം വിക്കറ്റില് ഷായ് ഹോപ്പ് (33 പന്തില് 32) - ചേസ് സഖ്യം 68 റണ്സ് ചേര്ത്തെങ്കിലും ഇന്നിംഗ്സിന് ഒട്ടും വേഗമുണ്ടായിരുന്നില്ല. 53 പന്തുകള് ഇരുവരും നേരിട്ടു. ഒമ്പതാം ഓവറിലാണ് കൂട്ടുകെട്ട് പൊളിയുന്നത്. തുടര്ന്നെത്തിയ ഷിംറോണ് ഹെറ്റ്മെയര് 12 പന്തില് 27 റണ്സ് സ്കോറിംഗ് വേഗത്തിലാക്കി. എന്നാല് ഒരോവറില് ഹെറ്റമെയറേയും ചേസിനേയും മടക്കിയച്ച് ജസ്പ്രിത് ബുമ്ര ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നു.
ഷെഫാനെ റുതര്ഫോര്ഡിനെ (14) ഹാര്ദിക് പാണ്ഡ്യയും മടക്കിയതോടെ നാലിന് 119 എന്ന നിലയിലായി വിന്ഡീസ്. തുടര്ന്ന് റോവ്മാന് പവല് (19 പന്തില് 34) - ജേസണ് ഹോള്ഡര് (22 പന്തില് 37) സഖ്യം പുറത്താവാതെ നേടിയ 76 റണ്സ് വിന്ഡീസിനെ മികച്ച സ്കോറിലേക്ക് നയിച്ചു. ഈഡന് ഗാര്ഡന്സില് ടോസ് ഇന്ത്യന് ക്യാപ്റ്റന് സൂര്യകുമാര് യാദവ് വിന്ഡീസിനെ ബാറ്റിംഗിന് അയക്കുകയായിരുന്നു. സിംബാബ്വെക്കെതിരെ കളിച്ച ടീമില് നിന്ന് മാറ്റമില്ലാതെയാണ് ഇന്ത്യ ഇറങ്ങുന്നത്. ഒരു മാറ്റവുമായിട്ടാണ് വിന്ഡീസ് ഇറങ്ങുന്നത്. ബ്രന്ഡന് കിംഗിന് പകരം അകെയ്ല് ഹൊസീന് ടീമിലെത്തി. ഇരു ടീമുകളുടേയും പ്ലേയിംഗ് ഇലവന് അറിയാം.
ഇന്ത്യ: സഞ്ജു സാംസണ് (വിക്കറ്റ് കീപ്പര്), അഭിഷേക് ശര്മ, ഇഷാന് കിഷന്, സൂര്യകുമാര് യാദവ് (ക്യാപ്റ്റന്), ഹാര്ദിക് പാണ്ഡ്യ, തിലക് വര്മ്മ, ശിവം ദുബെ, അക്സര് പട്ടേല്, അര്ഷ്ദീപ് സിംഗ്, വരുണ് ചക്രവര്ത്തി, ജസ്പ്രീത് ബുമ്ര.
വെസ്റ്റ് ഇന്ഡീസ്: ഷായ് ഹോപ്പ് (ക്യാപ്റ്റന്/വിക്കറ്റ് കീപ്പര്), റോസ്റ്റണ് ചേസ്, ഷിംറോണ് ഹെറ്റ്മെയര്, റോവ്മാന് പവല്, ഷെര്ഫേന് റൂഥര്ഫോര്ഡ്, റൊമാരിയോ ഷെപ്പേര്ഡ്, ജേസണ് ഹോള്ഡര്, മാത്യു ഫോര്ഡ്, അകീല് ഹൊസൈന്, ഗുഡകേഷ് മോട്ടി, ഷമാര് ജോസഫ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!