'ഷമാര്‍ ജോസഫ് അത് ചെയ്യരുതായിരുന്നു'; അര്‍ഷ്ദീപിന്റെ ദേഹം ലക്ഷ്യമിട്ട് പന്തെറിഞ്ഞതില്‍ രൂക്ഷ വിമര്‍ശനവുമായി സുനില്‍ ഗാവസ്‌കര്‍
Synopsis
ഹൈദരാബാദിൽ നടന്ന ടി20 മത്സരത്തിൽ പരുക്കേറ്റ അർഷ്ദീപ് സിംഗിനെ ലക്ഷ്യമിട്ട് പന്തെറിഞ്ഞ വെസ്റ്റ് ഇൻഡീസ് പേസർ ഷമാർ ജോസഫിനെതിരെ സുനിൽ ഗവാസ്കർ. സ്റ്റമ്പുകൾ ഒഴിഞ്ഞുകിടന്നിട്ടും ബാറ്ററെ ആക്രമിച്ച ഷമാറിന്റെ നടപടി കായിക മാന്യതയ്ക്ക് നിരക്കാത്തതാണെന്ന് അദ്ദേഹം വിമർശിച്ചു.
മുംബൈ: ഹൈദരാബാദില്‍ നടന്ന നാലാം ട്വന്റി-20 മത്സരത്തിനിടയില്‍ വെസ്റ്റ് ഇന്‍ഡീസ് പേസര്‍ ഷമാറിന്റെ മോശം പെരുമാറ്റത്തെ രൂക്ഷമായി വിമര്‍ശിച്ച് മുന്‍ ഇന്ത്യന്‍ ക്യാപ്റ്റന്‍ സുനില്‍ ഗാവസ്‌കര്‍. പരുക്കേറ്റ ഇന്ത്യന്‍ താരം അര്‍ഷ്ദീപ് സിംഗിന്റെ ശരീരത്തിലേക്ക് മനപ്പൂര്‍വ്വം പന്തെറിഞ്ഞതിനെതിരെയാണ് ഗാവസ്‌കര്‍ രംഗത്തെത്തിയത്. മത്സരത്തിന്റെ അവസാന ഓവറില്‍ ഇന്ത്യക്ക് ജയിക്കാന്‍ 30 റണ്‍സ് വേണമെന്നിരിക്കെ, ഷമാറിന്റെ ബൗണ്‍സര്‍ അര്‍ഷ്ദീപിന്റെ തോളിനാണ് കൊണ്ടത്.
കടുത്ത വേദനയുണ്ടായിട്ടും അര്‍ഷ്ദീപ് ക്രീസില്‍ തുടരാന്‍ തീരുമാനിക്കുകയായിരുന്നു. അര്‍ഷ്ദീപിന്റെ പരുക്ക് കണ്ട് കളി നിര്‍ത്തി മടങ്ങാന്‍ ഇന്ത്യന്‍ ക്യാപ്റ്റന്‍ ശ്രേയസ് അയ്യര്‍ ആവശ്യപ്പെട്ടെങ്കിലും താരം വഴങ്ങിയില്ല. തുടര്‍ന്നുള്ള പന്തില്‍ ബൗണ്ടറി നേടാനായി അര്‍ഷ്ദീപ് പൂര്‍ണമായും ഒഴിഞ്ഞുമാറിയാണ് കളിച്ചത്. എന്നാല്‍ അര്‍ഷ്ദീപിന്റെ തോള്‍ ലക്ഷ്യമിട്ടാണ് ഷമാര്‍ വീണ്ടും ഷോര്‍ട്ട് ബോള്‍ എറിഞ്ഞത്. ഭാഗ്യവശാല്‍ പന്ത് താരത്തിന്റെ ശരീരത്തില്‍ കൊള്ളാതെ വൈഡും നാല് ബൈ റണ്‍സുമായി മാറി.
ഓവറിലുടനീളം സ്റ്റമ്പുകള്‍ ഒഴിഞ്ഞുകിടന്നിട്ടും ഷമാര്‍ അര്‍ഷ്ദീപിനെയാണ് ലക്ഷ്യമിട്ടത്. കമന്ററി ബോക്‌സില്‍ സംസാരിക്കുകയായിരുന്ന ഇതിഹാസ താരം സുനില്‍ ഗാവസ്‌കര്‍ വിന്‍ഡീസ് പേസറുടെ ഈ നടപടിക്കെതിരെ കടുത്ത അമര്‍ഷം പ്രകടിപ്പിച്ചു. 'അവന്‍ അര്‍ഷ്ദീപിനെ തന്നെയാണ് ലക്ഷ്യമിടുന്നത്.' ഗാവസ്‌കര്‍ കമന്ററിയില്‍ പറഞ്ഞു. 'സ്റ്റമ്പുകള്‍ അവിടെ തുറന്നുകിടക്കുമ്പോള്‍ എന്തിനാണ് ബാറ്ററെ ആക്രമിക്കുന്നത്?' എന്നും അദ്ദേഹം ചോദിച്ചു. കായിക മാന്യതയ്ക്ക് നിരക്കാത്ത ഈ പെരുമാറ്റത്തിനെതിരെയാണ് ഗാവസ്‌കര്‍ കടുത്ത വിമര്‍ശനം ഉന്നയിച്ചത്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!