ഹര്‍മന്‍പ്രീത് അടിച്ചിട്ടു, വസ്ട്രകര്‍ എറിഞ്ഞിട്ടു; ട്രെയ്ല്‍ബ്ലേസേഴ്‌സിനെ വീഴ്ത്തി സൂപ്പര്‍നോവാസ് തുടങ്ങി

സ്മൃതി മന്ഥാനയുടെ കീഴലിറങ്ങിയ ട്രെയ്ല്‍ബ്ലേസേഴ്‌സിനെ 49 റണ്‍സിനാണ് സൂപ്പര്‍നോവാസ് തോല്‍പ്പിച്ചത്. ടോസ് നേടി ബാറ്റിംഗിനെത്തിയ സൂപ്പര്‍നോവാസ് 164 റണ്‍സ് വിജയലക്ഷ്യമാണ് മുന്നോട്ടുവച്ചത്. മറുപടി ബാറ്റിംഗില്‍ ട്രെയ്ല്‍ബ്ലേസേഴ്‌സിന് ഒമ്പത് വിക്കറ്റ് നഷ്ടത്തില്‍ 114 റണ്‍സെടുക്കാനാണ് സാധിച്ചത്.

പൂനെ: വനിതാ ടി20 ചലഞ്ചിലെ ആദ്യ മത്സരത്തില്‍ ഹര്‍മന്‍പ്രീത് കൗര്‍ നയിച്ച സൂപ്പര്‍നോവാസിന് (Supernovas) ജയം. സ്മൃതി മന്ഥാനയുടെ കീഴലിറങ്ങിയ ട്രെയ്ല്‍ബ്ലേസേഴ്‌സിനെ 49 റണ്‍സിനാണ് സൂപ്പര്‍നോവാസ് തോല്‍പ്പിച്ചത്. ടോസ് നേടി ബാറ്റിംഗിനെത്തിയ സൂപ്പര്‍നോവാസ് 164 റണ്‍സ് വിജയലക്ഷ്യമാണ് മുന്നോട്ടുവച്ചത്. മറുപടി ബാറ്റിംഗില്‍ ട്രെയ്ല്‍ബ്ലേസേഴ്‌സിന് ഒമ്പത് വിക്കറ്റ് നഷ്ടത്തില്‍ 114 റണ്‍സെടുക്കാനാണ് സാധിച്ചത്. നാല് വിക്കറ്റ് നേടിയ പൂജ വസ്ത്രകറാണ് ട്രെയ്ല്‍ബ്ലേസേഴ്‌സിനെ തകര്‍ത്തത്. 

സ്മൃതി മന്ഥാമ (34) മാത്രമാണ് ട്രെയ്ല്‍ബ്ലേസേഴ്‌സില്‍ ഭേദപ്പെട്ട പ്രകടനം പുറത്തെടുത്തത്. ജമീമ റോഡ്രിഗസ് (24), ഹെയ്‌ലി മാത്യൂസ് (18), രേണുക സിംഗ് (14) എന്നിവരാണ് രണ്ടക്കം കണ്ട മറ്റുതാരങ്ങള്‍. സോഫിയ ഡങ്ക്‌ളി (1), ഷര്‍മിന്‍ അക്തര്‍ (0), റിച്ചാ ഘോഷ് (2), അരുന്ധതി റെഡ്ഡി (0), സല്‍മ ഖതുന്‍ (0), പൂനം യാദവ് (7) എന്നിവരാണ് പുറത്തായ മറ്റുതാരങ്ങള്‍. രേണുക, രാജേശ്വരി ഗെയ്കവാദ് (7) എന്നിവര്‍ പുറത്താവാതെ നിന്നു. പൂജയ്ക്ക് പുറമെ, അലാന കിംഗ് രണ്ട് വിക്കറ്റ് നേടി. മേഘ്‌ന സിംഗ്, സോഫി എക്ലെസ്റ്റോണ്‍ എന്നിവര്‍ ഓരോ വിക്കറ്റ് വീഴ്ത്തി.

നേരത്തെ,  ടോസ് നേടി ബാറ്റിംഗിനെത്തിയ സൂപ്പര്‍ നോവാസിന് ഹര്‍മന്‍പ്രീത് കൗര്‍ (37), ഹര്‍ലീന്‍ ഡിയോള്‍ (35), ദിയേന്ദ്ര ഡോട്ടിന്‍ (32) എന്നിവരാണ് ഭേദപ്പെട്ട സ്‌കോറിലേക്ക് നയിച്ചത്. ഹെയ്‌ലി മാത്യൂസ് മൂന്നും സല്‍മാ ഖതുന്‍ രണ്ട് വിക്കറ്റും വീഴ്ത്തി. മികച്ച തുടക്കമാണ് സൂപ്പര്‍നോവാസിന് ലഭിച്ചത്. ആദ്യ വിക്കറ്റില്‍ പ്രിയ പൂനിയ (20 പന്തില്‍ 22)- ഡോട്ടിന്‍ സഖ്യം 50 റണ്‍സ് കൂട്ടിചേര്‍ത്തു. എന്നാല്‍ ആറാം ഓവറില്‍ ഡോട്ടിന്‍ പുറത്തായത് അവര്‍ക്ക് തിരിച്ചടിയായി. 

എട്ടാം ഓവറില്‍ പ്രിയയും പവലിയനില്‍ തിരിച്ചെത്തി. മൂന്നാമതായി ക്രീസിലെത്തിയ ഹര്‍ലീന്‍ വേഗത്തില്‍ സ്‌കോര്‍ കണ്ടെത്തിയതോടെ 12-ാം ഓവറില്‍ 100 റണ്‍സെടുത്തു. എന്നാല്‍ ആ ഓവറില്‍ ഹര്‍ലീന്‍ മടങ്ങി. പിന്നീട് കൃത്യമായ ഇടവേളകളില്‍ അവര്‍ക്ക് വിക്കറ്റുകള്‍ നഷ്ടമായി. സുനെ ലുസ് (10), അലാന കിംഗ് (5), പൂജ വസ്ത്രകര്‍ (14), സോഫി എക്ലെസ്‌റ്റോണ്‍ (5) എന്നിവര്‍ നിരാശപ്പെടുത്തി. ഇതിനിടെ ഹര്‍മന്‍പ്രീത് അടിച്ചെടുത്ത 37 റണ്‍സാണ് ടീമിനെ 160 കടത്താന്‍ സഹായിച്ചത്. ഹര്‍മന്‍പ്രീത് റണ്ണൗട്ടായി. മേഘ്‌ന സിംഗ് (2), വി ചന്ദു (0) എന്നിവരാണ് പുറത്തായ മറ്റുതാരങ്ങള്‍. താനിയ ഭാട്ടിയ (1) പുറത്താവാതെ നിന്നു.

സൂപ്പര്‍നോവാസ്: പ്രിയ പൂനിയ, ഡിയേന്ദ്ര ഡോട്ടിന്‍, ഹര്‍ലീന്‍ ഡിയോള്‍, ഹര്‍മന്‍പ്രീത് കൗര്‍, സുനെ ലുസ്, അലാന കിംഗ്, പൂജ വസ്ത്രകര്‍, സോഫി എക്ലെസ്റ്റോണ്‍, താനിയ ഭാട്ടിയ, മേഘ്‌ന സിംഗ്, വി ചന്ദു. 

ട്രെയ്ല്‍ബ്ലേസേഴ്‌സ്: സ്മൃതി മന്ഥാന, ഹെയ്‌ലി മാത്യൂസ്, സോഫിയ ഡങ്ക്‌ളി, ജമീമ റോഡ്രിഗസ്, ഷര്‍മിന്‍ അക്തര്‍, സല്‍മ ഖതുന്‍, റിച്ചാ ഗോഷ്, അരുന്ദതി റെഡ്ഡി, പൂനം യാദവ്, രാജേശ്വരി ഗെയ്കവാദ്, രേണുക സിംഗ്.